Fakakomipiuta Pē: Kakai Lalahi Kei Talavoú
Faingataʻaʻia Fakalaumālié mo e Mahuʻinga ʻo e Ngaahi Kaungāmeʻa Leleí
ʻOku nofo ʻa e tokotaha naʻá ne faʻú ʻi he Fakahihifo ʻo ʻAositelēliá, ʻAositelēlia.
ʻI heʻeku kei talavoú, naʻá ku kau atu ki ha ngaahi faeasaiti. ʻOku ʻikai ke u manatuʻi e meʻa kotoa pē, ka naʻe ʻi ai ha lea ʻe taha te u manatuʻi maʻu pē. Naʻe vahevahe ʻe ha taha ʻo ʻeku kau takí ʻa ia ko ha pailate Laulāpuna kimuʻa, ʻa ʻene aʻusia ʻi he hypoxia — ko e siʻisiʻi e ʻosikena ʻi he sino ʻo ha taha, ʻa ia ʻokú ne uesia ai honau ʻutó.
Naʻe fakamatalaʻi ʻe he takimuʻá, ko e kau pailate Laulāpuná ʻoku nau tuʻu laveangofua ke nau moʻua ʻi he haipokisikí, ko ia ʻoku nau tomuʻa fakahoko ha ngaahi ako lolotonga ʻenau moʻua he fokoutuá ni. ʻI ha fakataha ako ʻe taha, naʻe fakahinohinoʻi ai ia ke ne toʻo ʻene meʻa mānava ʻaki e kasá pea toe tui ia ʻi heʻene ongoʻi ʻoku ʻamanaki ke puké. Ka naʻe ʻikai ke ne toe tui ʻa e meʻa mānavá—naʻe pau ke fakatui ia ʻe hono ngaahi kaungāmeʻá kiate ia.
Hili ʻa e akó, naʻe fakamatala ange ʻe hono ngaahi kaungāmeʻá ne nau fakatokangaʻi naʻá ne fuesia e ngaahi fakaʻilonga kotoa ʻo e haipokisiá—ʻa e fai e ngaahi fili halá, faingataʻa ʻene leá, mo puputuʻu. Naʻá ne pehē naʻe ʻikai ke ne ongoʻi e ngaahi fakaʻilonga ko iá peá ne pehē naʻá ne sai pē, neongo naʻe fakatokangaʻi ʻe hono ngaahi kaungāmeʻá naʻá ne ʻi ha tuʻunga fakatuʻutāmaki.
Taimi ʻe niʻihi ʻi he moʻuí, te tau fai ha ngaahi meʻa ʻoku ʻikai totonu ke tau fai taʻe te tau ʻiloʻi ʻoku hala e meʻa ʻoku tau faí. Mahalo te tau fai ha ngaahi fili hala, kehe ʻetau tōʻongá, pea puputuʻu ʻaupito ʻi he moʻuí—hangē ko e haipokisiá. Ko e hala ki he moʻui taʻengatá ko ha hala ia te tau ala afe ngofua mei ai kapau ʻoku ʻikai ke nau tukupā ki ai foki (vakai 1 Nīfai 8:23, 28; 3 Nīfai 14:13–14). Ko e taimi ʻeni ʻoku fakatuʻutāmaki ai e ʻi ai ha ngaahi kaungāmeʻa koví ki he taimi ʻokú ke moʻua ai ʻi he haipokisikí. Ko e moʻoni, ʻoku ʻikai ko ha kakai kovi moʻoni ʻa e ngaahi kaungāmeʻa koví—ʻoku ou ʻuhinga atu ki he ngaahi kaungāmeʻa he ʻikai ke nau fakatui hoʻo meʻa mānava kasá mo kinautolu te nau lava ʻo tataki koe ki ha tuʻunga fakatuʻutāmaki fakalaumālie.
ʻI heʻeku tupu hake ʻi ʻAositelēliá, naʻá ku feohi mo ha ngaahi kaungāmeʻa kehekehe, ʻi loto pea mo ʻi tuʻa ʻi he Siasí—ko e niʻihi naʻe ʻikai ko ha tākiekina lelei kinautolu. Kuó u aʻusia ha ngaahi tūkunga ʻa ia naʻá ku ongoʻi moʻoni ai te u lava ʻo nofo ʻi he hala hangatonu mo fāsiʻí, ka koeʻuhi ko e tākiekina ʻo ha ngaahi kaungāmeʻa kovi, ne sai pē kiate au ʻenau ngaahi tōʻongá pea kamata ke u muimui kiate kinautolu.
Naʻe tokoniʻi au ʻe heʻeku fakafanongo ki heʻeku ongomātuʻá mo e kau taki ʻo e Siasí, ke u fakakaukau lelei ange. Naʻá ku ʻiloʻi ne nau loto ke u maʻu e lelei tahá ʻi heʻeku moʻuí pea te nau lava ʻo sio lelei ange ʻiate au ʻi he taimi te u aʻu ai ki ha tuʻunga haipokisia fakalaumālie. Naʻá ku feinga ke u tuʻu maʻu pē ʻi he ngaahi potu māʻoniʻoní. Naʻá ku ʻalu ki he ngaahi ʻekitivitī ʻa e kakai lalahi kei talavoú mo e lotu. ʻO aʻu ki he taimi naʻá ku fakamoleki ai e konga lahi ʻo hoku taimí ʻi he ʻunivēsití mo e ngāué, naʻá ku maʻu ha ngaahi kaungāmeʻa lelei. Kuó u maʻu ha ngaahi kaungāmeʻa lelei ʻoku ʻikai ke nau kau ki he Siasí, ka ʻoku nau fili ki he leleí pea nau hoko ko ha ngaahi faʻifaʻitakiʻanga lelei. Hangē ko ʻení, naʻá ku fetaulaki mo ha taha ʻo hoku ngaahi kaungāmeʻa mamae ʻi he akoʻanga māʻolungá. Naʻá ne feinga maʻu pē ke ne hoko ko ha tokotaha lelei ange, neongo ʻa e ʻikai ke ne kau ki he Siasí, naʻá ne tokoniʻi au ke u ʻiloʻi e taimi ʻoku ʻikai ke u fili ai e hala totonu maʻakú. Pea ko e meʻa ia ʻoku fai ʻe ha kaungāmeʻa lelei.
ʻOku pehē ʻi he Lea Fakatātā 13:20, “Ko ia ʻoku ʻaʻeva fakataha mo e kakai potó ʻe poto ai ia: ka ʻe fakaʻauha ia ʻoku kaumeʻa mo e kakai valé.” ʻOku ou poupou ʻaupito ki ai—ko e ngaahi kaungāmeʻa ʻokú ke feohi lahi taha mo iá ko e kakai ia te ke muimui aí. Hangē ko e ʻikai ko ia ke u ʻiló, mahalo he ʻikai ke ke fakatokangaʻi e taimi ʻokú ke fokoutua fakalaumālie aí ʻo muimui ʻi he hala mo e kakai halá. ʻOku mahuʻinga ke ke fanongo kiate kinautolu ʻoku nau ʻofa ʻiate koé peá ke fakakaukau ke fakaafeʻi e kakai lelei mo e Laumālie fakatouʻosi. ʻI heʻeku fai ʻa e ngaahi meʻá ni, ne u fakatokangaʻi ai ʻoku ou feohi mo ha kakai lelei ange he ʻaho kotoa pē—ʻa e ngaahi kaungāmeʻa ʻoku nau poupouʻi au ʻi heʻeku ngaahi fili ʻoku māʻoniʻoní.
Neongo pe ko e fē ʻa e feituʻu ʻokú ke ʻi ai ʻi he māmaní, te ke lava ʻo maʻu ha ngaahi kaungāmeʻa te nau tokoniʻi maʻu pē koe ʻi he taimi ʻoku faingataʻa ke ke fakahoko ai iá. Te ke lava ʻo maʻu ha ngaahi kaungāmeʻa ʻoku nau lava ʻo tokoni atu ke ke ikunaʻi e tuʻunga faingataʻa fakalaumālie te ke ala ʻi aí. ʻOku ʻi ai e mālohi ho kaungāmeʻá ʻiate koe ʻo mahulu hake ʻi he meʻa te ke fakakaukau ki aí, ko ia ai, fekumi ke feohi mo kinautolu ʻoku nau fili ki he totonú. Naʻá ku fakahoko ia pea naʻe liliu ai au mo hoku kahaʻú ʻo taʻengata.