Ko e Foʻi Manupuna Pepa Lanu Kulokulá
ʻOku nofo ʻa e tokotaha naʻá ne faʻú ʻi ʻAitahō, USA.
Ko e meʻa pē naʻe fakakaukau ki ai ʻa ʻIví ko e fiefia ʻa hono kaungāmeʻá he ʻikai te ne ʻinasi aí.
“Naʻá ku mahaki, pea naʻa mou ʻaʻahi mai kiate au” (Mātiu 25:36).
Naʻe saiʻia ʻa ‘Ivi ʻi he taimi Kilisimasí. Ne fakaʻaongaʻi ʻe heʻene kalasi ʻi he akó ʻa e pongipongí ke valivali ha ngaahi kaati mo fanongo ki ha ngaahi hiva fakafiefia.
Naʻe pehē ʻe Mīsisi Kuluni, “Ko e taimi laukongá ʻeni. “Pea kapau ʻe ʻosi kotoa hoʻo laukongá he ʻahó ni mo ʻapongipongi, he ʻikai leva ke ʻi ai haʻo ngāue fakaako ke fai mei ʻapi lolotonga e mālōloó.”
Naʻe mavava fiefia kotoa e tamaiki ʻi he kalasi ʻa ʻIví. Ka naʻe ‘ikai ke fuʻu ongoʻi fiefia ʻa ʻIvi. Naʻá ne kiʻi tetetete ʻi heʻene toʻo hake ʻene tohí ke laú. Naʻá ne ongoʻi mokosia ʻaupito pea mamahi hono foʻi mongá. Naʻe vevela hono fofonga ʻi heʻene sio fakamamaʻu ki he ngaahi lea ʻi he pēsí. ‘I he tuku ʻa e akó, naʻe ongoʻi foki ʻe ʻIvi ne langa hono keté.
Faifai pea kuo taimi ke lue ki ʻapi mo Timi mo Uilemā, ko hono tuongaʻané mo e tokouá. Ne nau faʻa fiefia ʻi he hala ki ʻapí. Naʻa nau faʻa vaʻinga taufetuli pe faʻu ha kiʻi siana ʻaki e sinoú. Ka ko e ʻaho ko ʻení, ko e meʻa pē naʻe fie maʻu ʻe ʻIví ke ne aʻu ki ʻapi ʻo tokoto.
‘I he taimi ne aʻu ai ʻa ʻIvi ki ʻapí, naʻe ala ʻa Mama ki hono laʻé.
Naʻá ne pehē, “ʻOkú ke mofi. “‘Oku fie maʻu ke ke inu e vaí ke lahi pea mālōlō.”
Naʻe kaka hake ʻa ʻIvi ki he mohengá peá ne tō ʻo mohe he taimi pē ko iá. ʻI he pongipongi hono hokó, naʻe femoʻuekina e tokotaha kotoa ʻi hono fāmilí ʻi he teuteu ki he ʻaho ko iá. Ka naʻe pehē ʻe Mama naʻe fuʻu puke ʻa ʻIvi ke ʻalu ʻo ako.
Naʻe manatuʻi leva ʻe ʻIvi ha meʻa naʻá ne ongoʻi loto-mamahi ai. Ko e ʻahó ni ʻe fai ai e paati Kilisimasi ʻa e akó! Naʻe totonu ke nau fakaʻosi ʻenau ngāue ʻātí mo hiva ha ngaahi hiva pea kai sapa. Naʻe pau ke ne ʻalu!
Ka naʻe ‘ikai liliu e fakakaukau ʻa Mamá.
Naʻá ne pehē, “ʻE ʻofaʻanga, ʻoku ou kole fakamolemole atu ʻi hoʻo nofo he pātí. “Ka ‘oku mahuʻinga ange hoʻo moʻui leleí.”
Ne kamata ke tangi ʻa ʻIvi. Naʻe feinga ʻa Mama ke tokoni ke ne ongoʻi sai ʻaki ha supo ifo. Ka ko e meʻa pē naʻe fakakaukau ki ai ʻa ʻIví ko e fiefia ʻa hono kaungāmeʻá he ʻikai te ne ʻinasi aí.
‘I he hoʻatā efiafí, naʻe foki mai ʻa Timi mo Uilemā mei he akó. Naʻe kulokula hona kouʻahé he vaʻinga ʻi he sinoú.
Naʻe pehē ʻe Uilemā, “Naʻe fakalata ʻaupito e paati ʻa e akó. “Naʻa mau ngaahi ha fanga foʻi manupuna pepa lanu kulokula ke tautau ʻi ʻapi.”
Naʻe toʻo hake ʻe Timi ha meʻa mei hono kató.
“Pea ko ē—naʻe ʻomai ʻe Mīsisi Kuluni ha meʻaʻofa makehe maʻau. Ke ke lava foki ʻo ngaohi mo ha foʻi manupuna pepa lanu kulokula!”
Naʻe malimali ‘a ʻIvi. “Te ke lava ʻo fakahinohino mai hono ʻaí?”
Naʻe fakahinohino ange ʻe Timi mo Uilemā kia ʻIvi e founga ke kosi ʻi he laine motumotú pea pelu ke tonú. Naʻá na tokoni ange ke nonoʻo e afó.
“Mama, sio ki he meʻa naʻá ku ngaohí!” Ko e lea ange ia ʻa ʻIví mo fakaʻaliʻali ange ʻene meʻa teuteu Kilisimasi foʻou ʻoku saiʻia taha aí.
Naʻe fakakaukau ‘a ʻIvi ki he angalelei ʻa Mīsisi Kuluni ʻo manatuʻi ia ʻi heʻene puké, mo e founga foki naʻe tokoniʻi ia ʻe Timi mo Uilemaá. Ko e taimí ni leva, ʻi he vakai ʻa ʻIvi ki heʻene foʻi manupuna pepa lanu kulokulá, te ne ongoʻi ʻoku ʻofaʻi lahi ia. ●
Ngaohi ha Foʻi Manupuna Pepa!
-
Kosi pea toʻo ʻa e peesi ko ʻení ʻo fakapipiki ki ha pepa kulokula. Hili iá pea kosiʻi ʻa e foʻi manupuná mo e ongo kapakaú.
-
Kosi fakalelei ha foʻi ava ʻi he laine motumotu he foʻi manupuná. Fakahū e ongo kapakaú ʻi he ongo foʻi avá.
-
Fakaava ʻi ʻolunga he ongo kapakaú pea fakahū ha ki foʻi afo ai ke tautau ʻaki.