Ilo Digital Wōt: Rūm̧m̧an Ded ro
Ta eo Jej Aikuj Kōm̧m̧ane N̄an Bōk Ikdeelel ko Ad Rejim̧we
Ke jarm̧ōl ekar jelet baam̧le eo aō, ikar jab lukkuun jelā wāween aō naaj maron̄ jerbale mijen eo aō.
Etto m̧okta jān aō kar peptaij tok n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata, ikar kōņaan jerbal n̄an Irooj. Aolep iien ikar ba n̄an n̄a make bwe inaaj wūjlepeļo̧k aolepān iien ko aō n̄an E jekdoon ta. Jerbal n̄an E ilo aolepān mour eo aō ekar aō ettōnak. Im kobatok ilo Kabun̄ eo an Jisōs Kraist ekar letok n̄an eō juon iien em̧m̧anļo̧k bwe in ļoore ettōņak eo aō.
Ilo Tijem̧ba in 2017, ikar peptaij. Ekar raan eo em̧m̧antata ilo mour eo aō. Gospel eo ekar katakin eō ekōjkan ukōt kōļmenļo̧kjeņ, ekōjkan anjo̧ ioon mijak ko aō, im ekōjkan kakijin̄en̄eik tōļan ko aō im lo ko rekāāl. Āliktata ikar barāinwōt ekkatak kōn iien eo em̧m̧an n̄an jerbale juon mijen aolep raan. Ekar m̧ōkaj aō jeļā bwe ekar juon men eo ikar kōņaan kōm̧m̧ane. Kōn menin jān raan n̄an raan, ikar jerbal n̄an kōppopo. Ikar riiti jeje ko rekwojarjar, etal n̄an institute, im kōm̧m̧ane kūr eo aō. Mekarta, ekar wōr juon jorrāān ilo baam̧le eo aō me ekar kōm̧m̧an bwe in jab lukkuun jeļā kōn ilju im jekļaj eo.
Jeram̧ōļ.
Ke ikar tōpar 18, jeram̧ōl ekar jelet baam̧le eo aō. Kōm nan̄in kar jab m̧ōn̄ā wōt jidik, etal n̄an jikuuļ, ak em̧ool kōļļā wōņāān iaļ n̄an jar. Juon wōt men ekar pād ippām n̄an dāpij wōt ekar tōmak eo am. Jekjek in ekar lukkuun karum̧wijļo̧k jekjek eo aō kōn jerbale juon mijen. Ikar kwaļo̧k aō ļōmņak n̄an jinō kōn ikdeelel eo aō, bōtaab ekar bar ālij juon men ekar emakijkij an jiron̄ eō: “Kam̧ōj jikuuļ, innām ļoor ettōņak ko am̧.” Kōnke kōn jekjek eo ad ikkijien jāān, ekar jab ļap kāālet ippa. Kōn menin ikar buuļ jerbal n̄an aō kadedeļo̧k jikuuļ.
Āliktata ikar kadiwōjļo̧k im āliktata kar pojak in etal im jerbal n̄an Irooj. Bōtaab jeramōļ ekar jelet wōt kōm.
Ikar inepata.
Ikar ļōmņak, “Emōj aō kam̧ōj aō jikuuļ, im ikar kōm̧m̧ane aolep men ko imaron̄ in kar. Etke menin ekar jab wōt em̧m̧anļo̧k?” Ikar jab kōņaan kaitokļo̧k aō kōttar ettōņak eo aō, ak men̄e ikar ebweer, ikar lōke bwe men ko renaaj jerbal ekkar n̄an iien.
Ikar kōm̧m̧an jokāālet n̄an buuļļo̧k wōt jerbal n̄an bōk aolep jāān ko n̄an wōņāān mijen eo aō. Ikar jar aolep raan, kōm̧m̧ani loļo̧k ko ippān mijenede ro jon̄an wōt eo imaron̄e, im kar kōkajoorļo̧k naan in kam̧ool eo aō kōn ekkatak kein katakin ko an Kabun̄ in.
Elōn̄ iaan ro nuku rekar jum̧ae ettōņak eo aō n̄an jerbale juon mijen. Rekōn jiron̄ eō bwe jerbale juon mijen enaaj kar kōm̧m̧an bwe men otemjej ren nanaļo̧k n̄an n̄a im baam̧le eo aō. Bōtaab ikar jutak pen. Ikar jeļā bwe ikar kōņaan jerbale juon mijen im bwe Jemedwōj Ilan̄ enaaj kar kōpooj juon iaļ.
Ālkin juon iien aitok in jerbal im kakkoņ jāān, āliktata ikar jilkinļo̧k peba in mijen ko aō. Ke Bisop eo aō ekar kūrļo̧k eō im ba n̄an eō bwe kūr eo aō em̧ōj an itok, ikar lam̧ōj im ekkāke kōn lan̄lōn̄. Ikar m̧ōkajļo̧k n̄an opiij eo an stake im bōke leta eo aō. Joteen eo, ikar kōppeļļo̧ke mijen kūr eo aō im kōjjeļāik baam̧le eo aō ke ikar kūr n̄an jerbal ilo Philippines Cabanatuan Mijen.
Ikar jan̄ kōn lan̄lōn̄ bon̄ōn eo. Mekarta aolep men ko rekar waļo̧k, kōn tōmak im kūtarre jerbal im lōke ilo Irooj, ikar kadedeļo̧k aolep men ko rekar menin aikuj n̄an jerbale juon mijen im kakūrm̧ool ettōnak eo aō. Ikar kile bwe eļan̄n̄e ikar jab ioon apan̄ jab eo m̧okta jān mijen eo aō, emaron̄ kar jab dedeļo̧k aō m̧aanjabpopo ilo kanniōk, en̄jake, jetōb, kōļmenļo̧kjeņ, im jāān. Bōtaab kōnke kōn jekjek ko aō, ikar maron̄ in eddōkļo̧k ilo elōn̄ wāween ko.
Ijeļā bwe Jemedwōj Ilan̄ ewōr an karōk n̄an kōjwōj aolep. Aolep men ko kwoj dibuki emaron̄ jab lōn̄ kōjellier ilo iien ko, im komaron̄ kōņaan bwe men ko en m̧ōkaj aer waļo̧k kiiō jab tok ālik, bōtaab lōke ilo iien eo An ijello̧kin eo am̧. Elan̄n̄e jenaaj lōke E im kōjerbal tōmak im kūtarre jerbal, E enaaj tōl kōj n̄an ikideelel ko ad rejim̧we ilo iien eo ejetjet im jiban̄ kōj eddōkļo̧k ilo iaļ eo (lale Inos 1:12 im Alma 29:4).