Ko e Maama ʻo Māmaní

Fai ‘e Palesiteni Henry B. Eyring

Tokoni Ua ʻi he Kau Palesitenisī ʻUluakí

Toʻo mei he fakataha lotu Faka-Kilisimasi ʻa e Kau Palesitenisī ʻUluakí ʻi he 2011.

Ko e māmá ko e taha ʻo e ngaahi fakaʻilonga fakaʻofoʻofa taha ʻo e ʻaloʻi ʻo Sīsū Kalaisí. ‘I he taimi naʻe ʻaloʻi ai ‘a Sīsuú, naʻá Ne ʻomi ha maama ki ha māmani fakapoʻuli.

Naʻe akoʻi ʻe he kau palōfitá ʻe hoko ʻa e māmá ko ha fakaʻilonga ʻo hono ʻaloʻi ʻo e Fakamoʻuí. ‘I ha ngaahi taʻu lahi kimuʻa pea ʻaloʻi ʻa Sīsuú, naʻe kikite ʻa Samuela ko e tangata Leimaná ʻo pehē:

“ʻE ʻi ai ʻa e ngaahi fuʻu maama lalahi ʻi he langí, ʻo aʻu ki he ʻikai ke ʻi ai ha fakapoʻuli ʻi he pō ki muʻa ʻi heʻene hāʻele maí, ʻo aʻu ki heʻene hā ki he tangatá ʻo hangē ko ha ʻaho.

“Pea vakai, ʻe hopo hake ha fetuʻu foʻou, ʻa ia ko ha fetuʻu kuo teʻeki ai ke mou mamata ki ai” (Hilamani 14:3, 5).

Naʻe tataki ‘e he fetuʻu ko ʻení ʻa e Kau Tangata Potó kia Sīsū ke nau hū kiate Ia. Naʻa nau ʻave kiate Ia ha ngaahi meʻaʻofa mahuʻinga ʻo e koula, laʻipeno mo e mula.

ʻOku ou fakamoʻoni ko Sīsū ʻa e Kalaisi Moʻuí. Te tau lava ʻo manatu kiate Ia pea feinga ʻaki hotau lotó kotoa ke ‘ofa ʻo hangē ko ʻEne ʻofá. Ko e laumālie ia ʻo e Kilisimasí. Ko e laumālie ia ʻo e fiefia moʻoni he ʻaho kotoa pē. ●

Muimui ʻi he Fetuʻú

‘I he taimi naʻe ʻaloʻi ai ‘a Sīsuú, naʻe muimui ʻa e Kau Tangata Potó ki he fetuʻú. Valivali e ngaahi fetuʻu ‘i laló ke tokoni ke ʻilo ʻe he Kau Tangata Potó ʻa Sīsū.