2020
Ewōr ke Am̧ Kajjitōk kōn Gospel eo? Erkein Ļalem Wāween ko n̄an Kappukōt Uwaak ko
Juļae 2020

Digital Wōt

Ewōr ke Am̧ Kajjitōk kōn Gospel eo? Erkein Ļalem Wāween ko n̄an Kappukōt Uwaak ko

Jān Chakell Wardleigh

Māākjiin ko an Kabun̄ in

Ewōr aō bar kajjitōk. Im ejjeļo̧k jabdewōt men n̄an mijak kake.

“Ewōr ke an jabdewōt kajjitōk ko?”

Emōj ke am̧ ron̄ men in ilo jemļo̧kin juon katak im̧ ļōmņak, “Aaet, em̧ōj milien kōttan” ak “Aaet, ilukkuun peļo̧k,” bōtaab kwoj ikōn̄ wōt?.

Em̧ōj aō kōm̧m̧ane. Im jet iien ij wōt mijak kōn an lōn̄ aō kajjitōk.

Ij mijak kōn an jabwe aō jeļā, kōn ta eo ro jet remaron̄ ļōmņak, im lo meļeļe ko me remaron̄ letok n̄an eō em̧ool elōn̄ļo̧k kajjitōk ko.

Jekdo̧o̧n ta, ejjab aikuj wōr mijak ak jook ilo an wōr kajjitōk im kōņaan meļeļe eļapļo̧k, eļap tata n̄e ej itok n̄an gospel eo. Jemedwōj Ilan̄ ekōņaan bwe jen kappukot eļapļo̧k jeļāļo̧kjeņ! Jon̄an Elder Dieter F. Uchtdorf ekar ba, “Kajjitōk kajjitōk ko ejjab juon kōkaļļein m̧ōjņo̧; ej juon ijjino n̄an eddōkļo̧k.”1

Aolep ewōr ijo eļapļo̧k n̄an ekkatak. Im kajjitōk ko rej kōpeļļo̧k kōjām eo n̄an jeļāļo̧kjeņ im eļapļo̧k tōmak—wo̧o̧n wōt am̧ kappukōt uwaak ko ilo wāween ko rejim̧we! Erkein wāween ko ļalem n̄an kadikļo̧k an tarpok kajjitōk ko am̧.

1. Etale Kein Bōk Meļeļe eo Am̧

Ekanooj lōn̄ jikin bōk meļeļe ko rem̧m̧an n̄an lōke bwe emaron̄ lewaj n̄an eok eļapļo̧k kōļmenļo̧kjeņ āinwōt jeje ko rekwojarjar im bok in kein katakin ko an Kabun̄ in. Ak elōn̄ barāinwōt bujin meļeļe ko rejjab m̧ool im kein jerbal ko rej binej m̧ool eo ilo laļ in barāinwōt. Jeraam̧m̧an eo komaron̄ kile m̧ool jān m̧oņ!

Anthony Sweat, juon assistant professor an Church history and doctrine ilo Brigham Young University, ej letok ļalem kajjitōk ko n̄an kajjitōk ilo jokāālet eļan̄n̄e juon kein bōk meļeļe maron̄ lōke:

  1. Ej ke kein bōk meļeļe m̧oktata?? (Kar je ak kar kōm̧m̧ane jān juon eo me ekar bōk koņan ak etale iien eo.)

  2. Ej ke juon akkaun ej waļo̧k ilo iien eo wōt? (kar rekoote ilo ak iturinļo̧k iien m̧akūtkūt eo.)

  3. Ewōr ke juon an jibadbad eo em̧ool? (Jon̄an wōt an maron̄, rijeje eo ekar lukkuun pukot bwe en āinwōt juon, jon̄an wōt juon, ejjab bōk wōt raņ, ejim̧we an jerbal.)

  4. Ta kadkad eo an n̄an kein bōk meļeļe ko jet? (Raan, allōn̄, iiō ko, m̧ool ko, men ko kwaļo̧k, ak ko eierļo̧k rej jokkun wōt juon ippān kein bōk meļeļe ko jet rej kwaļo̧k kōn ejja m̧akūtkūt ko wōt.)

  5. Men ko ej ba kein kam̧ool eo ej rie? (Ennaan ko rej pedped wōt ioon kein kam̧ool ko repen im nōm̧ba ko rej rie.)2

Elder Jeffrey R. Holland jān Doulul eo an Jon̄oulruo Rijilōk ro ekar katakin, “Ikkijeen tōmak im kijejeto, ejipan̄ n̄an bokļo̧k kajjitōk eo am̧ n̄an ro me ilo m̧ool ewōr aer tōmak im kijejeto!”3 Naan ko an im kajjitōk ko itulōn̄ remaron̄ lewaj n̄an eok lōke eo ilo kappukōt meļeļe ko kar lōki.

2. Pedped ioon Naan ko an Rikanaan ro

Rikanaan im rijilōk ro rej kamālim katak im m̧ool eo (im kōn menin uwaak ko n̄an kwe!) kōn revelesōn. Kar kaenōm̧m̧an eō elōn̄ alen ko jān riit ak ron̄jake juon ekōnono an kweilo̧k eo eļap n̄e ij tarpok ak inepata.

Men̄e kwojjab meļeļe aolep men kōn jet iaan ennaan ko an ritōl ro an Kabun̄ in, keememej bwe naan ko aer rej itok jān Jemedwōj Ilan̄—rej itok jān juon kein bōk meļeļe an iakwe im m̧ool. Eļan̄n̄e kwoj keememej im lōk naan ko an Elder Ulisses Soares: “An wōr juon rikanaan ej juon kōkkaļļe an iakwe eo an Anij n̄an ajri ro Nejin.,”4 kwonaaj bōktok kōjatdikdik n̄an mour eo am̧, jekdo̧o̧ņ ta ta jeļāļo̧kjeņ eo kwoj kappukōte.

3. Ekkatak Jeje ko Rekwojarjar … lukkuun Ekkatak

Ewi kōjāllin ekkatak jeje ko rekwojarjar am̧? Ekkatak eo aō aikuj em̧m̧anļo̧k! Bōtaab n̄e ij m̧ool in kejōkļo̧kjeņ kōn ta eo ij riiti, ij kile juon oktak ilo mour eo aō. Ij en̄jake eļapļo̧k aenōm̧m̧an im kōjatdikdik. N̄an kapeļļo̧k kōlmenļo̧kjen eo am̧ n̄an im̧we eo ilo jeje ko rekwojarjar, kajjieon̄ e kein jipan̄ kein:

  • Jino im kōjem̧ļo̧k ekkatak eo am̧ kōn jar. Ilo am̧ karuwaineneiktok Jetōb eo n̄an jipan̄ eok meļeļe, kwonaaj kile kōļmenļo̧kjeņ ko im en̄jake ko reļļapļo̧k.

  • Je en̄jake ko kwoj būki. Riiti im̧we kein tokālik emaron̄ jipan̄ eok kōm̧m̧ani kobaik ko ilo mour eo am̧ im kile uwaak ko ilo iien ko.

  • Bōk jidik iien n̄an ikōn̄ wōt. Jijet ikōn̄ im kanooj leļo̧k am̧ n̄an ļōmņak ko im en̄jake ko rej waļo̧k im bar waļo̧k ālkin am̧ riit im ekkatak. Keememej, Jetōb eo ej kōnono kōn juon ainikien elur, im emera.

4. Ekkatak Ekōjkan Bōk Revelesōn

Ilo iien in ilo mour in, eļapļo̧k aō aikuji Jemedwōj Ilan̄ jān m̧okta n̄an tōl eō im jipan̄ eō kōkajoorļo̧k tōmak eo aō. Im em̧ōj aō kar inepata jet iien n̄e ij kōm̧m̧ane aolep men n̄an karuwaineneiktok Jetōb eo im ikab de jab bōk jabdewōt uwaak ko jān lan̄. Kam̧m̧oolol, ikar ekkatak jān Sister Sheri Dew, kar Rikakpilōklōk eo Kein Karuo ilo Būreejtōnji eo Eutiej an Doulul eo an Kōrā ro, bwe n̄an kōppeļļo̧k iaļ in kōnono ko ippān Jemedwōj Ilan̄, kajjitōk ippam̧ make kajjitōk kein:

  • Kajjitōk ko am̧ rej ke kajjitōk ilo kōjatdikdik bwe ewōr uwaak ko?

  • Kwoj m̧ōņōņō ke in lōke Irooj im ļōmņak em̧m̧an tata kōn E?

Innām kajjitōk ippān Jemedwōj Ilan̄:

  • N̄an katakin eok wāween An ekōnono n̄an eok make.

  • Wāween an en̄jake kōn eok.

“Innām lale wāween An katakin eok,” ekar ba. “koba jeje ko rekwojarjar em̧m̧an ippem, ennaan ko ilo kweiļo̧k eo eļap kwar jab maron̄ ron̄jaki jinoin, im ko jet. … Jān iien n̄an iien, E enaaj ba n̄an eok, im āinwōt An kōm̧m̧ane, kwonaaj ekkatak eļapļo̧k kōn kile revelesōn kōn Jetōb.”5

Kajjitōk kein ruo raorōk rekar kōm̧m̧an oktak eļap ilo maron̄ eo aō n̄an kile im bōki revelesōn.

5. Dāpij Ta eo Kwoj Jeļā

Jet iien uwaak ko rejjab m̧ōkaj aer itok. Uwaak eo am̧ kiiō emaron̄ n̄an lōke Jemedwōj Ilan̄ im kwon kijenmej. Keememej naan in rōjan̄ eo an Elder Dieter F. Uchtdorf “pere pere eo ami m̧okta jān am̧ pere tōmak eo ami.”6

Eļan̄n̄e kwoj en̄jake ebbweer, ļōmņak kōn m̧ool ko kwoj dāpiji ilo būruōm̧. N̄e ej pen to n̄an n̄a, ij keememej iien ko ke ikar jeļā kōn alikkar bwe ij juon jiron̄ ejitōnbōro nejin Jinedwōj im Jemedwōj Ilan̄, bwe Anij ewōr an karōk n̄an n̄a, im bwe Jisōs Kraist ej aō Rilo̧mo̧o̧r.

N̄e ewōr am̧ kajjitōk ko, emaron̄ pidodo n̄an pedped ioon ta eo kwojjab meļeļe jān ta eo kojeļā. Bōtaab eļan̄n̄e kwoj m̧ōņōņō n̄an kapidodoikļo̧k būruōm̧, dāpij wōt kōļmenļo̧kjeņ indeeo, im kajookkun wōt juon ilo ettā ankilam̧ ippān ankilaan Jemedwōj Ilan̄, E enaaj iien otemjej tōl eok n̄an m̧ool eo im lewaj n̄an eok kōjatdikdik eo m̧ae iien ļapļo̧k in jeļāļo̧kjeņ ej itok. Im juon raan, kwonaaj bōk uwaak ko n̄an aolep kajjitōk ko am̧ (lale Katak im Bujen Ko 101:32–36).

Kakeememej ko

  1. Dieter F. Uchtdorf, “The Reflection in the Water” (Church Educational System fireside for young adults, Nov. 1, 2009), broadcasts.ChurchofJesusChrist.org.

  2. Lale Anthony Sweat, Seekers Wanted: The Skills You Need for the Faith You Want (2019), 11–20.

  3. Jeffrey R. Holland, “Ennaan eo, Meļeļe eo, im Jarlepju eo,” Liaona, Nob. 2019, 6.

  4. Ulisses Soares, “Rikanaan ro rej kōnono kōn kajoor in Jetōb Kwojarjar,” Liaona, Māe 2018, 99.

  5. Sheri L. Dew, Worth the Wrestle (2017), 8, 9, 41.

  6. Dieter F. Uchtdorf, “Itok, Kobatok Ippām̧,” Kweilo̧k eo Eļap, Nob. 2013, 23; lale barāinwōt Jeffrey R. Holland, “Irooj, Ij Tōmak,” Liaona, Māe 2013, 93–94.