Kāālet eo an Lila
Rijeje eo ej jokwe ilo Corrientes, Argentina.
“Ānbwinnū ej tampeļ eo Jema ekar letok n̄an eō” (Children’s Songbook, 153).
Lila ekar kōņaan bwe en kālet men eo jim̧we.
“Eiien riit jeje ko rekwojarjar!” Lila ekar ba.
Lila ekar em̧m̧an ippān riit n̄an leddik eo jatin edik, Ánika, im ļaddik nin̄nin̄ eo jatin, Svetan. Ejjab to Lila enaaj bar peptaij! N̄an pojak wōt, ekar kōņāan bwe riiti jeje ko rekwojarjar aolep raan.
Lila ekar kōpelļo̧k bok in bwebwenato kōn jeje ko rekwojarjar ilo jinoin peij eo. Ánika and Svetan rekar atartar turin doon bwe ren maron̄ lo pija ko.
“Lukkuun ron̄jake kōnke ij pojen kajjitōk ippamiro kajjitōk ko ālkin wōt,” Lila ekar ba. Innem ekar jino riit jepta eo jinoin.
“M̧okta jān am kar ļotak, jekar jokwe ilo lan̄,” Lila ej riit. “Ejjan̄in kar wōr ānbwinnid. Jekar jetōb wōt.”
Lila, Ánika, im Svetan rekar reiļo̧k n̄an pijaan armej ro rej nuknuk mouj.
“Pojak n̄an kajjitōk eo kein kajuon?” Lila ekar oktak tok n̄an Ánika. “Ia eo kwoj itok jān e m̧okta jān am̧ kar ļotak tok?”
Ánika ekar kabbokbok. “Lan̄!”
“Ejim̧we,” Lila ekar ba. Im ia eo Svetan ekar itok jān e?”
“Ekar bar itok jān lan̄,” “Ánika ekar ba. Svetan ekar ettōn̄ im likūt dukwaļ in pein ilowaan lo̧n̄iin. Lila im Ánika rekar ettōn̄. Svetan ekar juon leddik juon an iiō im lukkuun likatu ilo Argentina!
“Aolep baam̧le eo am rekar itok jān lan̄,” Lila ekar ba. “Jisōs ekar barāinwōt kōm̧m̧ane. Ekar itok n̄an jipan̄ kōj bwe jen maron̄ bar mour ippān Jemedwōj Ilan̄.” Lila ekar jitōn̄ļo̧k pijaan Jisōs ilo peij eo.
Ālkin an dedeļo̧k aer riit, Lila ļōmņak kōn enej elmen im āinwōt ta n̄an mour ippān Jisōs lan̄. Ekar kōņaan bwe en erom̧ āinwōt E. Ekar kōņaan bwe en kālet jim̧we eo aolep iien!Emaron̄ lukkuun pen n̄an kālet ta eo ejim̧we!
Raan eo tok juon ilo jikuuļ, lojeen Lila ekar jan̄ ke ej kōttar ilo lain eo n̄an mabun̄ in jibbon̄. Ekar maron̄ edjon̄e empanadas eo ko em̧ōj an Señora Ruiz mwijmwijti m likit ilo pileij. Relukkuun enno̧!
Señora Ruiz ekar tein̄ļo̧k juon kap in milik n̄an Lila. O, Lila ekar ļōmņak. Milik eo ilo kalimjōke āinwōt eddo kaļar eo an jān m̧okta. Jet iien jikuuļ eo an ej illik kope ak ti ilo dān in idaak ko.
“Elōn̄ ke jabdewōt kope ak ti ilo milik ne an rainin?” Lila ekar kajjitōk.
Señora Ruiz ekar baeiki. Jidik kope, ekar ba. “Kwojjan̄in bar edjo̧n̄e.”
Lila ekar bar ļōmņak jidik. Ekar kemeemej wāween an kar kōņaan bwe en erom̧ āinwōt Jisōs im kālet jim̧we eo. Ekar jeļā bwe idaak kope ekar juon men eo me rikanaan ro rekar ba ren jab kōm̧m̧ane.
“Ijjab, kom̧m̧ol. Iban idaak milik rainin,” Lila ekar ba. Ekar reiļo̧k n̄an Señora Ruiz im ettōn̄ dikdik. Innem jijet laļļo̧k im m̧ōn̄ā.
Bon̄on eo, Lila ekar jipan̄ Papi kwaļ kōnno ko ilo m̧ōn kuk eo. Ekar ļōmņak wōt kōn bwebwenato ko ilo jeje ko rekwojarjar. Ekar ļōmņak kōn bar milik eo.
“Papi?”
“Aaet?” Papi ekar ba.
“Etke Jemedwōj Ilan̄ ekōņaan bwe en wōr ānbwinnid?”
Papi ekar ļōmņak ke ej bar kwaļi pileej ko jet. “Ekwe, Ekar letok ānbwinnid bwe jen maron̄ erom̧ āinwōt E,” ekar ba. “Ānbwinnim̧ ej m̧weo im̧ōn jetōb eo am̧. En̄in meļeļe eo ne n̄e jej ba ānbwin ko ad rej tampōļ ko.”
Lila ekar emajidjid. Ekar al juon al kōn men in ilo Būraimere jet iien! “En̄in unin an Jemedwōj Ilan̄ kōņaan bwe jen kōjparok ānbwinnid?”
“Lukkun jejjetin ne,” Pappi ekar ba.
“Rainin ilo jikuuļ, rej illik jet kope ilo milik ko,” Lila ekar ba. “Ikar jab idaake. Ij kajjieon̄ kōjparok tampeļ eo aō.”
“Eļap an utiej buruō kōn eok,” Pappi ekar ba. Ekar kōmōrāiki pein kōn juon to̧o̧l im atbokwo̧j e.
Lila ekar bar lukkuun atbokwo̧je tok. Ekar lukkuun em̧ōņōņō n̄an kōjparok ānbwinnin me Jemedwōj Ilan̄ ekar leļo̧k n̄an e. ●