Toko Taha mo Loto-houngaʻia ʻi he Kilisimasí
Tā fakatātaaʻi ‘e Daria Kirpach
ʻI heʻeku kei tupu haké, naʻe hoko e Kilisimasí ko e taimi maʻongoʻonga taha ʻo e taʻú kiate au—ʻo ʻikai koeʻuhí pē ko e ngaahi meʻaʻofá, ka koeʻuhí ko e Kilisimasí ko ha taimi ia ke feohi ai mo kinautolu naʻe mahuʻinga taha ʻi heʻeku moʻuí, ʻa hoku fāmilí.
Naʻe mahuʻinga ʻaupito ʻa e fāmilí kiate au, pea ʻi he fakalau mai ʻa e ngaahi taʻú, naʻe hoko maʻu pē e ngaahi tukufakaholo ʻi he Kilisimasí ko ha fiefia fakafāmili ʻa ia ʻoku lahi ai ha ngaahi meʻa ʻoku ou kei manatu melie ki ai.
Ka naʻe kehe ʻa e Kilisimasi ko ʻeni ne toki ʻosí. Naʻe ʻi ai haʻaku ngāue foʻou ʻa ia naʻe fie maʻu ke u folau ai ʻi he Kilisimasí. ʻi he aʻu ki he taimi ko ʻeni ʻi heʻeku moʻuí, ko e Kilisimasi pē ʻe ua naʻá ku mavahe ai mei hoku fāmilí—ʻa ia ne hoko lolotonga ʻeku ngāue fakafaifekaú. Naʻá ku ʻosi loto-mamahi mo taʻelata ʻoku teʻeki fai ʻeku folau fakangāué. Ne u fakakaukau ʻi he kotoa ʻo e ʻAho Kilisimasí, “Meʻa maumau moʻoni ko e ʻahó!” ʻOku ʻikai ha ngāue ʻe lava ke mahuʻinga peheni!
Ne u fakakaukau ke mamata ʻi ha foʻi faiva he TV ʻi hoku loki he hōtelé. Naʻe fakahaaʻi ʻe ha taha ʻo e kau ʻeti faivá ʻa e mahuʻinga ko ia ke fakafetaʻí. Naʻe ʻikai ko ha konga mahuʻinga ia ʻo e faivá, pe ko ha konga ne ongo fakaeloto, ka naʻe ongo moʻoni ia ki hoku lotó.
Naʻá ku fakatokangaʻi ʻi he momeniti ko iá kuo teʻeki ke u tūʻulutui ʻi he ʻAho Kilisimasí ke fakamālō ki he Tamai Hēvaní ʻi he meʻaʻofa ʻa Hono ʻAlo ko Sīsū Kalaisí. ʻI he ngaahi taʻu kotoa ne u fakamanatua ai e Kilisimasí, naʻá ku tokanga taha pē ki hoku fāmilí, ngaahi meʻaʻofá, mo e keimí. Neongo e ngaahi feinga lelei taha ʻeku ongomātuʻá mo e ongo kuí ke akoʻi aú, ka naʻe ʻikai pē ke u houngaʻia moʻoni ʻi he mahuʻinga fau ʻa e Fakamoʻuí ki he Kilisimasí. Ne mau lau fakafāmili ʻa e talanoa ki Hono ʻaloʻí ʻi he folofolá, ka naʻe ʻikai ke u teitei fakakaukau lahi ki he mahuʻinga hono ʻaloʻi Ia ʻi he Kilisimasí.
Ne u loʻimataʻia ‘i heʻeku lotu ki heʻeku Tamai Hēvaní. Naʻá ku fakamālō kiate Ia ko e feilaulau naʻá Ne fakahoko ke hifo mai Hono ʻAlo pē Taha ne Fakatupú ki he māmaní pea ki he moʻui feilaulau maʻongoʻonga mo angaʻofa ʻa Hono ʻAló. Naʻá ku kei loto-mamahi ʻi heʻeku toko taha pea mamaʻo mei hoku fāmilí ʻi he Kilisimasí, ka naʻe fakaʻatā ai ke akoʻi mai ʻe he Tamai Hēvaní ha meʻa mahuʻinga mahalo he ʻikai ke u teitei ako kapau ne u feohi mo hoku fāmilí: ko e Fakamoʻuí ʻa e ʻuhinga ʻoku ou lava ai ʻo maʻu ha fāmilí!
‘Oku ou houngaʻia naʻe ʻomi ʻe heʻeku toko taha ʻi he Kilisimasí ha kiʻi mahino lelei ange ki he meʻaʻofa ʻofa mo taʻefakangatangata ʻa e Tamai Hēvaní ko Hono ʻAló.