Ha Taha Pē kae ʻIkai ko Ia!
Tā fakatātaaʻi ʻe Phil, i2i Illustration
‘I he taimi ne u fanongo ai ʻi he polokalama Kilisimasi ʻa e Siasí ko e “Fakamaama ʻa e Māmaní” pea mo e ʻaho ngāue tokoni fakamāmani lahí, ne u fakakaukau, “Ko ha fakakaukau fakaʻofoʻofa moʻoni ia. Te u fakahoko ia.”
ʻI ha ngaahi ʻaho kimuʻa ʻi he ʻaho ngāue tokoni fakamāmani lahí ʻi he ʻaho 1 ʻo Tīsemá, ne u maʻu ha fakakaukau ki he tokotaha ne fie maʻu ke u tokoniʻí. Tuaiekemo ne u fakakaukau, “Ha taha pē kae ʻikai ko ia!” Naʻe fakamamahiʻi lahi au ʻe he tokotahá ni ʻi ha ngaahi taʻu lahi, ka ko e lahi ange ʻeku fakakaukau ki hono hingoá, ko e lahi ange ia ʻeku ʻiloʻi ko ha ueʻi ia mei he Laumālié.
Naʻá ku talaange ki hoku husepānití ʻeku fakakaukaú, peá ne talamai ʻe lelei kiate au ke ngāue tokoni ki he tangatá ni. Ka naʻá ku kei ongoʻi tailiili ʻaupito ʻi he fakakaukau ko ia ke tokoniʻi iá. Naʻá ku ʻiloʻi he ʻikai te u lava ʻo fakahoko toko taha ʻeni, ko ia ai naʻá ku lotua ha mālohi pea mo ha taha ke ma ō. Ne faifai peá u fetuʻutaki ki he ongo faifekau sisitaá, pea naʻá na loto ke mau ō.
Naʻe hokosia e ʻaho 1 ʻo Tīsemá, pea naʻá ku fuʻu tailiili ʻaupito ʻo u ongoʻi tetetete lolotonga ʻeku fakaʻulí. Naʻa mau lotu fakataha ‘i heʻemau aʻu ki he fale nofoʻangá. Naʻá ku kiʻi fakamanava loloa peá u tukituki ʻi he matapaá. Naʻe fakaava mai ʻe he tangatá e matapaá, ka naʻe hangē neʻikai ke ne ʻiloʻi au. Naʻá ku ʻeke ange pe naʻá ne ʻiloʻi au. Naʻá ne fakakaukau ko ha taha pē au ʻi he kau faifekau sisitaá. Naʻá ne ʻohovale ʻi heʻeku fakahā ange au ki aí, ka naʻá ne fiefia ʻi heʻeku haʻu ʻo ʻaʻahi kiate iá. Naʻe hoko ai ha momeniti fakaʻaulolongo ʻi heʻeku talaange ko ha ʻaho ngāue tokoni fakamāmani lahi ʻeni, pea ne mau fie tokoniʻi ia ʻi ha founga pē te mau lavá.
Naʻá ku vahe ha ngaahi ngāue ki he ongo faifekaú, pea ne mau kamata leva hono fakamaʻa hono fale nofoʻangá. Hili ha lau houa, naʻe ʻosi ʻemau ngāué pea mau mavahe leva. Naʻá ku toki fakatokangaʻi ʻi heʻeku fakaʻuli foki ki ʻapí naʻá ku kata mo fiefia. Pea ne toki tō mamafa ia kiate au: kuo toʻo kotoa ʻe he Tamai Hēvaní ʻa ʻeku mamahí, loto-mamahí, loto-kafó, mo e loto-tāngiá. Naʻe mole atu ia! Pea ne u tauʻatāina mei he ʻloto mamahi kotoa naʻá ku fāinga mo ia ʻi ha ngaahi taʻu lahi. Naʻe tāpuekina au ʻe he Tamai Hēvaní ʻaki ʻa e mālohi ke faifai peá u fakamolemoleʻi ʻa e tokotahá ni. Naʻe fakaofo ʻa e fiefia ne u ongoʻí.
‘Oku ou matuʻaki houngaʻia ne u muimui ki he ueʻi ke tokoniʻi e tangatá ni. Naʻe ʻafioʻi ʻe heʻeku Tamai Hēvani ʻofá naʻe fie maʻu ke u aʻusia ʻeni kae lava ke u tupulaki pea hoko ʻo hangē ko e tokotaha ʻokú Ne finangalo ke u aʻusiá.