Thellë në Zemrën Tonë
Ne do të shohim se si Zoti përpiqet të na ndihmojë – të gjithë ne – që ta futim ungjillin më thellë në zemrën tonë.
Motra dhe Vëllezër, në çfarë kohe të lavdishme po jetojmë! Ndërsa kremtojmë fillimin e Rivendosjes është gjithashtu e përshtatshme të kremtojmë Rivendosjen e vazhdueshme që po dëshmojmë. Unë gëzohem me ju që jetoj në këtë kohë.1 Zoti vazhdon të vendosë në vend, nëpërmjet profetëve të Tij, gjithçka duhet për të na ndihmuar të përgatitemi për ta pritur Atë.2
Një nga ato gjëra që nevojiten, është nisma e re Fëmijët dhe Rinia. Shumë nga ju janë njohur me theksin e këtij programi te vendosja e synimeve, emblemat e reja të përkatësisë dhe konferencat Për Forcën e Rinisë [FSY]. Por ne duhet të mos lejojmë që ato të na errësojnë pamjen e parimeve mbi të cilat është ndërtuar programi dhe të qëllimit të tyre: të ndihmojnë të futet ungjilli i Jezu Krishtit thellë në zemrën e fëmijëve dhe të rinisë sonë.3
Besoj se kur arrijmë t’i kuptojmë më qartë këto parime, do ta shohim që ky është më shumë se një program për anëtarët e moshës 8 deri 18 vjeç. Ne do të shohim se si Zoti po përpiqet të na ndihmojë – të gjithë ne – që ta futim ungjillin më thellë në zemrën tonë. Unë lutem që Fryma e Shenjtë të na ndihmojë të mësojmë së bashku.
Marrëdhëniet – “Jini me Ta”4
Parimi i parë janë marrëdhëniet. Ngaqë janë një pjesë aq e natyrshme e Kishës së Jezu Krishtit, ne e harrojmë ndonjëherë rëndësinë e marrëdhënieve në udhëtimin tonë të vazhdueshëm drejt Krishtit. Nuk pritet që ne ta gjejmë apo të ecim të vetmuar në shtegun e besëlidhjeve. Neve na nevojitet dashuria dhe përkrahja nga prindërit, pjesëtarët e tjerë të familjes, miqtë dhe udhëheqësit që po ecin gjithashtu në atë shteg.
Këto lloj marrëdhëniesh kërkojnë kohë. Kohë për të qenë bashkë. Kohë për të qeshur, mësuar dhe shërbyer së bashku. Kohë për të vlerësuar interesat dhe sfidat e njëri-tjetrit. Kohë për të qenë të hapur dhe të ndershëm me njëri-tjetrin ndërsa përpiqemi fort të bëhemi më të mirë së bashku. Këto marrëdhënie janë një nga qëllimet parësore të të mbledhurit së bashku si familje, kuorume, klasa, dhe bashkësi. Ato janë themeli për një dhënie të efektshme të shërbesës.5
Plaku Dejll G. Renland na dha një çelës për t’i zhvilluar këto marrëdhënie kur tha: “Që t’u shërbejmë të tjerëve me efektshmëri, ne duhet t’i shohim ata … nëpërmjet syve të Atit Qiellor. Vetëm atëherë ne mund të fillojmë ta kuptojmë vlerën e vërtetë të një shpirti. Vetëm atëherë ne mund ta ndiejmë dashurinë që Ati Qiellor ka për të gjithë fëmijët e Tij.”6
T’i shohim të tjerët sikurse i sheh Perëndia është një dhuratë. E ftoj secilin prej nesh që të kërkojë për këtë dhuratë. Kur i kemi sytë të hapur për të parë7, ne do të jemi gjithashtu në gjendje t’i ndihmojmë të tjerët ta shohin veten sikurse i sheh Perëndia.8 Presidenti Henri B. Ajring e theksoi fuqinë e kësaj kur ai tha: “Ajo që do të ketë më shumë rëndësi është ajo që [të tjerët] mësojnë nga [ju] rreth asaj që ata janë vërtet dhe që ata vërtet mund të bëhen. Mendoj se këtë nuk do ta mësojnë aq shumë nga leksionet. Ata do ta marrin nga ndjesitë e asaj se çka ju jeni, cilët mendoni se janë ata dhe çfarë mendoni se ata mund të bëhen.”9 Të ndihmojmë të tjerët të kuptojnë identitetin dhe qëllimin e tyre të vërtetë është një nga dhuratat më të mëdha që mund të japim10 Të parit e të tjerëve dhe të vetes siç bën Perëndia i bën “zemrat [tona] të thurura në bashkim dhe në dashuri”11.
Me forcat laike gjithnjë në rritje që na tërheqin, neve na nevojitet fuqia që vjen nga marrëdhëniet e përzemërta. Kështu, kur planifikojmë veprimtari, mbledhje dhe grumbullime të tjera, le të kujtojmë se qëllim parësor i tyre është të ndërtohen marrëdhënie që na bashkojnë e na ndihmojnë ta futim ungjillin e Jezu Krishtit më thellë në zemrat tona.12
Zbulesa, Liria e Zgjedhjes dhe Pendimi – “Lidhini Ata me Qiellin”13
Sigurisht, nuk mjafton thjesht të jemi të lidhur së bashku. Ka shumë grupe dhe organizata që arrijnë unitet për një mori kauzash. Gjithsesi, uniteti që kërkojmë është të bëhemi një në Krisht, ta lidhim veten me Të.14 Për ta lidhur zemrën tonë me qiellin, neve na nevojiten përvoja shpirtërore vetjake, sikurse sapo na foli shumë qartë Plaku Anderson për to.15 Ato përvoja vijnë kur Fryma e Shenjtë e mbart fjalën dhe dashurinë e Perëndisë në mendjen dhe zemrën tonë.16
Kjo zbulesë na vjen nëpërmjet shkrimeve të shenjta, veçanërisht Libri i Mormonit; nëpërmjet fjalëve të frymëzuara nga profetët e gjallë dhe dishepuj të tjerë besnikë, dhe nëpërmjet zërit të qetë e të ulët.17 Këto fjalë janë më shumë se bojë mbi letër, valë zanore në veshët tanë, apo mendime në mendjen tonë, apo ndjenja në zemrën tonë. Fjala e Perëndisë është fuqi shpirtërore.18 Ajo është e vërtetë dhe dritë.19 Është mënyra se si e dëgjojmë Atë! Ajo lind dhe rrit besimin tonë në Krisht dhe ndez brenda nesh një dëshirë për t’u bërë më shumë si Shpëtimtari – që do të thotë të pendohesh dhe të ecësh në shtegun e besëlidhjeve.20
Prillin e kaluar Presidenti Rasëll M. Nelson na ndihmoi ta kuptojmë rolin qendror të pendimit në këtë udhëtim zbulese.21 Ai tha: “Kur zgjedhim të pendohemi, ne zgjedhim të ndryshojmë! Ne e lejojmë Shpëtimtarin që të na shndërrojë në variantin më të mirë të vetes sonë. … Ne zgjedhim të bëhemi më shumë si Jezu Krishti!”22 Ky proces ndryshimi, i ushqyer nga fjala e Perëndisë, përbën mënyrën se si lidhemi me qiellin.
Në bazë të ftesës së Presidentit Nelson për t’u penduar është parimi i lirisë së zgjedhjes. Ne duhet ta zgjedhim pendimin vetë. Ungjilli nuk mund të futet me forcë në zemrën tonë. Sikurse tha Plaku Renland: “Qëllimi i Atit tonë Qiellor si prindi ynë nuk është që t’i bëjë fëmijët e Tij të bëjnë atë që është e drejtë; është që t’i bëjë fëmijët e Tij të zgjedhin të bëjnë atë që është e drejtë”23.
Në programet e zëvendësuara nga programi Fëmijët dhe Rinia, ishin mbi 500 kërkesa të ndryshme për tʼu plotësuar për të marrë njohje [certifikata] të ndryshme.24 Sot, në thelb është një. Është një ftesë që të zgjedhësh të bëhesh më shumë si Shpëtimtari. Ne e bëjmë këtë duke marrë fjalën e Perëndisë nëpërmjet Frymës së Shenjtë dhe duke lejuar Krishtin të na ndryshojë në variantin më të mirë të vetes sonë.
Kjo është shumë më tepër sesa një ushtrim për vendosje synimesh apo vetëpërmirësim. Synimet janë thjesht mjete që na ndihmojnë të lidhemi me qiellin nëpërmjet zbulesës, lirisë së zgjedhjes, dhe pendimit – për të ardhur te Krishti dhe për ta marrë ungjillin e Tij më thellë në zemrën tonë.
Përfshirje dhe Sakrificë – “Lërini të Udhëheqin”25
Së fundi, për ta futur ungjillin e Jezu Krishtit thellë në zemrën tonë, nevojitet të përfshihemi në këtë – të japim kohën e talentet tona për këtë, të sakrifikojmë për këtë.26 Ne të gjithë duam të jetojmë një jetë me kuptim dhe kjo është posaçërisht e vërtetë për brezin e ri. Ata dëshirojnë një kauzë.
Ungjilli i Jezu Krishtit është kauza më e madhërishme në botë. Presidenti Ezra Taft Benson tha: “Ne jemi urdhëruar nga Perëndia që ta çojmë këtë ungjill në gjithë botën. Ajo është kauza që duhet të na bashkojë sot. Vetëm ungjilli do ta shpëtojë botën nga fatkeqësia e vetëshkatërrimit të saj. Vetëm ungjilli do t’i bashkojë njerëzit e të gjitha racave dhe kombësive në paqe. Vetëm ungjilli do t’i sjellë gëzim, lumturi dhe shpëtim familjes njerëzore.”27
Plaku Dejvid A. Bednar premtoi: “Kur ne i fuqizojmë të rinjtë dhe të rejat duke i ftuar dhe lejuar të veprojnë, Kisha do të shkojë përpara në mënyra të mrekullueshme”28. Më shpesh nga sa mendojmë, ne nuk e kemi ftuar dhe lejuar rininë të sakrifikojë për këtë kauzë të madhe të Krishtit. Plaku Nil A. Maksuell vërejti: “Nëse rinia [jonë] është tepër pak e ngarkuar [nga puna e Perëndisë] ajo ka më shumë gjasa të jetë tepër mbingarkuar nga bota”29.
Programi Fëmijët dhe Rinia përqendrohet te fuqizimi i rinisë. Ata i zgjedhin vetë synimet e veta. Presidencat e kuorumeve dhe të klasave janë vënë në rolin e duhur të tyre. Këshilli i lagjes për rininë, pikërisht si këshilli i lagjes, përqendrohet te puna e shpëtimit dhe ekzaltimit.30 Dhe kuorumet dhe klasat i fillojnë mbledhjet e tyre duke u këshilluar rreth mënyrës se si ta bëjnë punën që Perëndia u ka dhënë.31
Presidenti Nelson i tha rinisë së Kishës: “Nëse e zgjidhni, nëse e dëshironi ju … mund të jeni një pjesë e madhe e diçkaje të madhe, diçkaje të madhërishme, diçkaje madhështore! … Ju jeni nga më të mirët që Zoti ka dërguar ndonjëherë në këtë tokë. Ju keni kapacitetin për të qenë më të zgjuar e më të mençur dhe për të pasur më shumë ndikim mbi botën sesa çdo brez i mëparshëm!”32 Në një rast tjetër, Presidenti Nelson u tha të rinjve e të rejave: “Unë kam besim të plotë te ju”. Unë ju dua dhe po kështu edhe Zoti. Ne jemi populli i Tij, të përfshirë së bashku në punën e Tij të shenjtë.”33 Të rinj e të reja, a mund ta ndieni mirëbesimin që Presidenti Nelson ka te ju dhe se sa të rëndësishëm jeni për këtë punë?
Prindër dhe udhëheqës në moshë madhore, unë ju ftoj ta shihni rininë sikurse Presidenti Nelson. Kur rinia e ndien dashurinë dhe mirëbesimin tuaj, kur ju i nxitni dhe i mësoni ata se si të udhëheqin – dhe mandej i lini të lirë të udhëheqin – ata do t’ju mahnitin me idetë, aftësitë dhe zotimin e tyre ndaj ungjillit.34 Ata do të ndiejnë gëzimin e zgjedhjes për t’u përfshirë dhe për të sakrifikuar për kauzën e Krishtit. Ungjilli i Tij do të shkojë më thellë në zemrën e tyre dhe puna do të përparojë në mënyra të mrekullueshme.
Premtim dhe Dëshmi
Unë premtoj se, ndërsa përqendrohemi në këto parime – marrëdhënie, zbulesë, liri e zgjedhjes, pendim, dhe sakrifikim – ungjilli i Jezu Krishtit do të futet më thellë në zemrën tonë. Ne do ta shohim Rivendosjen të shkojë përpara te qëllimi i saj më i lartë, shëlbimi i Izraelit dhe vendosja e Sionit,35 ku Krishti do të mbretërojë si Mbreti i mbretërve.
Unë dëshmoj se Perëndia vijon të bëjë gjithë gjërat e nevojshme për ta përgatitur popullin e Tij për atë ditë. E pafshim dorën e Tij në këtë punë të lavdishme ndërsa të gjithë përpiqemi të “vijmë te Krishti dhe përsos[emi] në të”36. Në emrin e Jezu Krishtit, amen.