Ko e Fehalaaki ʻi he Telé

Fai ʻe ʻEletā Allen D. Haynie

ʻO e Kau Fitungofulú

“ʻOku mau tui ʻoku totonu ke faitotonu” (Ngaahi Tefito ʻo e Tui 1:13).

ʻI he taimi naʻá ku taʻu hiva nai aí, naʻá ku loto ke fakaloloa hoku kavá. Ne u pehē te u lava ʻo fai ʻeni ʻaki hono tele hoku matá he ʻaho kotoa pē. Naʻá ku fakaʻaongaʻi e tele ʻa ʻeku tangataʻeikí ke u tele ʻaki ʻi ha ngaahi ʻaho siʻi. ʻI ha ʻaho ʻe taha naʻe sio mai ʻeku tangataʻeikí ki heʻeku telé. Naʻá ne fakatokanga mai ke ʻoua te u fai ia koeʻuhí naʻá ku lavea ai.

Ko e pangó naʻá ku talangataʻa ki heʻeku tangataʻeikí. Naʻá ku toe tele ʻi he ʻaho hono hokó. Naʻe heke ʻa e telé mei hoku ʻulutuhu pani koá lolotonga ʻeku telé. Naʻe mahifi lahi ai hoku funga laʻingutú. Naʻá ku ilifia ʻaupito ʻi heʻeku peniʻeitiʻi hoku laʻingutú. Ka naʻá ku toe ilifia lahi ange au pe ko e hā ha lau ʻeku tangataʻeikí.

ʻI heʻene foki mai ki ʻapi he pō ko iá ʻo sio ki hoku laveá, naʻá ne ʻohovale pea loto-hohaʻa. Naʻá ne fehuʻi mai pe naʻe founga fēfē ʻene hokó.

Naʻá ku talaange, “Naʻá ku lele hifo he laʻisimá peá u tō ʻo tūʻulu ʻaki hoku matá.”

Naʻá ku loi! Ko e ʻuluakí naʻá ku talangataʻa, pea ko ʻeni kuó u taʻefaitotonu! Naʻe ʻikai ke u lava ʻo mohe he pō ko iá. Naʻe fuoloa e poʻulí ka naʻe pau ke u tala e moʻoní ki he Tangataʻeikí. Naʻá ku maʻu ia ʻi he loto falé.

Naʻá ku pehē ange, “Teti, naʻá ku loi atu kiate koe. Naʻe ʻikai ke u tō au. Naʻá ku lavea au ʻi hono tele ʻaki e telé. Fakamolemole.”

Naʻe kiʻi fakalongolongo taimi siʻi ʻeku tangataʻeikí. Naʻá ne talamai fakalelei leva, “Foha, naʻá ke talangataʻa ʻOku ʻikai ko ha meʻa lelei ia. Ka ʻoku ou fiefia ʻi hoʻo fakakaukau ke talamai e moʻoní.”

Kuo nofoʻia e lēsoni ko iá—mo e foʻi pikí—ʻiate au talu mei he ʻaho ko iá. Hoko maʻu pē ko ha faʻifaʻitakiʻanga ʻo e faitotonú mo e moʻoní neongo pe ko hoʻo fai ia ki hoʻo Tamai Hēvaní pe ki ho kaungāmeʻá mo e fāmilí.