Përmirësimi i Përvojës Sonë në Tempull

Nga Presidenca e Parë

“Guri i çmuar kurorëzues i Rivendosjes është tempulli i shenjtë. Ordinancat dhe besëlidhjet e shenjta të tij janë shumë të rëndësishme për përgatitjen e një populli që është gati ta mirëpresë Shpëtimtarin në Ardhjen e Tij të Dytë.”¹

Herë pas here, Presidenca e Parë ka bërë përshtatje të ceremonive dhe procedurave të tempullit me qëllim që të përmirësohet përvoja në tempull për anëtarët dhe për t’i ndihmuar të gjithë ata që hyjnë në tempull, që të ndiejnë një lidhje më të afërt me Perëndinë brenda këtyre hapësirave të shenjta.

Si pjesë e përvojës së tempullit, anëtarët veshin veshje ceremoniale me rëndësi doktrinore e simbolike, gjurmët e të cilave shkojnë pas deri tek adhurimi në tempull në Dhiatën e Vjetër (shih Levitiku 8 dhe Eksodi 28).

Janë bërë disa përshtatje për veshjen ceremoniale të tempullit. Këto përshtatje nuk pasqyrojnë ndryshime në simbolikën ose doktrinën e tempullit, por kanë për qëllim ta bëjnë përvojën në tempull më të thjeshtë, më të rehatshme dhe më të arritshme duke e bërë veshjen më të lehtë për t’u veshur, për t’u kujdesur për të dhe më pak të kushtueshme.

Disa nga këto përshtatje përfshijnë:

Një model më të thjeshtë për vellon dhe rrobën.
Heqja nga kapela e fortesës plastike dhe e lidhëses nga kapela dhe velloja.
Përdorimi i një materiali më të durueshëm që është i njëjtë për rrobat, kapelën dhe brezin, që i ndihmon të rezistojnë më gjatë dhe e bën më të lehtë për t’u kujdesur për to.

Ne shpresojmë se këto përshtatje do të ndihmojnë për ta përmirësuar këtë përvojë të shenjtë për ju, teksa e bëni adhurimin në tempull një pjesë të rregullt të jetës suaj.

Përgjigje për Pyetje të Zakonshme

A mund të vazhdoj ta përdor veshjen ceremoniale që e kam tashmë?

Po. Modelet e vjetra mund të vazhdojnë të përdoren derisa të jetë e nevojshme që të zëvendësohen.

Si ta eliminoj siç duhet veshjen e vjetër ceremoniale?

“Që t’i heqin nga përdorimi veshjet ceremoniale të grisura të tempullit, anëtarët duhet ta shkatërrojnë materialin duke e prerë që të mos dallohet përdorimi fillestar” (Handbook 2: Administering the Church [Manuali 2: Administrimi i Kishës] [2010], 21.1.42).

A mund ta ndryshoj veshjen time ekzistuese që të përputhet me përshtatjet e reja?

Po. Informacion i mëtejshëm rreth mënyrës se si bëhet kjo, mund të gjendet te store.ChurchofJesusChrist.org/ceremonialclothing, kur ju futeni me llogarinë e anëtarësisë suaj ose duke shkuar te Shërbimet e Shpërndarjes dhe duke pyetur një punonjëse në dyqan.

A mund ta dhuroj veshjen e vjetër ceremoniale?

Kur është e përshtatshme, ju mund t’ua jepni veshjet e përdorura por në gjendje të mirëmbajtur pjesëtarëve të familjes ose miqve që e kanë marrë dhurimin në tempull. Gjithsesi, veshja ceremoniale, pavarësisht nga gjendja, nuk duhet t’i dhurohet një tempulli, dyqaneve të bamirësisë apo një dyqani që shkëmben veshje.

Si mund ta marr veshjen e re?

Për informacion rreth çmimit dhe gjendjes në dispozicion në zonën tuaj, shkoni te store.ChurchofJesusChrist.org/ceremonialclothing ose vizitoni Shërbimet e Shpërndarjes.