Nonga ʻi he Temipalé
ʻOku nofo ʻa e tokotaha naʻá ne faʻú ʻi he National District, Dominican Republic.
ʻOku ʻikai faʻa tatali ʻa Hōsei ke ʻalu ki he temipalé. Ko e hā leva ʻokú ne fuʻu tailiili aí?
“Fie siofia ha temipale. Te u ʻi ai ha ʻaho” (Tohi Hiva ʻa e Fānaú, 99).
Naʻe pehē ʻe Pīsope Kāsia, “Talamonū atu Hōsei.” Naʻá ne mono mai ʻeku lekomeni temipale foʻoú.
“Mālō ʻaupito!” Ko au atu ia. Naʻá ku lulululu mo ia peá u hū ki tuʻa mei he ʻōfisí mo siofi e laʻipepa hinehiná. Te u lava ʻo ʻalu ki he temipalé ʻo fakahoko e papitaisó!
Naʻe tatali mai ʻeku abuelos (ongo kuí) ʻi he holó. Naʻe ʻikai faʻa haʻu ʻeku ongomātuʻá ki he lotú, ko ia ai naʻá ku faʻa ʻalu ki he lotú mo ʻeku ongo kuí. Naʻá na fakatou fāʻofua mai kiate au.
“ʻOkú ke fiefia ʻi he ʻamanaki ke ke fononga ki he temipalé he uike kahaʻú?” Ko e fehuʻi mai ia ʻeku kui tangatá ʻi heʻemau lue ki tuʻá.
“ʻIo!” Ko au atu ia. Ka naʻe ʻikai ke u lava ʻo mapukepuke ʻeku fiefiá.
Naʻe pehē mai ʻeku kui fefiné mo ʻene malimalí, “ʻE fakalata ke tau ō fakafāmili fakataha.”
Naʻá ku malimali ange, ka naʻe ʻikai mole atu e ongo fakafiefiá.
ʻI he panaki mai e ʻaho ʻo e fononga ki he temipalé, naʻe lahi ange ʻeku tailiilí. Faifai peá u talanoa ki ai mo ʻeku kui fefiné.
Naʻe fai ʻene hifi vesitapolo ʻi he peitó, ka naʻá ne tuku ia ʻi heʻeku hū atú. Naʻá ne fehuʻi mai, “Ko e hā e meʻa ʻoku hokó?” mo holoholo hono nimá ʻi ha taueli. “ʻOkú ke fofonga hohaʻa.”
Naʻá ku māpuhoi peá u tangutu hifo ʻi he tēpilé. “ʻOku ou fuʻu fiefia ʻaupito ke ʻalu ki he temipalé. Ka ʻoku ou tailiili foki.”
Naʻe kamokamo ʻeku kui fefiné, ʻo hangē naʻe mahino kiate ia e ongo ne u maʻú. “ʻOku ʻikai fie maʻu ia ke ke hohaʻa. ʻE ʻi ai ha kakai ke nau tokoniʻi koe he taimi kotoa pē.”
Ne u ongoʻi ne ʻalu hake ha ongoʻi nonga ʻiate au ʻi heʻene leá. Naʻá ku ʻiloʻi ʻe hoko ia ko ha ʻaho makehe.
Ne ʻikai fuoloa kuo hokosia e ʻaho ke mau fononga ai ki he temipalé. Naʻá ku tui hoku vala ki he ʻaho Sāpaté pea helu hoku ʻulú. Ne hū mai ʻeku kui fefiné ki hoku lokí.
Naʻá ne fehuʻi mai, “ʻOkú ke ongoʻi fēfē hake?”
“Fiefia ʻaupito! ʻOku ʻikai ke u faʻa tatali ke ʻalu ki he temipalé.”
Naʻe tangutu ʻeku kui fefiné ʻi hoku veʻe mohengá peá ne toʻo hake ha laʻipepa mei hono kató.
Naʻá ne pehē mai, “Ko ha kaati ouau fakatemipale ʻeni. Ko e ʻai ia ki hoku tuongaʻané. Naʻá ne makehe ʻaupito kiate au. Ka naʻá ne pekia kimuʻa pea lava ʻo papitaisó. Te ke fie papitaiso maʻana he ʻahó ni ʻi he temipalé?”
Naʻe mono mai ʻe heʻeku kui fefiné e laʻipepá. Naʻá ku lau e hingoá: Leimoni Lotilikiesi. Naʻá ku lava ʻo tala naʻe ʻofa ʻeku kui fefiné ʻi hono tuongaʻané, pea naʻá ku fiefia naʻa ne falala mai ke u papitaiso maʻana.
“ʻIo kui fefine. Mālō!” Naʻá ku faʻo fakalelei ia ki hoku kató.
Lolotonga e fononga ʻi he pasí ki he Temipale Santo Domingo, naʻe talanoa ʻeku kui fefiné kau ki he taimi naʻá ne fuofua ʻalu ai mo ʻeku kui tangatá ki he temipalé. ʻI he taimi ko iá, naʻe pau ke na fononga ki Pelū koeʻuhí naʻe ʻikai ke ʻi ai ha temipale ʻi he Lepupelika Tominiká.
Naʻa mau aʻu ki he temipalé ʻi ha houa ʻe taha mei ai. Naʻe ʻi ai foki mo Pīsope Kāsia. Naʻá ku ofo ʻi heʻemau lue atu ki he falé. Naʻe fakaʻofoʻofa ʻaupito ia! Naʻá ku kiʻi tuʻu ke lau e ngaahi lea ʻi ʻolunga he matapaá: Māʻoniʻoni ki he ʻEikí: Ko e Fale ʻo e ʻEikí.
ʻI heʻeku hū atu ʻi he matapaá, naʻá ku ʻiloʻi naʻá ku hū ki ha feituʻu makehe. Ne hangē naʻe mōlia kotoa atu ʻeku hohaʻá. Naʻe lōngonoa mo nonga e meʻa kotoa.
Hili ʻeku fetongi ki he vala hiná, naʻá ku tuʻu ʻi he faiʻanga papitaisó mo Pīsope Kāsia. Naʻá ku fakafanongo tokanga ʻi heʻene lea ʻaki e ngaahi lea ʻo e lotu he papitaisó. ʻI he taimi naʻá ne lea ʻaki ai e hingoa ʻo Leimoní, naʻe fakafonu au ʻaki ha ongoʻi nonga.
Naʻe tukutukuhifo hifo au ʻe Pīsope Kāsia ki he vaí. ʻI heʻeku tuʻu haké, naʻá ku malimali. Naʻe ʻikai ke u faʻa tatali ke toe fakahoko ʻeni!