Te u fakapapauʻi fēfē pe te u ngāue fakafaifekau pe ʻikai?

Loto-Fiemālie ke Fehuʻi Fakamātoato

He ʻikai ke ngāue fakafaifekau ʻa e tokotaha kotoa, ka ko e meʻa ia ʻa e tokotaha kotoa ke ne fekumi fakamātoato pe ʻoku taau ke ne ngāue fakafaifekau! Ko e taimi ʻe niʻihi ʻoku ʻikai ke tau fie ʻalu, ko ia ai ʻoku ʻikai pē ke tau fehuʻi pe ʻoku tau fehuʻi pē kae ʻikai tuku ha faingamālie ki he Laumālié ke ne ʻomi moʻoni ʻa e talí. Kuo pau ke tau fehuʻi ʻi he loto-moʻoni! Kapau te ke maʻu hoʻo talí ʻo fakafou ʻi he fekumi fakamātoató, te ke maʻu ha nonga mo e loto-falala ʻi ha meʻa pē ʻe fakahā atu ʻe he ʻEikí ke ke fai—ke ke nofo pe ko hoʻo ʻalu.

ʻAli B., taʻu 22, ʻIutā, USA

Fakatomala

Ko e taha ‘o e ngaahi meʻa naʻá ne tokoniʻi au ke u fili ke ngāue fakafaifekaú ko ʻeku ako mo foua e fakatomala moʻoní. ‘I heʻeku ako ʻo kau ki he Fakalelei ‘a e Fakamoʻuí pea fakaʻaongaʻi e meʻa naʻá ku akó ʻi heʻeku moʻuí, naʻá ku ongoʻi ha nonga naʻe ʻikai lava ʻo fakamatalaʻi. ‘I heʻeku ongoʻi ʻení, naʻá ku loto ke ongoʻi ʻe he niʻihi kehé ʻa e nonga tatau.

ʻEletā Berdejo, taʻu 21, ʻAlekuipa, Pelū

Fetuʻutaki mo e ‘Eikí

‘E lava ʻe he Tamai Hēvaní ʻo ʻoatu hoʻo talí ʻo fakafou ʻi he ngaahi folofolá, ha pōpoaki ʻa ha Taki Māʻolunga, pe naʻa mo ha fakamoʻoni pē ʻa ha tokotaha kehe. Ko ia te ke lava ʻo maʻu ha ueʻi fakalaumālie mei hoʻo fetuʻutaki pē mo e ʻEikí.

Samuela H., taʻu 14, ʻIutā, USA

Manatuʻi Te Ne ʻOatu ha Tali

Kimuʻa peá u haʻu ʻo ngāue fakafaifekaú, naʻá ku fefaʻuhi ke ʻiloʻi pe te u ʻalu pe ʻikai. Naʻe faifai peá u fakakaukau ke fehuʻi ki he Tamai Hēvaní, ʻa ia ʻokú Ne ʻafioʻi moʻoni e meʻa kotoa ʻoku tau fouá mo ʻafioʻi pe ʻoku fie maʻu ke tau ngāue fakafaifekau. Naʻá ku maʻu ha fakapapau ʻo fakafou ʻi he lotú, naʻe fie maʻu ke u ʻalu. ʻOku ou ʻilo ʻoku tali ʻe he Tamai Hēvaní ʻa e ngaahi lotú. Hū kiate Ia mo hoʻo ngaahi fehuʻí, pea te Ne tali mai ʻo fakatatau ki hoʻo tuí pea mo Hono finangaló mo e taimí.

Sisitā Terpend, taʻu 21, Misiona Jamaica Kingston

Vakai ki Ho Fāmilí mo e Tāpuaki Fakapēteliaké

Ne tokoniʻi au ʻe hoku fāmilí mo ʻeku tāpuaki fakapēteliaké ke u fai ʻa e filí. ‘Oku lolotonga ngāue fakafaifekau hoku tokouá, pea kuo ueʻi au ʻe heʻene sīpingá mo e fakamoʻoni ki he ngāue fakafaifekaú. Kuo fakaʻau foki ke mālohi ange ʻeku holi ke ngāué ʻi he taimi naʻá ku maʻu ai hoku tāpuaki fakapēteliaké, ʻa ia ʻoku pehē ai te u lava ʻo vahevahe ʻa e ongoongoleleí mo e niʻihi kehé.

Suliana P., taʻu 16, Nevata, USA