Kakai Lalahi Kei Talavoú
ʻOku ʻIkai Ke ke Tuenoa—Tui mai Kiate Au
Laʻitā ʻo e fefiné mei he Getty Images
‘I heʻeku hoko ko ha tokotaha lahi kei talavoú, ne u pehē kuo ʻosi mahino kotoa kiate au ʻa e taʻelatá. Naʻe lahi ʻeku fehikitaki holo ʻi heʻeku tupu haké, ko ia naʻe lahi ʻeku aʻusia ʻi hono tuku e meʻa naʻá ku fiemālie aí ka u fakakaungāmeʻá. Pea ‘i heʻeku mali mo e tangata angalelei taha kuó u ʻiló, naʻá ku ʻiloʻi ai he ʻikai ke u toe ongoʻi tuenoa, ʻikai ko ia?
Hala ia.
ʻOku pau ke hoko ʻa e ongoʻi tuenoa ʻi he tuʻunga fakamatuʻotuʻá, neongo kapau ʻoku taimi nounou pē. ‘Oku tau fuʻu femoʻuekina ʻi he ngaahi meʻa lahi ʻoku fie maʻu ke tau faí. ʻOku ʻi ai hotau ngaahi fatongia foʻou: tokotaha ako, hoa mali, tokotaha ngāue, pe mātuʻa. ‘Oku tau hiki mamaʻo mei ʻapi mo e fāmilí. ‘Oku tau fehangahangai mo ha ngaahi fili lalahi—pea makehe. ‘Ikai ngata aí, ʻoku kei malava pē ke tau fepaki mo e ngaahi faingataʻa fakaʻaho mo fakatuʻupakē ʻo e moʻuí. ʻE lava ke tātānaki kotoa e ngaahi meʻá ni ʻo hoko ai e taʻelatá ko e ongo angamaheni taha ʻoku maʻu ʻe he kakai lalahi kei talavoú he ʻaho ní. Meʻamālié, ʻoku ʻi ai ha ngaahi founga ke fakafepakiʻi ʻaki e ongoʻi tuenoá ni, pea ʻoku fekauʻaki kotoa e konga ko ʻení mo ia.
‘Oku vahevahe ʻe Sila ʻi he peesi 44 ʻa e founga naʻe tokoni ai ʻene kau ki he Siasí ke ne ikunaʻi ʻene ongoʻi tuenoá. ʻOku akoʻi mai ʻe Minitī ʻi he peesi 48 ʻa e founga te tau lava ʻo maʻu pea fakamahuʻingaʻi ai e kaungāmeʻá ʻo hangē ko ia ne fai ʻe Kalaisí. Pea ‘i he ngaahi fakamatala fakakomipiutá, ʻoku fakamatalaʻi ʻe Pela ʻa e ngaahi ola lelei te tau lava ʻo maʻu mei he ngaahi kaungāmeʻa leleí, pea ʻoku ou fai ai ha fanga kiʻi tokoni kiate kinautolu ʻoku tuenoa ʻi heʻenau mamaʻo mei he niʻihi ʻoku nau ʻofa aí lolotonga e faʻahitaʻu Kilisimasí.
‘Oku ʻi ai ha ngaahi founga ke ikunaʻi ʻaki e ongoʻi taʻelatá—pe ko e ʻalu ʻo kumi ha ngaahi kaungāmeʻa foʻou, fokotuʻu ha ngaahi fehokotaki fakasōsiale moʻoni he ʻaho takitaha, pe ko hono fakatupulaki ha vā fetuʻutaki vāofi ange mo e Fakamoʻuí. ʻI heʻetau ʻiloʻi ko ia ʻoku feʻao maʻu pē ʻa Sīsū Kalaisi mo kitautolú, ʻi heʻetau vakai ko ia ʻoku ʻikai ke tau teitei tuenoa moʻoní, te tau maʻu ai ʻa e mālohi ke ʻalu atu, ʻo fokotuʻu ha ngaahi vā fetuʻutaki lelei, pea tāpuekina e moʻui ʻa kinautolu ʻoku tau feohí.
Mei ha taha ‘oku tui te ke lavaʻi ia,
Alexandra Palmer