‘Oku Tau Maʻu Fēfē ʻa e Fiefiá mo e Nēkeneká?

Kiate au mo ha niʻihi kehe tokolahi, ‘oku faʻa ʻi ai ha taimi ʻoku faingataʻa ai ke tau ongoʻi fiefia pe nēkeneka—naʻa mo e hili ʻetau fili ke moʻui angamāʻoniʻoní. Kuó u faʻa fifili ʻo pehē, “Kapau ‘oku ou tauhi e ngaahi fekaú, ko e hā ʻoku faingataʻa ai ke u ongoʻi fiefiá?”

‘E lava ʻe ha ngaahi meʻa lahi ʻo maumauʻi ʻetau fiefiá pe ongoʻi leleí, hangē ko e mole ʻa e ngāue maʻuʻanga moʻuí, pekia ha ‘ofaʻanga, pe uesia fakafokifā e moʻui lelei fakaesinó pe/mo e fakaʻatamaí. Ka ʻoku ou tui ʻe tatau ai pē pe ko e hā e faingataʻa ʻokú ke fepaki mo iá, ʻoku hanganaki mai mei muʻa ha ngaahi ʻaho lelei ange! ‘I heʻeku fakamatala, “Ko e Fekumi ki he Fiefiá,” ‘i he peesi 24, ʻoku ou vahevahe ha fakakaukau ‘o e ongoongoleleí fakataha mo e fakatotolo fakasaienisi ʻi he taumuʻa ke tulifua ki he fiefiá, tautautefito ki he taimi ‘oku ngali taukakapa aí.

ʻOku akoʻi mai ʻe he fakamatala ʻa ‘Eletā Tēvita A. Petinā ʻi he peesi 18, “Sīsū Kalaisi: Ko e Maʻuʻanga Tokoni ʻo e Fiefia Tuʻuloá,” fekauʻaki mo e fiefia moʻoni mo tuʻuloá. ʻI he fonu ʻene fakamatalá ʻi he ngaahi fakakaukau fakafolofola mo fakaepalōfitá, ʻoku lahi ai ha fakahinohino mahuʻinga ki heʻetau lelei taʻengatá pea pehē ki hono maʻu e fiefiá ‘i he moʻui fakamatelié.

ʻOku pehē ʻe he folofolá, “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá” (2 Nīfai 2:25). Hili e ngaahi pō fakapoʻuli tahá, ʻoku hoko mai maʻu pē ʻa e māmá ʻi he pongipongí.

David Dickson

Ngaahi Makasini ʻa e Siasí