Ij En̄jake Aō Kōņaan Armej Ejja Kain E Aō Wōt—Kabun̄ in Enaaj Ke M̧ōņōņō in Bar Karuwaineneik tok Eō?
Pija ko jān Getty Images
Ilo Juļae 27, 2013, ālkin juon iien tariņae aeitok kōn nan̄inmej in Alzheimer, paatnōr eo aō ium̧win 25 iiō ekar jako. Jay Eldridge ekar juon takto in menono eo ebun̄bun̄. Kom̧ro jim̧or kom̧ro kar etal im mijen n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata ke kōm kar dik wōt ak ekar kattoļo̧k e jān Kabun̄ in kōn wōt an bar kōņaan em̧m̧aan.
Mej eo an Jay, men̄e kar jab kōtmene, ekar kaburomōjmōj. Ekar rub buruō im ikar jābwābwe im ajimakeke.
Ke ij rool ilo wa eo n̄an m̧weo ālkin aō kar pepe kōn ilomej eo, ikar en̄jake im̧we eo an Jetōb ekar kobrak eō ilo kajoor jon̄an ikar aikuj jeer jān iaļ eo n̄an tōrerein iaļ eo. Ikar jeļā bwe Anij ekar kōnono n̄an eō, kar kūr eō ļo̧k n̄an E, ak ikar dāpdep wōt. “Kwoj ke lo ke ij en̄taan?” Ikar lamōj im ba. “Ijjab maron̄ rool ļo̧k n̄an kabun̄ in kiiō.”
Ak ilo an ļapļo̧k aō jum̧ae, Jetōb ekar ļapļo̧k kanōk eō, karuwaineneik eō bwe in rooltok n̄an kabun̄ in.
Naaj ke Karuwaineneik Eō?
Ikar lukkuun inepata kōn bar rooltok n̄an kabun̄ in. Ijjan̄in bar pād ilo juon iien kwojkwoj ium̧win 25 iiō. Renaaj ke m̧ōņōņō kake eō? Inaaj ke errā kaki? Ta eo bisop eo enaaj ba? Ikar ikūmkūm im jakoņ aō pād im kar eddodo wōt kōn buromōj.
Ak naan in kam̧ool eo aō kōn gospel ekar jab ebbolool ilo aolep iiō ko. Jay im n̄a kom̧ro kar iakwe Kabun̄ in im pedped in katak in tōl—me rej, iakwe em̧ool, tūriam̧o̧, im jeorļo̧k bōd. Ikar jeļā bwe Kraist ekar aō Rilo̧mo̧o̧r im bwe Kabun̄ eo An ej Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ikar jeļā wōt menin jān iien eo ikar oktak tok im peptaij ke ej 14 aō iiō. Ikar jab tin kariab menin kiiō.
Āliktata, ālkin an pukot peran eo emenin aikuj, ikar ko̧o̧le Linwood Ward ilo New Jersey, USA, n̄an lale jet awa ejinoe iien kwojkwoj eo.
Ke ej epaak tok Jabōt, rikapo eo ekar likūt elōn̄ kein kabūr ko ilo iaļ eo aō me emaron̄ kar pidodo bōbraeiki jān an waļo̧k. Eļap aō kar kam̧m̧oolol bwe Jetōb Kwojarjar ekar kakkōt wot.
Ikar mijak ke ikar deļon̄e m̧ōn jar eo, ak al in kōpelļo̧k eo ilo kweilo̧k in kwojkwoj eo ekar kalikkar tok n̄an eō ke ikar bar jepļaak nan kabijuknen. Al eo “Itok, Itok, Ro Rekwojarjar” (Al, no. 4) ekar karuwaineneik Jetōb jon̄an an kajoor ekar toor dānin kōmjaļaaļ iturin meja. Ikar jeļā ilo iien eo bwe Jemedwōj Ilan̄ ekar jeļā kōn eō im aō burumōj eļap me ikar en̄jake.
Al eo ekar erom̧ juon anthem eo ejjan̄in mālim an Kabun̄ in, ak ekar erom̧ anthem eo aō make.
“Itok,” al ej karuwaineneik eō. “Bolen ial eo ebin kiō ak kom naj bōk An joij.”
Iaļ eo aō ekar pen. Ak jouj ekar pād ippa āinwōt an kar kallim̧ur.
Bisop Darren Bird im aolepān jarlepju eo rekar lukkuun em̧m̧an im jeļā karuwainene. Rekar bar kile eō āinwōt aer brother ilo Kraist.
Kōm̧m̧an koņkōtaan Anij, kōn Kraist
Naan ko ilo “Itok, Itok, Ro Rekwojarjar” ekar ļap meļeļein n̄an eō, ijoke, āinwōt ikar en̄jake Jemedwōj Ilan̄ ej tōl eō kōn wāween aō aikuj wōnm̧aanļo̧k wōt.
Anij ear kapojak jikid,
Ettoļo̧k irālik,
Jo ejelok renaj kakure kōj;
Jenaj bōk jerammōn.
Ikar etal n̄an irālik im wiaki juon m̧ō ilo Fountain Hill, Arizona, USA, ijo ikar ioon Bisop Jerry Olson. Ikar kajjitōk n̄an ioon e im idik pein, Jetōb ekar im̧we eō bwe em̧m̧aan in enaaj jipan̄ bar karooltok n̄a n̄an aolepān m̧akūtkūt ko an Kabun̄ in.
Ke ikar jino loļo̧k bisop eo im jino kōm̧m̧an koņkōtaaō ippān Anij, ikar kam̧ool elōn̄ menin bwūlōn̄ ko an jetōb. Ikar lukkuun epaake bisop eo, eo me ikar lukkuun kam̧m̧oolol kake. Ekar ba bwe in kar jipan̄ e bwe en em̧m̧an an meļeļe kōn jem̧jerā eo aō kar im jem̧jerā eo aō kiiō ippān Anij. Ekar juoj ilo an karon̄ eō bwe ej kab tin juon kōttan an jerbal ippān armej rōt in me ekōņaan bar armej kain en wōt an, im ekar kajjitōk ippa kōn aō kijenmej im jeorļo̧k bōd eļan̄n̄e ekar ba ak kar kōm̧m̧ane jabdewōt men eo me inaaj lel kake ilo an nej kōm̧m̧an wāween jipan̄ in.
Ikar kam̧m̧oolol e kōn an m̧ool im ekar ba, “Ekwe, en̄in ej kab tin bar kein kajuon aō kōm̧m̧an kain rōt in. Jej ekkatak ippān doon.
Kōn menin ekar jino juon iaļ eaibojooj im jem̧jerā em̧m̧an!
Ejjab to ikar kōm̧m̧ane juon karōk kōn wāween aō nej bar erom̧ juon membōr. Ikar m̧ōņōņō kōn kapilōk in ejouj im ikar jar kake kōn juon buruōn kam̧m̧oolol im jino jerbal eo.
Kōmeļeļe ko jān Jenna Palacios
Kaenōm̧m̧an ilo Tampeļ
Tokālik, ke ikar ļoor kapilōk eo im kar lukkuun jerbal n̄an epaake Kraist, ikar bar bōk priesthood eo aō im kōjeraam̧m̧an ko an tampeļ im m̧ōņōņō kōn juon kūr n̄an jerbal ilo doulul eo an elder ro. Ilo tampeļ eo ekwojarjar, āinwōt aō bwebwenato ippān Jemedwōj Ilan̄, ekar kwaļo̧k n̄an eō jon̄an An iakwe aolep ajri ro Nejin. Ikar en̄jake kaenōm̧m̧an im ikdeleel em̧ūlaļ n̄an kabun̄ buruōn E.
Allōn̄ tokālik, kar kūr juon bisop kāāl, eo me ikar barāinwōt ejaake juon jem̧jerā em̧m̧an ippān. Bisop Larry Radfordy ekar jeļā kōn jekjek ko ikar pād ie im ekar lukkuun kam̧m̧oolol kōn jerbal in jipan̄ eo aō ilo doulul eo an elder ro, ijo ekar ba ikar jerbal kōn iakwe im wūjlepļo̧k ejjab n̄an doulul eo wōt ak barāinwōt—im eļapļo̧k an aorōk—n̄an Anij. Naan ko an rejouj im rekōketak rekar jipan̄ eō en̄jake bwe Irooj im armej ro an Rekwojarjar rekar m̧ōņōņō kōn jerbal in jipan̄ ko aō.
Ij kiiō tiljek im jerbal āinwōt juon ward kūļōk.
Meļeļe Wōn N̄a
Kōņaan ejja armej kain e aō wōt im niknik āinwōt juon membōr ilo Kabun̄ in ejjab juon men epidodo. Ak ke ikar likūt aolep aō tōmak im lōke ilo Anij, imaron̄ en̄jake An kōkajoorļo̧k eō. Rikōrraat ro reban pere ilo aer ba bwe ijjab m̧ool n̄an wōn n̄a ak bwe ij kalluik doulul eo an rej kōņaan kōrā kōrā ak em̧m̧aan em̧m̧an ekoba jukjuk in pād eo.
Imeļeļe kōn aer illu, im ealikkar bwe ejjeļo̧k uwaak ippa. Imaron̄ kōnono wōt kōn en̄jake eo aō make. Im bwe en̄jake eo ekar katakin eō menin: N̄a ļaddik eo nejin Anij, juon ajri nejin Anij. En̄ ne ej juon kōkaļļe im emake wōt me elukkuun eaorōk n̄an eō. Āinwōt juon tōprak, ijjab kajjieon̄ kōtļo̧k an kōkaļļe eo an laļ in kwaļo̧k kadkadū. Imijak n̄e enaaj kōm̧m̧an jon̄an maron̄ ko aō im eddōkļo̧k eo aō ilo mour indeeo.
Setan elukkun jimaat. Ejeļā bwe ilo ad kōjerbal kōkaļļe ko, emaron̄ kōjenoļo̧k kōj āinwōt juon jukjuk in pād im āinwōt juon Kabun̄.
Kōn jeļā in ilo kōļmenļo̧kjeņ, jokālet ko ij kōm̧m̧ani rejjab pedped wōt ilo kōņaan an em̧m̧aan em̧m̧aan kōrā kōrā ak kōn wāween n̄an erom̧ rikaļoor eo em̧ool an Kraist kōn en̄jake kōņaan ejja armej kain en aō wōt. Āinwōt an Nipai ba:
“O Irooj, iaar likūt aō lōke ilo Kwe, im inaaj lōke Kwe indeeo. Ij jamin likūt aō lōke ioon pein kanniōk. …
“… Ijeļā bwe Anij enaaj wūjlepļo̧k n̄an e eo ej kajjitōk. Aaet, aō Anij enaaj letok n̄an eō, n̄e ij kajjitōk im jab pere; kōn menin inaaj kotak ainikiō n̄an Eok; aaet, inaaj kūr n̄an Eok, aō Anij, aō ejm̧aan in wānōk. Lo, ainikiō enaaj wanlōn̄ļo̧k n̄an Eok, aō ejm̧aan im aō Anij indeeo” (2 Nipai 4:34–35).
Iakwe an Armej ro Aō Rekwojarjar
Ilo aō kar bar rool tok, ikar en̄jake jem̧jerā eo ejouj an ritōl ro aō im armej ro m̧ōtta rekwojarjar, ekoba membōr ro reniknik im membōr ro rejaniknik LGBT+ membōr ro. Ikar lo juon jikin ijo imaron̄ eddōkļo̧k ie. Ikar lo eō ilubwijlier m̧wil ko an Kraist me ikar ekkeijel wōt ie aolep iien kōn tōmak eo aō: jouj, tūriam̧o̧, meļeļe, im, ilōn̄in aolepāer, iakwe.
Ke ij apan̄ ilo iaļ eo aō n̄an ippān aō Rilo̧mo̧o̧r, ikar en̄jake kaeņōm̧m̧an im aeņōm̧m̧an ke ikar bar rooltok n̄an E, jeļā bwe ikar jab etetal ilo iaļ eo make iaaō. Jejjo bisop rekar jutak likū. Membōr ro an doulul eo aō. Sister ro ilo ward eo. Ekar wōr juon likao ilo ward eo ekar kajjitōk ippa eļan̄n̄e imaron̄ kapit e āinwōt juon pris. Kajjitōk in an ejouj ekar un̄ūr eō. Ekar lo eō āinwōt juon em̧m̧aan ej kabwijer priesthood eo an Anij eo im emaron̄ kōmoururi priesthood in jipan̄ ro jet.
Iien kein rem̧m̧an n̄an jipan̄ im kabun̄ jar ippān armej ro Rekwojarjar rekar ketak eō—ippān ļo̧k elōn̄ kōjeraam̧m̧an ko ikar bōki jān Irooj—ekar jipan̄ eō en̄jake iakwe, meļeļe, im m̧ōņōņō me ikar lukkuun aikuji.
Rilo̧mo̧o̧r ekar ba, “I jāmin likūt kom̧ atajinemjen: I naaj iwōj n̄an kom̧.” (Jon 14:18). Naan kein rem̧ool. Ikar aikuj kaeņōm̧m̧an, im E ekar itok ippa, eļapļo̧k jan jonan jān ke ikar antooneļo̧k.