Ko e Taukei ʻo e Loto Vilitakí

Lolotonga ʻeku hoko ko ha palesiteni fakamisiona ‘i ‘Ulukuai mei he 1994 ki he 1997, ne u faʻa fakahoa e ngāue fakafaifekaú ki haʻate toʻo ha ngaahi kalasi lēvolo maʻolunga ʻi he kolisí. Ne u talaange ki heʻema kau faifekaú ʻoku tatau e ngāue fakafaifekaú mo hano toʻo ha ngaahi kalasi maʻolunga ange ʻi he faivelengá mo e faʻa kātakí, ʻi he ngaahi ʻulungaanga kehé, ʻa ia ʻe tokoni ia kiate kinautolu ʻi heʻenau teuteu ke hoko ko ha ngaahi mali mo ha mātuʻa ʻi he kahaʻú.

Ka ko e pangó, ʻoku ʻikai mateuteu ha niʻihi ʻo e kakai kei talavou ʻo e ʻaho ní, ki he ngaahi lēsoni faingataʻa ʻo e moʻuí. ʻOku siʻisiʻi ke nau maʻu e meʻa ʻoku ou ui “ko e taukei ʻo e loto vilitakí”. ʻOku tau vakai ki he siʻisiʻi ko ia ʻa e loto vilitakí ʻi he kau taʻu ʻuluaki he ʻunivēsití, kau hū foʻou ʻi ha vaʻa fakakautau, kae pehē foki ki ha niʻihi ʻo ʻetau kau faifekau taimi kakató.

ʻI heʻetau hoko ko e mātuʻá, ʻoku tau ʻofa ʻi heʻetau fānaú mo fiemaʻu e lelei tahá maʻanautolu. ʻOku tau loto ke faingofua ange ʻenau moʻuí ʻiate kitautolu. Kae mahalo—ʻi he anga fakafonua ʻoku tau maʻú—ʻoku tau fai ha ngaahi meʻa ʻo tupu ai ha ngaahi nunuʻa taʻeʻamanekina, ʻo holoki ai ʻenau loto vilitakí.

Meʻamālié, ʻoku ʻi ai ha founga ke fakaleleiʻi ʻaki. ʻOku maʻu ia ʻi hono moʻui ʻaki ʻo e ngaahi tefitoʻi moʻoni mālohi ʻo e ongoongoleleí ʻe lava ʻo tokoni ki hotau toʻu tupú ke nau hoko ʻo hangē ko e Fakamoʻuí (vakai, Luke 2:52). ʻI heʻetau tali mo moʻui ʻaki e ngaahi tefitoʻi moʻoni ko ʻení, ʻa ia te u aleaʻi ʻo kamata ʻi he peesi 12, ʻoku ou falala ʻe tāpuekina kitautolu ʻe he ʻEikí ke tau fakamālohia e kau talavou mo e kau finemui kuó Ne fakatatali ke nau fakafepakiʻi mo ikunaʻi ʻe ngaahi faingataʻa ʻo e kuonga ní.

ʻEletā Lynn G. Robbins

ʻO e Kau Fitungofulú