Siʻi Ngaahi Mātuʻa,

ʻOku tau fakamanatua e māhiná ni ʻa hono ʻaloʻi ʻo Sīsū Kalaisí. Ko Ia ʻa e Maama ʻo Māmaní, ko hotau Tauhi-sipi Leleí. ʻOku mau ʻamanaki ʻe tokoni ʻa e ngaahi peesi ko ʻeni ʻo e Kaumeʻá ke manatuʻi Ia ʻe homou fāmilí ʻi he māhiná kakato:

• Ko ha pōpōaki meia Palesiteni ʻAealingi (peesi K2)

• Ko ha talanoa fekauʻaki mo e pēpē valevale ko Sīsuú (peesi K20)

• Ko ha talanoa fekauʻaki mo e ngaahi feituʻu ne nofo ai ʻa Sīsuú (peesi K4)

• Ngaahi ʻekitivitī mo e ngāue fakameaʻa (peesi K3, K6, K9)

• Ngaahi peesi valivali (peesi K12 mo e K23)

• Ko ha foʻi hiva Kilisimasi (peesi K7)

ʻE lava nai ʻe hoʻo fānaú ʻo kumi e ngaahi taimi kotoa ʻoku hā ai e ngaahi lea Sīsū, Kalaisi, pe Kilisimasi ʻi he makasiní? Te ke lava ʻo tokoni ange ke nau tohi “ʻOku ou ʻofa ʻia Sīsū koeʻuhí …” pea tā valivali pe tohi leva ʻa e meʻa ʻoku nau ʻofa ai ʻiate Iá.

ʻOku mau ʻofa atu!

Ko e Kaumeʻá

Founga ke ʻOatu Ai e Tā Valivali pe Aʻusia Hoʻo Kiʻi Tamá ki he Liahoná

ʻAlu ki he liahona.ChurchofJesusChrist.org pea lomiʻi ʻi he “Submit an Article pe Feedback.” Pe ʻīmeili ia ki he liahona.ChurchofJesusChrist.org fakataha mo e hingoa ʻo e fānaú, taʻu motuʻá, kolo ʻoku nofo aí, mo e fakamatala fakangofua ko ʻení: “Ko au, [fakahū ho hingoá], ʻoku ou fakangofua e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke fakaʻaongaʻi e ngāue ʻeku fānaú ʻi he ʻū makasini ʻa e Siasí, ʻi he ʻū uepisaiti ʻa e Siasí, mo e mītia fakasōsialé.” ‘Oku ʻikai ke mau lava ‘o tatali ke fanongo meiate koe!