Siʻi Ngaahi Mātuʻa

Dear Parents

Ko ha taʻu fakafiefia ʻeni ki he ngaahi temipale ʻi he funga ʻo e māmaní! Kuo fakatāpui ha ngaahi temipale ʻi Ītali, Temokalati Lepupelika ʻo Kongokoó, Palāsila, Haiti mo Potukali. ʻOku ʻi ai ha ngaahi temipale kehe ʻoku toe fakatāpui. ʻOku ʻi he makasini ko ʻení ha ngaahi fakamatala ʻoku talanoa kau ki he ngaahi temipalé. ʻE lava hoʻo fānaú ʻo:

• Toe vakaiʻi e ngaahi fehuʻi ki he lekomeni temipalé (peesi K11).

• Muimui ʻia Mei ʻi heʻene ako fekauʻaki mo ha mēmipa ʻo e fāmilí ʻoku fie maʻu ke fakahoko ki ai e ngaahi ouau fakatemipalé (peesi K12–K13).

• Lau ha talanoa fekauʻaki mo e fuofua fononga ʻa ha kiʻi tamasiʻi ki he temipalé (peesi K14–K15).

ʻE lava nai hoʻo fānaú ʻo ʻilo pe ʻoku fakaʻaongaʻi tuʻo fiha e foʻi lea temipalé ʻi he makasiní? Te nau lava ʻo fakaangaanga hono tohi e sētesi “ʻOku ou fie siofia e temipalé” pea tā ha fakatātā ʻo ho fāmilí ʻi he temipalé. Te mau fiefia ke sio ki homou ʻū taá!

Kuo tāpuekina fēfē ʻe he ngaahi temipalé hoʻo moʻuí?

Ko e Kaumeʻá

Founga ke ʻAve e Tā Valivali Hoʻo Tamasiʻí/Taʻahiné pe Aʻusiá ki he Liahona

Vakai ki he liahona.ChurchofJesusChrist.org pea lomiʻi ʻi he “Submit an Article or Feedback.” Pe ʻīmeili ia ki he [e-mail] fakataha mo e hingoa, taʻu, kolo ʻoku nofo ai hoʻo tamasiʻí/taʻahiné pea mo e fakamatala fakangofua ko ʻení: “Ko au, [fakahū hoʻo hingoá], ʻoku ou tuku ha ngofua ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke pulusi e tohi ʻeku tamasiʻí/taʻahinʻi he ngaahi makasini ʻa e Siasí, uepisaití mo e ngaahi mītia fakasōsialé.” ‘Oku ʻikai ke mau lava ‘o tatali ke fanongo meiate koe!