Ta Aorōk in juon Et?

Juun 29–Juļāe 5

Ālkin oktak tok eo aer, RiLeman ro retiljek rekar kōņaan juon et ekāāl n̄an kōjenolo̧k er make jān RiLeman ro jet im n̄an kōkaļļeik oktak tok eo aer make n̄an Jisōs Kraist. Rekar ņa etaer make Antai-Nipai-Liai (lale Alma 23:16–17). Jej kōjeņoļo̧k kōj make rainin ilo ad bōk iood etan Jisōs Kraist.

Juon Kōkaļļe in Ad Oktak tok

Ilo iien peptaij, jej bujen bōk iood make etan Kraist. Kajjojo iien jej bōk kwojkwoj, jej kōkāāle bujen eo. Ta eo jej bujen kake n̄an kemeemej im kōm̧m̧ane ilo ad bōk iood Etan? (Lale Mosaia 18:8–9; Katak im Bujen Ko 20:77.)

Juon Rikam̧ool an Kraist

Rijilōk ro rej “rikam̧ool ro rejeņoļo̧k ilo etan Kraist ilo aolepān laļ in” (Katak im Bujen Ko 107:23). Jemaron̄ barāinwōt erom̧ rikam̧ool an Kraist. Ewi wāween kwomaron̄ juon wōt ippān rikanaan im rijilōk ro im erom̧ juon rikam̧ool ilo etan Kraist n̄an armej ro ipeļaakūm̧?

Juon Kein Jipan̄ an Kajoor

Raan ko ļo̧k, Būreejtōn Russell M. Nelson ekar kajjitōk ippād n̄an kūr etan Kabun̄ in ilo lukkun jim̧we in etan: Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ekar kallim̧ur bwe kajoor enaaj lutokleplep ioon Armej ro Rekwojarjar ilo ad kōm̧m̧ane āindein (lale “Jim̧we in Etan Kabun̄ in,” Liaona, No̧b. 2018, 89). Ta jet men ko kwomaron̄ kōm̧m̧ani n̄an kōkm̧anm̧anļo̧k kilen kōjerbal et eo ejim̧we etan Kabun̄ in im jipan̄ ro jet kōm̧m̧an ejja āindein?