Kau Samēlia ʻi he ʻEleveitá
Tā fakatātaaʻi ʻe Anna Godeassi
ʻI he taimi ne tuku hake ai ʻe ha fāmili ʻi he Facebook ha ʻū tā fekauʻaki mo ʻenau aʻusia ʻi heʻenau ʻi ha ʻeleveita ne mate ʻi ha houa ʻe uá, naʻe ʻikai mahino kiate au. Ne ʻikai mahino ia kae ʻoua kuó u toki aʻusia tonu e mate ʻa e ʻeleveitá.
Naʻá ku tuku ʻeku telefoni toʻotoʻó ʻi ʻapi, ko ia naʻá ku tuki ai e matapā ʻo e ʻeleveitá mo ui tokoni. Naʻá ku lotu foki. Taimi nounou pē, ne fanongo mai ha kau talavou pea—hangē ko e kau Samēlia leleí—naʻa nau tā ki he tokoni fakavavevavé. Naʻa nau pehē mai leva ʻoku nau nofo ʻi he fale nofo totongi fika 38 pea mo nau fakakata mai, ko ʻeku ʻataá pē peá u ʻalu ange mo ha meʻakai mo fakamālō ange.
Naʻa nau ʻalu leva pea naʻe faingataʻa ke u maʻu ha nonga. Fēfē kapau he ʻikai ke aʻu mai e kau tokoni fakavavevavé ia? Naʻe toe fakalalahi ange ʻeku lotú. Naʻá ku ʻiloʻi kuo mei foki mai hoku husepānití mei he ngāué pea he ʻikai te ne ʻilo e feituʻu ʻoku ou ʻi aí.
Naʻá ku kamata ke toe tuki. Ne u lava ʻo sio ʻi he kiʻi ava ʻa e matapā ʻo e ʻeleveitá, ki he felueʻaki e kakaí. Naʻá ku ui atu kiate kinautolu mo kole ange pe te nau lava ʻo fetuʻutaki ki hoku husepānití ʻo talaange e tūkunga ʻoku ou ʻi aí. Naʻa nau fai ia, pea naʻe lava leva ke u maʻu ha nonga. Naʻe ʻiloʻi leva ʻe hoku husepānití he taimi ko ʻení, pea te ne fakapapauʻi te u hao ki tuʻa.
Naʻá ku tangutu ʻi he ʻeleveitá ʻi ha meimei houa ʻe taha. Ne faifai pea haʻu ha tokotaha ngāue monomono ʻo tukuange mai au ki tuʻa. Naʻá ne pehē ne tuʻu e ʻeleveitá, pea naʻe pau ai ke ne kaka ʻi he saafi ʻo e ʻeleveitá ʻo feingaʻi ke ngāue. Ne u fakamālō ange ʻi heʻene tokoní.
Kimui ange ʻi he ʻaho ko iá, naʻá ku ʻalu ki hoku kaungāʻapi ʻi he fale nofo totongi fika 38 ʻo fakamālō ange. Ne u ʻave ange mo haʻanau meʻakai ne u kuki. Naʻa nau pehē ne nau fakakata pē kinautolu fekauʻaki mo e meʻakaí, ka naʻá ku fiefia ke fakamālō kiate kinautolu. ʻI heʻeku fakakaukau atu ki he aʻusia ko ʻení, ʻoku ou ʻiloʻi leva ʻa e meʻa ne foua ʻe he fāmili ʻi hoku uōtí, pea ʻoku ou fakamālō ki he kakai naʻe ʻikai ke nau fakalaka hake ʻiate au, ka nau tuʻu ʻo tokoní.
Mahalo naʻe ʻikai ke nau ʻiloʻi, ka naʻa nau muimui ki he sīpinga ʻa e Fakamoʻuí. Naʻe ʻikai ke Ne fakalaka pe liʻaki kitautolu. Naʻá Ne foaki ʻEne moʻuí kae lava ke fakahaofi kitautolu mei mate fakatuʻasinó mo e fakalaumālié. Koeʻuhí ko e meʻá ni, te u feinga ke muimui ki Heʻene sīpingá pea ʻoua naʻa teitei fakalaka ʻi ha faingataʻaʻia ha taha. ʻOku ou houngaʻia ko e aʻusia ko ʻeni kuo taʻeʻamanekina ai ʻeku maʻu ha loto-houngaʻia lahi ange kiate Ia mo ʻEne ngaahi tāpuakí.