Kōttar wōt Kallim̧ur Eo
Leddik eo nejū ekar kattoļo̧k e make jān Kabun̄ in, ak ijeļā bwe jenaaj jeraam̧m̧an kōn men ko kar katakin e kōn gospel eo.
Kōmeļeļe ko jān Megan Schaugaard
Jilu allōn̄ m̧okta jān an kar 21 an iiō, ikar peptaij ippān sister eo aō, jinō, im ļaddik eo nej nejū me 8 an iiō. Ium̧win iiō ko, kōm kar dāpdep wōt ilo gospel eo jekdo̧o̧n apan̄ ko am rellōn̄.
Ke ļeo pāleeō im n̄a kom̧ro kar m̧are, kōm kar kālet bwe kōm en kajoor wōt ilo Kabun̄ in. Ke ekar lōn̄ nejim, ļeo pāleeō im n̄an kom̧ro kar kajjieon̄ bwe kom̧ro en m̧am̧a im baba ro rem̧m̧an im n̄an katak in gospel ilo m̧weo im̧ōm̧.
Juon raan ikar pād ilo juon kweilo̧k ippān leddik eo nejim me juon an iiō. Ilo kweilo̧k eo, juon Eria Jiljilimjuonn̄oul ekar kōnono kōn eddo ko an m̧am̧a im baba ro n̄an katakin gospel eo n̄an ajri ro nejier. Innem ekar kōm̧m̧an juon kallim̧ur me ekar lukkuun im̧we eō. Ekar ba: “Eļan̄n̄e, ālkin aolep men kwomaron̄ kōm̧m̧ane n̄an katakin gospel eo, juon iaan ajri ro nejim̧ rej etal jān Kabun̄ in, renaaj jeraam̧m̧an wōt kōn men ko rej kemeemeji me rekar loi ilo m̧weo.”
Naan ko an Eria Jiljilimjuon̄oul eo ekar kobrak aō kōn kōjatdikdik kōnke ekar wōr nej nejū leddik im ļaddik ro me rekar etal jān Kabun̄ in. Iiō ko tokālik leddik eo nejū, ejja leddik eo wōt me juon an iiō ikar jibūrlep e ilo iien kweilo̧k eo, ekar etal jān Kabun̄ in ke ej 17 an iiō. Ekar ioon juon eo me ekar jab rūttoļo̧k ilo gospel in, im rekar m̧are. Ekar jab bar rool tok n̄an kabun̄ in jān iien eo.
Ekar juon me ekar lukkuun kōmetak eō. Ikar kajjitōk ippa make elōn̄ kōttan ta eo ikar kōm̧m̧ane ebōd. Jemān im n̄a kom̧ro kar aolep iien kajjieon̄ kōjparok kien ko an im bōk koņaam ro ilo Kabun̄ in. Kōm ej iakwe ajri ro nejim im kōm kōņaan men ko rem̧m̧antata n̄an er. Ālkin elōn̄ dān in kōmjaļaaļ im kajjitōk ko, jekar itok n̄an jem̧ļo̧kin ke ajri ro rej rūttoļo̧k, rej kōjerbal anemkwōj in kālet ko aer im ejjab aolep iien rej tōmaki men ko me kar katakin er ilo m̧ōko.
Buromōj eo, m̧are eo an leddik eo nejū ekar rūb, im ekar jab kōņaan rool tok n̄an Kabun̄ in. Aolep men ko imaron̄ kōm̧m̧ani ej kemeemej kallim̧ur eo bwe enaaj kemeemej im enaaj jeraam̧m̧an kōn men ko me kar katakin e ilo m̧weo.
Ij wōnm̧aanļo̧k wōt im jar kōn leddik eo nejū. Ak ijeļā bwe, jekdo̧o̧n m̧ōjņo ko aō, men ko ikar katakin e rejim̧we im rem̧ool. Ijeļā bwe Jemedwōj Ilan̄ ejim̧we im ej iakwe kōj im bwe Ej ron̄jake jar ko ad. Ijeļā bwe Jemedwōj Ilan̄ enaaj letok n̄an kōj māletlet im peran eo n̄an jelm̧ae apan̄ ko. Ejjeļo̧k pere ilo buruō, ijeļā bwe eļan̄n̄e ij kōm̧m̧ane ijo koņaaō, Enaaj uwaake er ilo iien eo Ej lo bwe ejim̧we.