Pōpōaki ‘a e kau taki Fakaʻēliá
Ngāue Fakaetauhi ʻi he Faʻahitaʻu Kotoa Pē
ʻOku tau toe aʻu mai ʻeni ki he faʻahitaʻu kilisimasí. ʻOku kāpui ʻe he ngaahi meʻa teuteu ngingilá mo e maama takemokemó e ngaahi ʻakau lanu matá, ongona e ngaahi hiva Kilisimasí ʻi he ngaluʻeá, feʻefiʻefihi ʻa e ʻū falekoloá mo e senitā faiʻanga fakataú ʻi he kakai ʻoku hā ngali fiefia ʻi heʻenau ʻamanaki atu ki ha ʻAho Kilisimasi fakafiefia. Ko e ngaahi ʻaho eni ʻoku faʻu ai ha ngaahi manatu pea ko ia ʻoku ou kiʻi taimi ai ke fakalaulauloto pe ko e hā ha ngaahi manatu te u tokoni ke faʻu maʻanautolu ʻoku mau feohí. Kuo pau ke nau mahulu ange ʻi ha meʻa vaʻinga pelesitiki, sote foʻou, tohi talanoa mālie pe ko ha meʻakai manakoa. Ko e ngaahi manatu tuʻuloá ʻoku nau ueʻi ho laumālié mo e laumālie ʻo e niʻihi kehé.
ʻI heʻeku ngaahi fefolauʻaki ʻi he Pasifikí, kuó u ongoʻi ʻa e feinga ha niʻihi tokolahi ke ngaohi ʻa e ʻaho kotoa pē ko ha ʻAho Kilisimasi. Kuó u mamata ki ha kau mēmipa ʻo e Siasí ʻoku nau tānaki atu ha fiefia ki he moʻui ʻa e niʻihi kehé ʻi heʻenau ngāue fakaetauhi kiate kinautolu ʻi ha founga māʻolunga mo māʻoniʻoni angé. ʻI hono ngaohi ha ngaahi meʻatokoni, kosi ha ngaahi loto ʻataʻatā musie, puke ʻo ha ngaahi nima, mo hono ʻoatu ha ngaahi fakapapau pea ʻi heʻene peheé ne tāpuekina ai ha ngaahi moʻui. ʻI he faʻahitaʻu ko eni ʻo e ngāue tokoní, ʻoku lelei ke tau manatu ki he akonaki ʻa ʻEletā Tieta F. ʻUkitofá ʻa ia naʻá ne akoʻi kitautolu ha ngaahi tefitoʻi moʻoni mahinongofua fekauʻaki mo e ngāue fakaetauhi ki he niʻihi kehé ʻi he faʻahitaʻu kotoa pē. ʻOku ʻi lalo ha ngaahi tefitoʻi moʻoni ʻe nima kuo nau ueʻi lahi kiate au:
1. Ako fekauʻaki mo e niʻihi ʻokú ke ngāue fakaetauhi ki aí.
Naʻe akonaki ʻa Palesiteni ‘Ēsela Tafu Penisoni ʻo pehē, “ʻE ʻikai lava ke ke ngāue tokoni lelei kiate kinautolu ʻoku ʻikai ke ke ʻiloʻi leleí.” Kapau ʻoku teʻeki ke ke ʻiloʻi kinautolu kuo uiuiʻi koe ke ke ngāue fakatauhi ki aí, ko e faʻahitaʻu lelei taha eni ki aí. Kapau ʻokú ke pehē kuó ke ʻiloʻi lelei kinautolu, toe feinga ke ke toe ʻiloʻi lelei ange kinautolu.
2. Tuku ha taimi ke feohi ai.
ʻOku fie maʻu ha taimi ke fakalakalaka ai ha vā fetuʻutaki ko ia ʻaʻahi maʻu pē kiate kinautolu kuo uiuiʻi koe ke ke ngāue fakaetauhi ki aí. Ngāue ʻaki ha faʻahinga founga pē ʻoku ʻuhingamālié—hangē ko e ʻīmeilí, Facebook, Instagram, Twitter, Skype, tā telefoní, pe ko hono ʻave ha kaati ke kei fai pē ha fetuʻutaki. ʻOku ʻikai fie maʻu ke fuoloa ʻa e fetuʻutaki fakahangatonú, ka ʻoku fuʻu fie maʻu ke fai ia ʻi he loto-moʻoni.
3. Fetuʻutaki ʻaki e tokanga.
ʻE fie maʻu ʻa e fevahevaheʻaki ʻo e ngaahi ongó, tuí, taumuʻá, mo e hohaʻá ke langa ʻaki ha ngaahi vā fetuʻutaki ʻoku mahuʻingamālié. ʻI hono fevahevahe ʻaki ʻo e ngaahi meʻa ne hoko fakaʻahó mo e ngaahi faingataʻa ʻo e moʻuí ʻi hono tataki ʻe he Laumālié, ʻoku tupulaki ʻiate kitautolu ʻa e fehoungaʻiaʻakí.
4. Ko hoʻo fakafanongó ko e konga mahuʻinga ia hoʻo fakahaaʻi ʻokú ke tokanga.
Ko e taimi ʻokú ke fakafanongo fakalelei aí, ʻoku lahi ange ai ho faingamālie ke tokoniʻi e niʻihi kehé ke nau haʻu kia Kalaisi. ʻI he tupulaki hoʻo mahino mo e ʻilo ki heʻenau ngaahi fie maʻú, te nau ongoʻi ʻoku ʻofaʻi, maʻu e mahinó, mo nau malu.
5. Ngāue Tokoni
ʻI he taimi ʻoku ongoʻi ai ʻe he niʻihi ʻoku tau ngāue fakaetauhi ki aí ʻetau ʻofa moʻoní ʻi heʻetau ngaahi ngāue tokoní, ʻe malava ke fakavaivaiʻi e ngaahi lotó pea fakatupulaki e ʻofá mo e falalá. Ne u houngaʻia ʻaupito ʻi he fanga kiʻi ngāue tokoni iiki ko ia ne fakahoko mai maʻakú. Neongo ne ngali siʻisiʻi ia ki he tokotaha foakí, ka ʻi heʻeku maʻu iá ne langaki hake mo fakamālohia au. ʻI hono ʻomai ʻe heʻetau ngāue tokoní ʻa e niʻihi kehé ki he ngaahi ouau ʻo e lakanga fakataulaʻeikí, ʻoku tau faitāpuekina ʻenau moʻuí.
ʻI he vahe uongofulu mā nima ʻo Mātiú ʻoku tau lau:
“Pea ʻe toki pehē ʻe he Tuʻí kiate kinautolu ʻi hono nima toʻomataʻú, Haʻu, ʻa kimoutolu kuo monūʻia ʻi heʻeku Tamaí, ʻo maʻu ʻa e puleʻanga kuo teu moʻomoutolu talu mei he kamataʻanga ʻo māmaní:
“He naʻá ku fiekaia, pea naʻa mou foaki ʻa e meʻakai kiate au: Naʻá ku fieinua, pea naʻa mou foaki ʻa e inu kiate au: Ko e muli au, pea naʻa mou fakaafeʻi au:
“Telefua, pea naʻa mou fakakofuʻi au: Naʻá ku mahaki, pea naʻa mou ʻaʻahi mai kiate au: Naʻá ku ʻi he fale fakapōpulá, pea naʻa mou haʻu kiate au.
“Pea ʻe toki lea ʻa e māʻoniʻoní, ʻo pehē ange kiate ia, ʻEiki, naʻa mau mamata kiate koe ʻanefē ʻokú ke fiekaia, pea mau fafangaʻi koe? pea fieinua, pea mau foaki ʻa e inu kiate koe?
“Naʻa mau mamata kiate koe ʻanefē ko e muli, pea mau fakaafeʻi koe? pe telefua, pea mau fakakofuʻi koe?
“Pea naʻa mau mamata kiate koe ʻanefē ʻokú ke mahaki, pe ʻi he fale fakapōpulá, pea mau ʻalu atu kiate koe?
“Pea ʻe lea ʻa e Tuʻí,ʻo pehē ange kiate kinautolu, Ko ʻeku tala moʻoni atu kiate kimoutolu, ko e meʻa ʻi hoʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate au” (Mātiú 25:34–40).
Ko ʻeku lotú ʻi he faʻahitaʻu fakafiefia ko ení ke tau manatuʻi ʻi heʻetau vakavakai holó ʻoku ʻi ai ʻetau ngaahi fie maʻu pea ʻe feau e ngaahi fie maʻu ko iá ʻi heʻetau hoko ko e kau ngāue fakaetauhi moʻoni ki he niʻihi kehé. ʻIkai ko e moʻoni ko e lēsoni mahuʻinga ʻa hotau Huhuʻí ʻi he faʻahitaʻu Kilisimasi ko ení ko hono foaki kitautolú he naʻá Ne foaki ʻEne moʻuí kae lava ke tau maʻu ʻa e moʻui taʻengatá.
ʻOfa ke maʻu ʻe he tokotaha kotoa ha Kilisimasi Fiefia.