Baam̧le eo Aō Ekāāl, Baam̧le eo Aō Em̧o̧r
Rijeje eo ej jokwe kiiō ilo Utah, USA.
Eļan̄n̄e kwoj mour kōn gospel eo, ejjeļo̧k men gospel eo emaron̄ ukote.
Kōmeļeļe ko jān Lobo
Mijinede ro rekar kajutak juon pija. “Ta eo kwoj loe?” rej kajjitōk.
“Juon baam̧le elem̧ōņōņō,” ikar uwaak.
“Aolep baam̧le relem̧ōņōņō ke?”
Ikar kajiboluuli bōra im ba jab. Em̧ōj am̧ lo baam̧le,” baam̧le eo aō,” ikar kōmeļeļeiki.
Kar 16 aō iiō in aō mour ilo Brazil, ijo ikar pād ie aolep mour eo aō. Mijinede ro rekar katakin eō ium̧win jejjo wiik, ak ejjeļo̧k juon ilo baam̧le eo aō ekar kōņaan ron̄jake. Ilo iien eo, mijinede ro ekkā aer lo baam̧le eo aō rej ire im akwāāl. Baam̧le eo aō im baam̧le eo ej ettōn̄ dikdik ilo pija eo rekar jab juon wōt.
Juon iaan elder ro ekar ba, “Ekwe, bolen baam̧le eo am̧ kiiō ejjab āinwōt in. Ak emaron̄ oktak am̧ kaļōk ilju im jekļaj eo an baam̧le eo am̧.
Ke kōm kar kōjem̧ļo̧k loļo̧k eo, rekar bar kajjitōk ippa n̄an jar kōn ta eo eto aer ekkatak kake. Āinwōt iminene kake, ikar jab lukkuun kallim̧ur n̄an kōm̧m̧ane āindein. Ikar m̧ōņōņō kōn en̄jake eo aō kōn lotok eo an mijinede ro, im gospel eo ekar lukkuun kōmeļeļeik eō. Ak ikar jab mijak kōn uwaak ko ikar bōki. Eļan̄n̄e gospel eo em̧ool, inaaj aikuj kōm̧m̧an eļap oktak ko.
Juon Kālet Ekāāl
Ālkin an elder ro etal, ekar jab bōjrak aō ļōmņak kōn baam̧le ko relem̧ōņōņō. Baam̧le eo am elukkuun ettoļo̧k jān jon̄an en. Jema ekar jab pād ilo mour eo aō. Jem̧jerā eo aō ippān jinō ekar jab lukkuun em̧m̧an. Bubu ekar juon eo me ekar lale kōm, ak ejjeļo̧k iaam ekar m̧akūtkūt āinwōt juon baam̧le ilo wāween eo me mijinede ro rekar katakin kōm. Ejjeļo̧k iaam rekar kwaļo̧k aer iakwe doon ak barāinwōt joļo̧k eļap iien ippān doon.
Aolepān mour eo aō ikar kallim̧ur eō make ke inaaj juon baba eo em̧m̧an juon raan. Inaaj erom̧ juon pāāren eo me ijjan̄in kar. Aeet āinwōt an mijinede ro kar katakin eō, ikar jino kile bwe ikar kōm̧m̧an ejja men ko wōt me pāāren ro aō rekar kōm̧m̧ani ke rekar ded jab ke aō. Ikar emmej in bon̄, kōm̧m̧ani kōņaan ko aō, im jokwe āinwōt juon rijum̧ae. Ilo ejjeļo̧k meļeļein, ikar kōm̧m̧an ejja m̧wil kein wōt n̄an ro jinō im jema.
Ekar jejjet iien n̄an kajjitōk ippān Anij.
Āliktata ke ikar jar, ikar bōk uwaak eo eto kōtmene aolep men kein. Kabun̄ in em̧ool! Kiiō ej juon iien n̄an kōm̧m̧an juon kālet.
N̄a eo Ekāāl
Jibu ekar leļo̧k mālim m̧okta jān aō kar peptaij. Ekar makoko kake, ak ikar akweļap.
“Bubu, Leonardo eo rōt eo ekōņaan?” Ikar kajjitōk. “Juon eo ej kadōk im kōbataat im rool in lukwōn bon̄? Ak kwokōņaan n̄a eo me kiiō? Oktak kein rej kōn gospel eo.”
Āliktata bubu ekar errā, im ikar peptaij im kapen. Jān tōre eo, juon men ekabwūlōn̄lōn̄ ekar jino waļo̧k ilo baam̧le eo aō—juon me ikar jab lukkuun kile m̧ae jejjo iiō tokālik.
Juon Baam̧le Ekāāl
M̧okta jān aō kar etal n̄an mijen eo aō ilo turōk Brazil, bubu ekar itok ippa nano kweilo̧k eo eļap an stake. Ālkin wōt kōm kar kōm̧m̧an juon iien kweilo̧k in kwaļo̧k kam̧ool ippān baam̧le im ro m̧ōttam. Ilbōk eo aō, bubu ekar kōņaan ba juon men.
“Jān iien eo Leonardo ekar kobatok ilo kabun̄ in, baam̧le eo aō rekar jino erom̧ juon ekar ba. m̧ool in baam̧le,” ekar ba. Innem ekar kōlaajrake wāween ko an baam̧le epaake doon: Kōm kar kiiō joļo̧k iien ko am ippān doon. Kōm kar jino ba “Ij iakwe eok” n̄an doon, me kōm kar jan̄in kōm̧m̧ane m̧okta. Ire im akwāāl ko rekar jem̧ļo̧k. M̧ool in jem̧jerā ko rekar ejaake ilubwiljim. Ekar lōn̄ kijem m̧ōn̄ā im kar kōjeraam̧m̧an kōm kōn eļapļo̧k ilo eria ko jet.
Ikar barāinwōt kile oktak kein, ak ikar jab kile iien eo emaron̄ kar koneke n̄an iien eo inaaj peptaij.
“Imaron̄ jab erom̧ juon membōr in kabun̄ in ami,” ekar ba, “ak n̄aij juon m̧ōttan kabun̄ eo ami. Im ijeļā bwe baam̧le eo am em̧ōj kōjeraam̧m̧an er kōn kālet eo an Leonardo.”
Juon Meļeļe Ekāāl
Ijjab kar tōmak! Im aeet, āinwōt an bubu kōnono kōn wāween an baam̧le eo am epaake doon, ikar kajju kemeemej pija eo mijinede ro rekar kwaļo̧k n̄an eō iiō ko rem̧ootļo̧k. Jemaan ļo̧k, ikar ļōmņak wāween eo wōt n̄an bōk juon baam̧le elem̧ōņōņō kar ippān baam̧le aō ilju im jekļaj.
Ak ekar bōd aō ļōmņak. Baam̧le eo aō kiiō rekar lem̧ōņōņō! Kōm kar rūtto ļo̧k im iakwe doon.
Bolen ejjeļo̧k iaan baam̧le eo enaaj kobatok n̄an Kabun̄ in ilo mour in. Ak jekdo̧o̧n n̄e rejjab, ijeļā bwe Anij ekar kōjeraam̧m̧an kōj kadede ilo elōn̄ wāween ko. Gospel eo an Jisōs Kraist ej kwaļo̧k n̄an kōj wāween n̄an kōkm̧anm̧anļo̧k baam̧le ko, jekdo̧o̧n jekjek ko baam̧le ko ad repād ie.