Wāween Aō Maanjabpopo n̄an juon Tampeļ ilo India

Jān Yeshwanth Kosireddy

Ikar baj kōnaan wot etal n̄an tampeļ. Kiō ke emōj an rikanaan eo kwalo̧k kōn juon tampeļ ilo India, ij reim̧aanļo̧k n̄an bōk kain̄i ko ijin.

Rūttoļo̧k ilo India, baam̧le eo aō im n̄a kar Hindu. Kar jepooļ eō iien otemjej kōn tōmak eo bwe ewōr kar anij ko rellōn̄ n̄an nebar er. Ke iaar dik, ekar barāinwōt wōr m̧ōtta ro rekar Rikūrijin. Rekar ba n̄an na kōn juon wōt Anij eo ekar kōm̧anm̧an laļ im aolep armej. Ikar jino lōmņak etke ikar kabun̄ n̄an elōn̄ anij ko, ne ro jet rej tōmak ilo juon wōt.

Ke ikar ped ilo high school, ikar ped ilo jet imenene renana. Ekar ikutkut aō daak, ikar lukkun nana, im baam̧le eo aō rekar inepata kōn m̧wil eo aō. Kiō ikar etal im jinoe juon mour ekāāl ilo Hyderabad, juon jikin elōn kain peļļo̧k ko n̄an jerbal.

Ikar jino būrom̧ōj im make iaaō kōn wāween mour eo aō. Ako juon raan ikar ioone ruo em̧m̧aan. Raar kōmeļeļe bwe rej jet mijenede jān Kabun̄ eo an Jisōs Kraist im Armej ro Rekwojarjar ilo Raan Ko Āliktata im ba n̄an na kōn gospel eo an Jisōs Kraist. Im bar juon alen ikar katak kōn juon wōt Anij, eo ekar kōm̧m̧ane juon karōk in mōņōņō n̄an aolep ajri ro Nejin. Ennaan eo aer ekar m̧ōkaj an kobrak eō kōn m̧ōņōņō im kōjatdikdik. Iaar kōņaan katak eļapļo̧k.

Emōj kio aō erom̧ juon membōr in Kabūn in jiljilimjuon iiō kiiō. Emōj aō oktak, emōj aō kam̧ool kabūlōn̄lōn̄ ko ilo mour e aō, im eļap aō kar ekkatak kōn gospel in. Em̧m̧an ippa m̧ōņōņō eo ej boktok n̄an n̄a. Ak ewōr juon m̧ōttan eo aurōk ilo gospel in ijjan̄in ioone—tampeļ eo.

Jān jinoin aō kar katak kōn tampeļ eo, ikar kōņaan etal n̄an e n̄an katak im en̄jake Jetōb, n̄an liāp ippān baam̧le eo aō n̄an indeeo, im n̄an kōm̧m̧an bujen ko ippān Irooj. Ako ejeļo̧k tampeļ ko ilo India, im ejjan̄in kar wōr juon iien em̧m̧an n̄an aō etal n̄an juon. Elōn̄ uwaan Armej ro Rekwojarjar ilo India im iar jar jar ko rellōn̄, kōm ekar jitlo̧k, im kōm ekar dāpdepļo̧k ilo kijenmej im tōmak bwe juon raan enaaj wōr juon tampeļ kalōk ilo India.

Ilo Eprōl 2018 kweilo̧k eo eļap, Anij ekar uwaak e jar ko am āinwōt an kar Būreejtōn Russell M. Nelson kar kōjjeļāik bwe enaaj ekkal juon tampeļ ilo Bengaluru, India. Ijjāmin naaj meļo̧kļo̧k raan eo. Jetōb eo ekar kobrak buruō kōn lan̄lōn̄ im meja kōn dān in kemjaaļaļ ilo naan ko an rikanaan eo. Ikar m̧ōkaj im kam̧oolol Jemedwōj Ilan̄ kōn an uwaake jar ko am. Im ilukkuun em̧ōņōņō bwe imaron̄ kiō loe im deļon̄e tampeļ eo ilo jejjo iiō ko jān kiiō.

Ilukkuun m̧ōņōņō im bun̄-būruō bwe ij juon membōr in Kabun̄ eo an Jisōs Kraist Ijeļā bwe Irooj ekar kōjepļaaktok gospel eo em̧ool ilo laļin kōn Rikanaan Joseph Smith. Ijeļā bwe tampeļ eo ej jikin eo jemaron̄ eddōkļo̧k n̄an epaake Anij, liāp ippen baam̧le ko ad, im katak eļap kōn un eo ad. Im ilo aō kōttar an tampeļ eo ekkal ijin ilo India, Ij lukkuun buuļ jerbal n̄an kepooje n̄a make n̄an redeļo̧n̄e.

Ij jar im katak jon̄an wōt aō maron̄ kōn tampeļ eo, bujen ko inaaj kōm̧m̧ani, im kain̄i ko inaaj bōk ilo tampeļ.
Ij kajjitōk ippān membōr ro jet em̧ōj aer pād ilo tampeļ n̄an naan in rōjan̄ n̄an wāween m̧aanjabpopo ilo jetōb.
Ij katak wāween kōm̧m̧ane jerbal in menmenbwij bwe in maron̄ boktok etan ro jibū im jim̧m̧aō ro etto n̄an tampeļ eo.
Ij kobaļo̧k ilo kūlaaj in m̧aanjabpopo eo n̄an tampeļ.

Ikōņaan bwe in bojak n̄an raan eo imaron̄ kiō deļo̧n̄e tampeļ eo im kōm̧m̧an bwe en juon men eo aorōk ilo mour e aō. Inaaj kate eō n̄an erreo iien otemjej n̄an deļo̧n̄e bwe in maron̄ bōk kōjeraam̧m̧an ko em̧ōj kallim̧ūr kaki, tōl, im uwaak ko n̄an jar ko aō eto aō kottari. Ikijooror n̄an raan eo.