Fakamanatua ʻo e Kilisimasí ʻi he Pasifikí

ʻI he kotoa ʻo e ʻēlia Pasifikí, ʻoku fekumi e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ki ha ngaahi founga makehe mo ueʻi fakalaumālie ke hoko ʻa Kalaisi ko e uho ʻenau ngaahi kātoanga faka-Kilisimasí.

Ko ha niʻihi eni ʻo ʻenau ngaahi talanoá.

“Fakamaama e Māmaní”

Waireka Collings

Ko e ngaahi tukufakaholo kuo mau kamataʻi mo homau fāmilí naʻe maʻu ia mei he ngāue ʻo e “Fakamaama e Māmaní”.

Ne mau kau atu ʻi he ʻuluaki taʻú, koeʻuhí naʻe ngali fakalata. Naʻa mau fakakaukau, “sai te tau ʻahiʻahiʻi pē pea sio ai pē ʻe fēfē ʻetau hoko atú.”

Naʻá ku kamata palaniʻi e fanga kiʻi meʻa iiki ke mau lava ʻo fakahoko ke

1. Tokoniʻi homau kaungāʻapí mo kinautolu ne mau feohí

2. Ke ʻai e Kilisimasí ke ʻuhingamālie ange ki he fānaú, ʻo fakasiʻisiʻi e tokanga ki he meʻa te nau lava ʻo maʻu mei he Kilisimasí kae lahi ange ki he meʻa te nau lava ʻo foakí.

Ne fuoloa ʻemau fekumi ki ha ngaahi founga ke maʻu ai ʻa e laumālie ʻo e Kilisimasí. Ne hoko e ngāue Fakamaama e Māmaní ko e tali kiate kimautolú. Neongo kuo ʻosi pē eni ha taʻu ʻe ua hono fakahoko iá, kuo ʻosi lahi ha ngaahi tukufakaholo ʻoku talanoa ki ai ʻa e fānaú ʻo hangē ne faʻa fakahoko pē ia ʻi homau fāmilí. ʻOku ou ofo ʻi he mālohi mo e ola kuo hoko ʻiate kimautolú.

ʻI he vahaʻa taimi naʻa mau muimui ai he kamataʻi ʻo e Fakamaama e Māmaní kuo mau lava ke foaki ha meʻakai ki he pangikē meʻakaí mo vahevahe e leleí ʻi heʻemau ngaahi ʻakauni fakasōsiale ʻi he mītiá. Kuo mau fai ha ngaahi meʻa hangē ko e ʻave ha foʻi keke ki ha kaungāʻapi foʻou ne toki hiki mai pe ʻave ha kato ʻo ha fanga kiʻi meʻakai ifo ki he senitā moʻui lelei fakalotofonuá ke tokoni kiate kinautolu ʻoku puke pe faingataʻaʻiá.

Ko e tukufakaholo ʻoku mau saiʻia taha aí ʻoku fai ʻi he Efiafi kimuʻa pea ʻaho Kilisimasí. Ko e efiafi eni ʻoku mau toe fakahoko ai e talanoa ʻo Sīsuú pea nofo ʻi ha pō ʻi Pētelihema. ʻOku mau teuteu ʻo hangē pē ko ʻenau teuteú. ʻOku mau feinga ke kai ʻa e meʻakai te nau mei kaí, pea mau talanoa ʻo kau kia Sīsū mo e anga ʻo ʻEne moʻuí.

ʻOku faingofua ke talanoa fekauʻaki mo e ngaahi meʻa maʻongoʻonga naʻe fakahoko ʻe Sīsuú. ʻI he efiafi kimuʻa he ʻaho Kilisimasí ʻoku mau feinga ke talanoa ki he ngaahi faingataʻa naʻá Ne aʻusiá. ʻI he ʻikai ha nofoʻanga paú, naʻá Ne fakafalala maʻu pē ki he tokoni ʻa e niʻihi kehé. ʻOku mau talanoa ki he founga te tau lava ai ʻo hoko ko e niʻihi kehe ʻoku tokoniʻi pea hiki hake ʻa kinautolu ʻoku fie maʻu ʻetau tokoní.

ʻI he ʻAho Kilisimasí, ʻoku langa ʻe he fānaú ʻaki e mā sinisaá ha ʻaiʻanga kai ʻo e manu ʻoku ʻi ai ʻa Mele, Siosefa mo e pēpē ko Sīsuú, kae ʻikai ko ha fale mā sinisā pē. ʻOku ou pehē ʻoku lelei ki he fānaú ke nau ʻiloʻi mo maʻu ha mahino ko e tokotaha maʻongoʻonga taha ne moʻui ʻi he māmani ko ení ne hoko ko ha pēpē ʻo pau ke ako ʻa e meʻa kotoa naʻá Ne ʻiló ʻo hangē pē ko kinautolú. ʻIkai ngata pē ʻi Heʻene hoko ko ha pēpeé, ka naʻá Ne hāʻele mai ki he māmaní ʻi he tūkunga maʻulalo tahá.

ʻOku fuʻu ongoʻi ngofua ʻe he fānaú ʻa e ueʻi ʻa e laumālié. ʻOku hangē ʻoku nau tali kakato ʻa e ngaahi fakakaukaú. ʻOku ʻaonga kotoa e ngaahi taimi ako ko ení.

ʻOku hoko ʻa e Kilisimasí ko ha kātoanga fakafiefia moʻoni ʻi homau ʻapí. ʻOku ʻi ai ha ʻaʻapa makehe, pea ʻi he taimi ní, ʻoku ʻamanaki ʻa e fānaú ke fakahoko ʻa e ngaahi tukufakaholo ko ení ʻi he taʻu kotoa. ʻOku ou hanganaki atu ki ha ʻaho te ma kau ai ʻi he ngaahi tukufakaholo tatau ko ení ʻi he ngaahi ʻapi ʻo ʻema fānaú ʻi haʻanau lalahi. ʻOku ou fakaʻamu pē te nau lava ʻo manatu melie ki he ngaahi manatu hangē ko ení ʻa ia naʻe silaʻi ʻenau ngaahi fakamoʻoní mo e ʻilo ki he moʻoni ʻo e ʻaloʻi mo e moʻui ʻa hotau Fakamoʻuí pea mo ʻEne ngāue fakaetauhi toputapu ʻi he māmaní.

Fanga Kiʻi Meʻatokoni Ifó, Ngaahi Teuteú mo e Fakamanatu Fakaʻahó

Paula Matenga

ʻI he taimi ne kei iiki ai ʻeku fānaú, naʻa mau kamataʻi ha tukufakaholo faka-Kilisimasi kuo tuʻuloa ʻi he ngaahi taʻú. Ko ha tohi māhina fakahokohoko ne kiʻi liliu ʻi hono fakatefito ʻia Kalaisi. Ko hono fōtungá, ko ha seti tā tongitongi ʻe uongofulu mā fā ʻo e ʻaloʻí [ʻo Sīsū Kalaisí] naʻá ku ngaohi mei he papá.

ʻI he kamata ʻo Tīsemá ʻe ʻikai ha meʻa ʻi he ʻaiʻanga kai ʻo e manú ʻa ia ne ʻi ha laupapa. Ne taufetongi e fānaú he ʻaho kotoa ʻi hono fili pea fokotuʻu ʻI he ʻaho kotoa ʻa e konga ʻo e seti ʻaloʻí pea kai mo e meʻa kiʻi meʻatokoni ifo ne haʻu fakataha mo iá.

Ko hono feinga ke fakakakato ʻa e konga ʻe 24 ʻo e seti ʻaloʻi ʻo Sīsū Kalaisí ne pau ke fakalahi atu e fanga sipí mo e kāmelí, ka ko e konga mahuʻinga kotoa pē ne ʻi ai ha veesi folofola ne hiki ʻi mui. Ne lau ʻa e veesi folofolá pea fai mo ha fealeaʻaki ki hono mahuʻinga ʻo e konga seti ne filí. ʻA e kau ʻāngeló, kau tangata potó, kau tauhisipí, ʻa e fetuʻú, pea pehē foki, kia Mele, Siosefa mo Sīsū.

ʻI hono fokotuʻu tahataha hake ʻo e seti ʻaloʻi ʻo Sīsū Kalaisí ne pau ai ke vahevahe ʻa e talanoa ʻo hono ʻaloʻi ʻo Kalaisí ʻi he kotoa ʻo e māhina ko Tīsemá. Ne fakamanatu mai ʻa e ʻuhinga moʻoni ʻo e Kilisimasí he ʻaho kotoa pē lotolotonga e taimi femoʻuekina mo moʻumoʻua ʻo e ngaahi fakafiefia faka-Kilisimasí.

ʻI he taimi ne aʻu mai ai ki he pongipongi Kilisimasí, ne kakato ʻa e seti ʻAloʻi ʻo Sīsū Kalaisí, pea mo hono ʻuhinga kakató, ʻi he uho ʻo ʻemau ngaahi fakafiefiá.

ʻOku ʻikai mole ʻa e ngaahi tukufakaholo ko ení ʻi he tupu hake ʻema fānaú. ʻOku fakaʻaongaʻi ia ʻo aʻu ki heʻenau lalahí. ʻOku ʻikai ke nau toe fakamanatuʻi ʻa e ngaahi meʻaʻofa naʻá nau maʻu ʻi heʻenau tupu haké, ka ko e taimi ne mau feohi ai ko e fāmilí mo e ngaahi tukufakaholo ʻoku nau ʻamanaki atu ki ai he taʻu kotoá. Koeʻuhi naʻá nau fakatuʻotuʻa ki he tukufakaholo makehe ko ʻení, ne u iku ʻave ha seti siʻisiʻi ange ki hoku ngaahi fohá ʻi heʻenau ngāue fakafaifekaú ke nau maʻu mo honau ngaahi hoá ha kiʻi meʻa mei ʻapi ʻi he taimi Kilisimasí.

Kuo takitaha maʻu fāmili ʻeku fānaú he taimí ni, ko ia kuó u ngaahi ha tohi māhina fakahokohoko maʻanautolu takitaha ke nau hoko atu ʻa e tukufakaholo ko ení mo ʻenau fānaú.

ʻOku totonu ke fakalata, ʻa e Kilisimasí ki he fānaú. ʻOku totonu ke fakalata, ʻo fonu ʻi he fiefia mo e vēkeveke ʻa e ongoongoleleí. ʻE lava ke fakatefito ʻia Kalaisi e ngaahi tukufakaholo faka-Kilisimasi ʻoku fiefia ai e māmani ʻo kapau te tau mohu founga. ʻOku ʻikai fie maʻu ia ke fakamatelie pē ʻa e foaki mo e maʻu ʻo e ngaahi meʻaʻofá. ʻOkú ne fakafofongaʻi ʻa e meʻaʻofa ne foaki mai kiate kitautolu kotoa mei he Tamai Hēvaní; ko e meʻaʻofa ʻo hono ʻAlo ko Sīsū Kalaisí mo e ngaahi meʻa kotoa ʻoku ʻuhinga ki aí.

Ko ha Meʻaʻofa Maʻa Sīsū ʻi he ʻAho Kilisimasí

Sophia Grey

ʻI heʻeku kei taʻu nima pe onó nai naʻá ku maʻu ha fakakaukau ke foaki ha meʻaʻofa maʻa Sīsū ʻi he Kilisimasí. ʻOku ou manatuʻi ʻeku ʻiloʻi lelei, ʻi heʻeku kei siʻí, ko Sīsuú ko homau tuongaʻane. Naʻá ku fie maʻu ke fakakau Ia ʻi he ngaahi meʻa naʻa mau fakahoko fakafāmilí, ʻo hangē ko ia ʻoku malava ʻe ha fānau.

Ko e foaki meʻaʻofá ko ha konga lahi ia ʻo e Kilisimasí. Ne u pehē koeʻuhí kuo ʻosi feʻunga pē ʻa ʻEne hoko ʻa Sīsū Kalaisi ko e meʻaʻofá, ko e meʻa ʻoku fie maʻu ke tau fakakaukau ki aí ko e hā ha meʻa te mau fai ko ha meʻaʻofa kiate Ia.

Ne u maʻu ha puha ne ʻi ai hono tapuni, peá u kofukofuʻi ia ʻaki ha pepa Kilisimasi mo ha līpine teuteu, pea tohiʻi ʻi ha kiʻi laʻi pepa siʻisiʻi ʻa e pōpoaki: “Kia Sīsū, mei he Fāmili Kuleí.”

Naʻá ku kole leva ki hoku fāmilí ke nau tohi ha meʻa te nau fakahoko ko ha meʻaʻofa kia Sīsū ʻi he taʻu ka hoko maí. Ngaahi meʻa hangē ko e “Te u feinga ke toe lahi ange hono fakamolemoleʻi ʻo e niʻihi kehé maʻau,” pe “Te u feinga ke u hoko ko ha taha ʻoku faʻa fakalelei maʻau,” ʻo aʻu pe, ki he “Te u fai e ngaahi ngāue maʻa mami mo teti ʻo ʻikai ke toki fekauʻi.”

ʻOku ʻikai ke u manatuʻi e ngaahi meʻaʻofa pau ne tohí, he ko e meimei taʻu ʻeni ʻe 20 kuo ʻosi mei hono fuofua fakahokó, ka ʻoku kei nofo pē e laumālie ʻo e ngaahi meʻaʻofa ko iá.

ʻI he pongipongi Kilisimasí, kimuʻa hono fakaava e ngaahi meʻaʻofá, ne mau lau mei he tohi ʻa Luké, fakaava ʻa e puha meʻaʻofa maʻa Sīsuú pea takitaha lau ʻa e meʻa te mau foaki kiate Ia ʻi he taʻu ko iá.

Ne ʻomi ʻa Kalaisi ʻe he tukufakaholo faingofua ko ení ki heʻemau Kilisimasí koeʻuhí ne mau ongoʻi hangē ʻokú Ne ʻi aí. Naʻá ku fiefia ʻi heʻeku kei siʻí, koeʻuhí naʻá Ne maʻu ha meʻaʻofa ʻo hangē pē ko kimautolú, hangē pē ko ha taha Ia homau fāmilí. Naʻá ne fakamanatu mai kiate kimautolu ʻa e ngaahi meʻa ne mahuʻingá, pea ko homau tuongaʻane Ia! ʻOku mau ʻofa ʻiate Ia ʻo hangē pē ko ha fāmili moʻoní, pea ko e hā ka ʻikai ke mau fakakau ai Ia ʻi heʻemau taimi fakafāmili fiefia tahá?

ʻI he fakaʻau ke u motuʻa angé, kuo mahino leva ʻoku ʻikai ke fie maʻu ia ke fakamatelie pē hono fakaava ʻo e ngaahi meʻaʻofá ʻi he Kilisimasí. Kuo foaki mai ʻe he Fakamoʻuí maʻatautolu hono kotoa ʻa e meʻafoaki ʻo e Fakaleleí, ko e fungani taha ia ʻi he ngaahi meʻaʻofa kotoa pē. ʻOku totonu ke u maʻu ʻa e meʻaʻofa ko iá ʻi he loto-vēkeveke ʻo hangē ha kiʻi tamasiʻi ʻokú ne fakaava ha meʻaʻofa ʻi he pongipongi Kilisimasí.

Pongipongi Kilisimasi ʻi he Misiona ʻAokalaní: Ko ha tukufakaholo taʻu ʻe 30 ʻo e ngāue tokoni faka-Kalaisi

Argentina Fatialofa

Kuo mohu tāpuekina ʻeku moʻuí. Ne mau maʻu ʻa e ongoongoleleí ʻi he kamataʻanga ʻo e ngaahi taʻu fitungofulú pea kuo fakakoloaʻi ʻemau ngaahi moʻuí ʻi he founga kotoa pē ne lavá.

ʻOku ou vakai ki he mamahi lahi ʻi heʻeku ngāueʻangá ʻa e movetevete ʻa e ngaahi fāmilí, mo e ngaahi loto-laveá. ʻI he taimi ʻoku ou fakakaukau ai ki he ngaahi tāpuaki mo e fakakoloa kuo ʻomai ʻe he ongoongoleleí ki heʻeku moʻuí, ʻoku ou ʻilo ʻoku totonu ke u foaki fakafoki ha meʻa, tautautefito ki he niʻihi ʻoku teʻeki ke nau maʻu ʻa e ongoongoleleí ʻo hangē ko aú.

ʻI he konga kimuʻa ʻo e ngaahi taʻu ʻo e valungofulú, ne u fekumi mo ʻeku fānaú ki ha ngaahi faingamālie ngāue tokoni ko ha founga ke fakahaaʻi e houngaʻia ange ki he meʻa naʻa mau maʻu he taimi Kilisimasí. Ne kamata kotoa ia ʻi ha taʻu ʻe taha ʻi haʻamau ngāue tokoni ʻi hono ʻoange ha meʻatokoni efiafi maʻá e kau tukuhausiá mo e ngaahi fāmili faingataʻaʻiá, ʻi he holo fakakoló. Ko e feituʻu ia ne faʻa fakahoko aí. Ko ha aʻusia fakafiefia mo fakalaumālie ia ne mahuʻinga ʻaupito kiate kimautolu ko ha fāmili.

Talu mei he ʻuluaki kau atu ko iá, kuó u feinga ke ʻoua naʻa mole e faingamālié ʻi ha taʻu. ʻOku mau ngāue tokoni ʻi he Misiona ʻAokalaní he taimí ni pea kuo fakahoko ia ʻi ha meimei taʻu ʻe tolungofulu. ʻI he ngaahi taʻu kuo mahili atú kuo ōmai ha tokolahi ʻo e kau mēmipa kehekehe ʻo e fāmilí ke kau fakataha mo kimautolu; ngaahi tautehina [pe tokoua], ngaahi ʻilamutu mo e fakafotu, ʻo makatuʻunga ʻi he niʻihi ne ʻataá pe ngaahi tūkunga ne nau ʻi ai he taimi ko iá.

Kuo akoʻi au mo ʻeku fānaú, ʻe he tukufakaholo faka-Kilisimasi ko ʻení ke mau loto fakatōkilalo. Kuo akoʻi kimautolu ke mau houngaʻia he meʻa kuo foaki mai ʻe he Fakaleleí maʻamautolú. Ko e meʻa kotoa ne mau maʻú ʻoku mau moʻua ai ki he Fakalelei ʻa e Fakamoʻuí. ʻI he taimi ʻoku ou sio ai ki he mahu homau tēpilé mo e ngaahi meʻa lahi ʻi he lalo ʻakaú ʻi he taimi Kilisimasí, ʻoku ou ʻilo ko e ʻuhingá pē ko e ngaahi tāpuaki ʻo e ongoongoleleí kuo fakakoloaʻaki ʻemau moʻuí.

ʻOku ʻofaʻi ʻe Sīsū Kalaisi ʻa e faʻahinga kotoa ʻo e tangatá. Kuó u ongoʻi ʻa e manavaʻofa tatau ko iá ki he niʻihi ʻoku omi ki he kai hoʻatā ʻi he Kilisimasí ʻa e Misiona Kolo Lahí. ʻOku mau talitali fiefia ʻa kinautolu kotoa ʻoku hū mai he ngaahi matapaá, ʻo ʻikai ha tokanga ki he tūkunga pe ʻatākaí, ʻo hangē pē ne mei fai ʻe he Fakamoʻuí. ʻOku ou saiʻia ʻaupito he sio kiate kinautolu mo talitali kinautolu ʻo hangē pē ha fāmilí, tautautefito ki he niʻihi ʻoku faingataʻaʻia fakaesino pe tukuhausiá.

Ne fua ʻe he Fakamoʻuí ʻa e kolosí ʻo ʻikai hanu. Naʻá Ne kātekina e mamahí koeʻuhí ko ʻeku ngaahi angahalá pea ʻikai ke Ne teitei pehē ʻi ha taimi ʻe ʻikai te Ne kei malava ʻo fakahoko ia, pe naʻe ʻikai ke Ne foʻi. ʻI heʻeku ʻilo e meʻa naʻá Ne kātekina maʻakú kuo pau ke u foaki fakafoki ai ha meʻa kiate Ia ʻaki e ngāue tokoní mo e ngāue fakaetauhi ki he niʻihi ʻoku faingataʻaʻiá.

Te u tauhi ʻa e tukufakaholo ko ení ki he fuoloa taha te u malavá. ʻOku ʻikai ke u ʻilo pe ko e hā e fuoloa ko iá, ka naʻe ʻikai teitei foʻi ʻa Kalaisi ʻi hono fakahoko e meʻa naʻá Ne haʻu ki he māmaní ke fai maʻakú. Te ke ʻilo au ʻoku ou kei ngāue maʻá e ʻEikí mo ʻEne fānaú he Kilisimasi ko ʻení mo e ngaahi Kilisimasi lahi ka hokó ʻi he Misiona ʻAokalaní kae ʻoua kuo fie maʻu au ʻe he ʻEikí ki ha feituʻu kehe.