Molomolo Muivaʻe ʻia Sīsuú
ʻOku nofo e tokotaha naʻá ne fai e talanoá ʻi ʻIutā, USA.
Ko hoku hingoá ko Mele. ʻOku ou nofo mo hoku fāmilí ʻi ʻIsileli. Kuo mau aʻusia ha ngaahi meʻa mahuʻinga ‘i he ʻaʻeva he feituʻu naʻe hāʻelea ʻe Sīsū he kuonga muʻá.
Pētelihema
Ko e feituʻu makehe ʻe taha ne mau ō ki aí ko Pētelihema, ʻa ia naʻe ʻaloʻi ai ʻa Sīsuú. Naʻe pau ke fononga ʻa Mele mo Siosefa mei hona ʻapi ʻi Nāsaletí ʻi ha maile nai ʻe 90 (144 km) ke aʻu ki ai. Naʻa mau ʻaʻahi ki ha falelotu naʻe langa ʻi he feituʻu ne fakakaukau e kakaí naʻe tuʻu ai e ʻaiʻangakai ʻo e manú.
Naʻa mau mamata foki ki he ngaahi loto ʻataʻatā ofi ki Pētelihemá. ʻOku kei leʻohi ʻe he kau tauhi-sipí e tākangá ʻi aí, ʻo hangē pē ko ia naʻa nau fai ʻi he pō ne ʻaloʻi ai ʻa Sīsuú. Naʻa mau lava ʻo fanongo ki he tangi ‘a e fanga sipí ʻi heʻemau hivaʻi e “ʻA e Kau Tauhi-sipi ʻi Siuteá” (Ngaahi Himí, fika 120). Te u manatuʻi maʻu pē ʻa e ongo naʻá ku maʻu ʻi hono hivaʻi e hiva ko iá.
Ko e Tahi Kālelí
Ko e Tahi Kālelí ʻeni. Ko ha anovai fakaʻofoʻofa naʻe akoʻi ai ʻe Sīsū ha kakai ʻe lauafe mo fakahoko ha ngaahi mana lahi. Ne u lava ʻo ongoʻi moʻoni ai e Laumālié. ‘Oku ʻi ai ha ongoʻi nonga ʻokú ne fakahā mai naʻe hoko ha ngaahi meʻa toputapu ai.
‘Oku ou saiʻia he ʻalu ki he ngaahi feituʻu naʻe hāʻelea ʻe Sīsuú, hangē ko e Vaitafe Soataní, ʻa ia ne papitaiso ai ʻa Sīsuú. ‘I heʻeku ʻi he ngaahi feituʻu ko ʻení, ʻoku ou lue fakalongolongo holo ʻo ofi ki he kakai ʻoku nau moihū kia Sīsū ʻaki hono tutu ha ngaahi teʻelango mo tūʻulutui ʻi he lotu. ʻOku ou ongoʻi maʻu pē ʻi hoku lotó ʻoku hōifua mai ʻa e Tamai Hēvaní mo Sīsū ki he kakai ʻoku fakahā ʻenau ʻofa kiate Kinauá.
Selusalema
Ko ha kolo lahi ʻa Selusalema. ʻI he Sāpate kimuʻa pea tutuki ʻa Sīsuú, naʻá Ne hāʻele ki ai ʻi ha ʻasi (vakai, Mātiu 21:1–11). Naʻe talitali lelei Ia ʻe he kakaí ki he koló ʻaki hono taʻataʻalo ha ngaahi lauʻi paame mo kaila “Hosana!”
ʻI he ʻaho Sāpate kimuʻa he Toetuʻu ʻo e taʻu kotoa pē, ʻoku muimui ha kakai he hala ʻo Sīsuú ki Selusalema. ʻOku nau toʻo ha ʻū lauʻi paame mo hiva ha ngaahi hiva kau kia Sīsū. Naʻe kau hoku fāmilí mo ha kau Kalisitiane kehe ʻi ha taʻu ʻe taha ki he laka ko ʻení. Naʻe fakaʻofoʻofa ke ongoʻi e ʻofa ʻa e tokotaha kotoa pē ki honau Fakamoʻuí.
‘Oku ʻikai fie maʻu ke ke ʻaʻeva ʻi he feituʻu naʻe hāʻelea ʻe Sīsuú ke ke molomolo muivaʻe kiate Ia. Te ke lava ʻo muimui ki Heʻene sīpingá ʻi ha feituʻu pē!