Ko e Meʻaʻofa Lelei Taha Te u Lava ʻo Foakí
‘I he taimi ne u kamata ʻalu ai mo hoku fāmilí ki he Siasi ʻo Sīsū Kalaisi ʻo e Kau Máʻoniʻoni ʻi he Ngaahi ʻAho Kimuí Ní, naʻá ku ongoʻi ne tataki kimautolu ʻe heʻeku faʻeé ki ai.
Naʻe mate fakafokitā e Fineʻeikí ʻi he ʻAho Kilisimasi he taʻu ʻe ua kimuʻá. Ko ha tokotaha muimui faivelenga mo loto-fakatōkilalo ia ʻo Sīsū Kalaisi, ka naʻe teʻeki ke ne ʻilo ki he ongoongolelei kuo fakafoki maí. Hili ha māhina ʻe 11 e ʻilo kau ki he Siasí, naʻá ku papitaiso, mo hoku husepāniti ko Nāvitá, mo ʻeku tama fefine ko Ketí ʻi he ʻaho Kilisimasí. Ko e meʻa ko ia naʻe hoko ko ha ʻaho fakamamahi koeʻuhí ko e pekia ʻeku faʻeé, ʻe hoko leva ia ko ha ʻaho fakafiefia ki hoku fāmilí koeʻuhí ko ʻemau moʻui foʻou ʻi he ongoongoleleí.
Naʻe tokolahi ʻa e kakai ne kau mai ʻi homau papitaisó. Naʻá ku ʻohovale ke vakai ki ha kakai ʻe toko 100 tupu ʻi ai ʻi he 10:00 a.m. ʻi he pongipongi Kilisimasí! Ne mau ongoʻi ne ʻofaʻi lahi kimautolu.
Kimuʻa pea mau papitaisó, naʻe tokoni mai e ai faleʻi fakasiteiki ki he temipalé mo e hisitōlia fakafāmilí ke teuteuʻi e hingoa ʻeku faʻeé mo e ngaahi hingoa ʻa ha ngaahi kui kehe kuo nau pekia, ke ʻave ki he temipalé ke papitaiso.
Hili ha ʻaho ʻe uofulu mā nima mei heʻemau papitaisó, ʻi he ʻaho 19 ʻo Sānuali 2018, ko e ʻaho fāʻeleʻi ia ʻeku faʻeé, ne mau fakahoko ʻemau fuofua fononga ki he Temipale Newport Beach California. Naʻá ku tailiili pea ʻikai ʻiloʻi e meʻa ke ʻamanaki ki aí, ka naʻá ku hū ki he temipalé pea ongoʻi matuʻaki nonga ʻaupito. Ne ʻikai tatau ia mo ha toe feituʻu kuó u hū ai. Ne fakataha mai ʻemau kulupú ki he faiʻanga papitaisó, ʻa ia naʻe fakamatalaʻi ai ʻe he palesiteni temipalé ʻa e mahuʻinga ʻo e papitaiso maʻá e kau pekiá pea mo e tāpuaki ʻokú ne ʻomí. Naʻá ku tangi ʻi he fiefia, ʻi he fakakaukau ki he founga ʻe tāpuekina ai homau fāmilí ʻi he ngaahi papitaiso ko ʻení.
Hili hono papitaiso ‘a Nāvita maʻa ha niʻihi ʻo e kau mēmipa tangata hoku fāmilí, naʻá ne papitaiso au ke fakafofongaʻi ha niʻihi ʻo e kau mēmipa fefine ʻi he fāmilí. Ko e tokotaha ne u fuofua papitaiso ki aí ko ʻeku faʻē ʻofeiná. Naʻá ku tangi ʻi he taimi ne u fanongo ai ki he ngaahi lea, “ʻa ia kuo pekiá.” ʻI he fanongo ki aí, naʻe fakamahino ai kuó ne pekia moʻoni pea naʻe fakamamahi ia. Ka naʻá ku fakakaukau, ko e hā mo ha toe meʻaʻofa te u lava ʻo foaki ki heʻeku faʻeé ʻi hono ʻaho fāʻeleʻí ʻe maʻongoʻonga ange ʻi he meʻaʻofa ʻo e papitaiso ʻi he temipalé?
‘Oku ou hanganaki atu ki ha ngaahi fononga lahi ange ki he temipalé. ‘Oku ou houngaʻia ke ʻiloʻi te u lava ʻo tokoni ke foaki e ngaahi tāpuakí kiate kinautolu kuo nau mamaʻo atú, ʻo fakafou ʻi he ngaahi ouau ʻo e temipalé. Ko ha meʻaʻofa fakaʻofoʻofa moʻoni ia!