Kakai Lalahi Kei Talavoú
Tupulaki Māmālie
Laʻitā mei he Getty Images
ʻE lava ke ongo fakailifia e fakahaohaoá—tautautefito ʻi heʻetau ʻai ia ko e tuʻunga ki hotau tuʻunga taʻehaohaoá. Ko ʻeku ʻuhingá, ʻoku fai ʻe he tokotaha kotoa ha fehalaaki ʻi he taimi ʻe niʻihi pea fakaʻiseʻisa ʻi he ngaahi fehalākí. ʻOku faʻa lava e ngaahi fakaʻiseʻisa ko ʻení ʻo tokoni ke tau fakahoko e ngaahi liliu ʻoku fie maʻú, ka ʻo kapau te tau fakamoleki ha taimi lahi ʻi he fakakaukau ki he fie maʻu ke fai lelei ange pea toe lelei angé, ʻe lava leva ke fakatupu vaivai e ngaahi fakakaukau ko iá. ʻI he fakamatala ʻa Nētane ʻi he peesi 44, ʻoku tokoni ia ke tau ʻiloʻi e ʻuhinga ʻo e fakahaohaoá mo e founga te tau lava ai ʻo aʻu ki ai ʻo fakafou ʻi he moʻui angamāʻoniʻoní, ʻo fakahoko māmālie.
ʻE lava foki ke faʻa ʻasi ʻo hangē ʻoku tau tuenoa ʻi heʻetau faifeinga ke fakalakalaká, ka ʻoku ʻikai! ʻE tokoniʻi kitautolu ʻe he Tamai Hēvaní mo Sīsū Kalaisi. ka faifai angé peá ke ongoʻi ʻoku ʻikai ke ke lelei feʻunga, lau e fakamatala ʻa Sieli ʻi he peesi 42 fekauʻaki mo e founga naʻe tokoni ai e mahino ʻo e Fakalelei ʻa e Fakamoʻuí, ke ne ikunaʻi ʻene holi ke haohaoá.
ʻOku faʻa nofotaha e holi ke haohaoá ʻi he ngaahi meʻa hangē ko e maʻá, ʻo hangē ko e ngaahi hohaʻa ʻa ʻEmipaá, pe ʻi he ngaahi tafaʻaki ʻo e ongoongoleleí, hangē ko e feinga ʻa ʻĒlone ke hoko ko ha tangata ʻa e ʻOtuá (ʻoku maʻu e ongo talanoá fakatouʻosi ʻi he fakaʻilekitulōniká pē). Kae hangē pē ko hono ʻilo ʻe he kakai lalahi kei talavoú ni, te ke kei lava pē ʻo ongoʻi e Laumālié pea hoko ko ha tangata pe fefine ʻa e ʻOtuá neongo kapau ʻoku ʻikai ke ke haohaoa.
Ke fie maʻu ha ongoongo lelei lahi ange? Mahalo ʻoku ʻikai ʻuhinga e fekau “ko ia ke haohaoa ʻa kimoutolú” (Mātiu 5:48) ki he meʻa ʻokú ke fakakaukau ki aí. Lau e fakamatala ʻa Tēvita ʻoku maʻu fakaʻilekitulōnika peé ke ako ha ngaahi sitepu ʻe niʻihi ki hono ikunaʻi e holi ke haohaoá.
ʻI heʻetau fāifeinga ke fakalakalaká, ʻoku fie maʻu ke tau manatuʻi ʻoku finangalo e ʻEikí ke tataki fakalaumālie mo langaki hake kitautolu—kae ʻikai mamahi. Te tau lava ʻo fakaangaʻi lahi kitautolu pē (vakai ki heʻeku fakamatala fakaʻilekitulōniká) pea ʻoku totonu ke tau manatuʻi ke tau angalelei kiate kitautolu pē ʻi heʻetau fāifeinga ki he haohaoá.
Nofotaha ki he Tamai Hēvaní mo e Fakamoʻuí. ʻOkú Na ʻafioʻi ho mahuʻinga fakalangí pea ʻi he fakalau ʻa e taimí, te Na lava ʻo tokoniʻi koe ke ke aʻusia ha tuʻunga lelei ange ʻi he meʻa naʻá ke fakakaukau te ke ala aʻusiá. Tupulaki māmālie.
Fakaʻapaʻapa atu,
Heather Claridge