Ko e ʻĪmisi ʻo e ʻAloʻí ne Maumaú
Tā Fakatātā ʻe Rose Datoc Dall
‘I heʻeku kei siʻí, ne ʻikai ke u faʻa tatali ki he Kilisimasí. ‘I he taimi naʻe ʻomi ai ʻe he Fineʻeikí e ngaahi puha meʻa teuteú, naʻá ku ʻiloʻi mo hoku fanga tuongaʻane ʻe toko nimá kuo kamata ʻa e Kilisimasí. Te mau fokotuʻu fakafāmili maʻu pē ʻa e fuʻu ʻakaú. ‘Oku ou kei manatuʻi pē e ngaahi meʻa teuteu ne ngaohi nimá mo e fanga foʻi pulu sioʻata ngingila fakalanulanú.
Ka ko e konga ʻe taha ʻo e teuteú, naʻe fakahoko pē ia ʻe he Fineʻeikí. Naʻe ngaohi ʻe heʻeku kui fefiné ha ʻīmisi maka hinehina fakaʻofoʻofa ʻo e ʻaloʻí maʻá e Fineʻeikí. Ko e taʻu kotoa pē, ʻe fokotuʻu ʻe he Fineʻeikí e ʻīmisi ʻo e ʻaloʻí ʻi he funga laupapa ʻi loto falé. Naʻá ku manako ke tangutu pea mamata ki heʻene fokotuʻutuʻu tahataha ʻa e fanga kiʻi ʻīmisí. Naʻá ne fokotuʻu ki he ʻīmisi takitaha ha ki foʻi maama hinehina mei ha sisi ʻuhila. Naʻá ne fakapipiki e mui ʻe taha ʻo e sisi ʻuhilá ki he funga laupapá ke tuʻu maʻu, pea palaki leva ia ki ha palaki ʻi mui ʻi he sea he tulikí. ʻI he taimi naʻe fakaulo ai e funga laupapá, naʻe fakaʻofoʻofa ʻaupito ia!
‘I ha pō ʻe taha, ofi ki he Kilisimasí, naʻe kiʻi makaka hoku fanga tuongaʻané. Naʻe tuli ‘e he tamaiki lalahí hoku kiʻi tuongaʻane siʻisiʻí. Lolotonga ʻenau taufetulí, naʻá ne toitoi ʻi mui ʻi he sea ofi ki he funga laupapá. ʻI he taimi naʻe maʻu ai ia hoku fanga tuongaʻané, naʻá ne fakavave ke hola ka naʻe fihia hono vaʻé ʻi he sisi ʻuhila ki he ʻīmisi ʻo e ʻaloʻí. Naʻe ‘ikai lavaʻi ʻe he fanga kiʻi meʻi tepí ʻo taʻofi ʻi he fusi hono kauvaʻé. Naʻe ngangana hifo e ʻīmisi ʻo e ʻaloʻí mei he funga laupapá ki lalo ki he piliki kulokulá ʻo mafahifahi.
Naʻe fakatovave mai ʻa e Fineʻeikí ki he loto falé. ‘I heʻene vakai ki he meʻa naʻe hokó, naʻá ne fākafoa peá ne foki ki hono lokí. Naʻá ne ʻiloʻi ko ha fehalaaki, ka kuo ʻosi hoko ʻa e maumaú.
Hili ʻemau tokoto kotoa ki he mohengá ʻi he pō ko iá, naʻe toʻo mai ʻe he Tangataʻeikí e meʻa tafi efú mo e taufalé pea tafi fakalelei ʻaki e fanga kiʻi konga ne maumaú. Naʻá ne ʻā leva ʻi he poó kakato ʻo fakapipiki fakataha e fanga kiʻi kongokongá.
Naʻe kei ʻasi pē ha fanga kiʻi makohi ʻi he ʻīmisi ʻo e ʻaloʻí. Naʻe pulia ha telinga ʻe taha ʻo e pulú. Naʻe pulia ha konga ʻo e mata ʻa ha taha ʻo e kau tangata potó. Ko e tauhi-sipi ʻe taha ne lahi ange ʻa e kuluú ʻi he maká ʻi he ngaahi feituʻu ʻe niʻihi. Ka ko e fakaofó, naʻe fakaleleiʻi e fanga kiʻi konga ne maumaú.
Naʻe angaʻofa ʻa e kui fefiné ke ne ngaohi ha ʻīmisi ʻaloʻi foʻou, ka naʻe ʻikai loto ki ai e Fineʻeikí. Naʻá ne pehē naʻe toe mahuʻinga ange kiate ia he taimí ni ʻa ʻene ʻīmisi ʻaloʻí. ‘Oku hoko ia ko ha fakaʻilonga e līʻoa hono husepāniti ʻofá mo ha fakamanatu ki hotau Fakamoʻui ʻofá.
ʻI heʻetau fononga ʻi he moʻuí ni, ʻe malava ke tau aʻusia ha maumau ʻi ha faʻahinga founga. Mahalo te tau ongoʻi kuo tau movetevete ki ha ngaahi konga he ʻikai toe lava ʻo fakaleleiʻi. Ka ‘oku ʻi ai hotau Fakamoʻui, pea ʻe lava ke tau hoko ʻo kakato ʻi Hono toʻukupu ʻofá.