Mei he Faingataʻá ki he Kaungāmeʻá
Tā fakatātā ʻa Allen Garns
ʻI ha ʻaho Sāpate ʻe taha lolotonga e houalotu sākalamēnití, naʻá ku ongoʻi ha meʻa naʻá ne fakahohaʻasi au. Naʻe ʻikai ke u ʻiloʻi pe ko e hā, ka naʻe ʻikai ke mole e ongo ko iá. Naʻá ku manavasiʻi ʻi heʻeku vakai ki he uasí mo fakaʻamu ke fai mo ʻosi e houalotú. Naʻe ʻikai ko ha meʻa angamaheni ʻeni kiate au.
Hili ʻa e lotu tukú, naʻá ku kei maʻu pē ʻa e ongo ko iá. Naʻá ku sio takai ʻi he falelotú peá u fakatokangaʻi ha tangata ʻokú ne puke hono fatafatá. Naʻá ku lue atu kiate ia peá ne kole mai ke u ʻave ia ki he tauʻanga lēlué. Naʻá ku talaange ʻoku totonu ke u ʻave ia ki he loki tokoni fakavavevavé. Na‘á ne pehē naʻe ʻi ai ʻene foʻiʻakau ʻi ʻapi ʻe tokoni kiate ia. Naʻá ku talaange te u ʻave ia ki hono ʻapí he ʻoku fuʻu fakatuʻutāmaki ke ne ʻalu ʻi he lēlué mo e tuʻunga ʻoku ʻi aí.
Naʻá ku tokoniʻi ia ke heka ki heʻeku kaá peá u toe fehuʻi ange pe te u ʻave ia ki he toketaá. Naʻá ne pehē naʻe ʻikai fie maʻu ia pea ke u ʻalu pē ki hono ʻapí. Naʻá ku lotu fakalongolongo ʻo kole ki heʻeku Tamai Hēvaní ke Ne tokoniʻi ia ke sai pē pea tokoni mai ke u fakaʻuli hao mo ia ki ʻapi! Naʻá ku fakaʻuli tokanga, tuku hifo e matapā sioʻata ʻo e kaá, mo feinga ke fakafiemālieʻi ia. Hili ha kiʻi taimi, naʻá ne tokoto ki mui ʻi hono seá pea kamata māmālie ke ne maʻu ha nonga.
ʻI heʻema aʻu ki hono ʻapí, naʻá ne fakaafeʻi au ki loto. Naʻá ku fiefia koeʻuhí ne u loto ke fakapapauʻi naʻe maʻu ʻene foʻiʻakaú pea naʻe ngāue. Naʻá ne folo ʻene foʻiʻakaú pea kamata ke ne ongoʻi sai. Naʻá ne pehē naʻe kei mamahi pē hono fatafatá ka ʻokú ne ongoʻi malu ʻi hono ʻapí.
Naʻá ne fakaafeʻi au ke ma maʻu meʻatokoni efiafi, pea kuó ma hoko ko ha kaungāmeʻa lelei talu mei he hoʻatā ko iá. ʻOkú ma faʻa ō ʻo ʻeva mo fetokoniʻaki. Kimuʻa ʻi he aʻusia ko ʻení, ne tokolahi hoku kaungāmeʻa ne ʻikai ke nau hoko ko ha ivi tākiekina lelei kiate au. Ka kuo faitāpuekina ʻeku moʻuí ʻi heʻeku kaungāmeʻa mo e tangatá ni.
Ko e taimi ʻe niʻihi ʻe lava ke tupu mei he faingataʻá ha feohi fakakaungāmeʻa lelei. Kapau naʻá ku fakaheka pē ia ki he lēlué, ʻoku ou fifili pe te ne aʻu nai ki ʻapi. Naʻe ʻikai ke u mei fakamolemoleʻi au kapau ne hoko ha meʻa kiate ia. ʻOku ou houngaʻia ʻi heʻeku Tamai Hēvaní ʻi hono tataki au ʻe he Laumālie Māʻoniʻoní ki he tūkungá ni ʻou lava ke maʻu ai ha kaungāmeʻa mamae moʻoni!