Mālō e Lelei mei Kolomupiá!
Malō e Lelei, ko Mako mo Paolo kimaua.
Kau mai ʻi heʻema ʻaʻahi ki Kolomupiá!
ʻOku tuʻu ʻa Kolomupia ʻi he fakatokelau ‘o ʻAmelika Tongá. ʻOku ʻi he fonua lea faka-Sipeni ko ʻení ha kakai ʻe toko 49 miliona nai, mo ha kāingalotu ʻe toko ua kilu ai ʻo e Siasí.
‘Oku ʻea māfana ʻa Kolomupia, pea lahi ai mo ha ʻakau mo e fanga monumanu kehekehe. Ko hono moʻoní, ʻoku lahi ange ai ha faʻahinga kehekehe ʻo e fanga manupuná ʻo laka hake ʻi ha toe fonua! Ko e tokolahi ‘o kinautolu ʻoku ʻikai lava ʻo maʻu ʻi ha toe feituʻu he māmaní, ʻo hangē ko e tanaka (tanager) fakaʻofoʻofa ko ʻení.
ʻOku kai ʻe he kiʻi taʻahine ko ʻení ha arepa, ko ha keke ifo ngaohi mei he mahoaʻa koané. ʻOku faʻa maʻu ia ʻe he kakai ʻi Kolomupiá ʻo kiki ʻaki e siisi mo e kakanoʻi manu.
Ko e ʻaho 7 ʻo Tīsemá ʻi Kolomupia ko e el Día de las Velitas ia (ko e ʻAho ʻo e Fanga Kiʻi Teʻelangó). ʻOku fakamāmaʻi ʻe he kakaí e halá ʻaki ha teʻelango ʻe lauafe ke kamata ʻaki e faʻahitaʻu ʻo e Kilisimasí.
‘Oku kakato ʻi he māhiná ni ʻa e taʻu ʻe taha talu mei hono fakatapui e Temipale Barranquilla Colombia.
Ko ha tā ʻeni ‘o e temipale foʻoú. ʻOku ʻi ai foki ha temipale ʻe taha ʻi Kolomupia, ʻi he kolomuʻa ʻo Pokotá.
Feʻiloaki mo ha ngaahi kaungāmeʻa mei Kolomupia!
“‘Oku ou ongoʻi monūʻia mo fiefia ke maʻu e ongoongoleleí ʻi heʻeku moʻuí. ‘Oku ou ʻilo ‘oku moʻui ʻa Sīsū Kalaisi pea ʻokú Ne ʻofa ʻiate kitautolu pea naʻe fakafoki mai ʻe he Palōfita ko Siosefa Sāmitá ʻa e Siasí ni. ʻOku ou houngaʻia ʻoku tau maʻu ha palōfita ʻokú ne tataki kitautolu.”
Kamila R., taʻu 10, Vale tela Kauka, Kolomupia
“‘Oku ou ʻilo ‘aki hoku lotó kotoa ʻoku moʻui ʻeku Tamai Hēvaní mo Sīsū Kalaisi pea ʻokú Na ʻofa ʻiate au. Naʻá Na foaki kia Siosefa Sāmita ʻa e fakahā ke liliu e Tohi ʻa Molomoná ke malava ʻo maʻu ʻe he tokotaha kotoa.”
Luisi V., taʻu 12, Vale tela Kauka, Kolomupia
Fakamālō atu ʻi hoʻo fie ʻaʻahi ki Kolomupia mo kimauá. Tau toki sio he taʻu foʻoú!