Iien ko Ad Make
Juon Unoojdikdik ejjab Jem̧ļo̧k
Kōmeļeļe ko jān Toby Newsome
Juon raan ke ikar kōm̧m̧ane jerbal in mijenede ilo juon kepoon in iaļ ebwūn̄aln̄al ilo Kenya, kōmpānien eo aō im n̄a kom̧ro kar kōnono kōn juon kōrā. Ekar bōk bok jidikdik eo jekar leļo̧k n̄an e ak ekar jab n̄an kōm bwe kōm en jab bar roolļo̧k.
Jejjo raan tokālik jekar lo kōm kar bar pād ilo ejja kepoon in iaļ eo wōt, im ekar itok juon im̧we n̄an kōm bwe kōm en bar loļo̧k. Ikar kajjitōkin eō make, “Etke jej bar roolļo̧k ke ekar ba jen jab bar roolļo̧k?” Ak kōm kar pokake unoojdikdik eo.
Ekar bwūlōn̄ ke kōm kar bar etal ak ekar bar bwe elukkuun em̧ōņōņō in bar lo kōm. Kōm kar jino katakin e juon katak, ak ejjab to ekar oktak n̄an akwāāl. Kōmpānien eo m̧ōtta im n̄a kom̧ro kar kili katak eo kōn jar im rool, kom̧ro kar jim̧or errā bwe komro ejjab bar roolļo̧k. Ak raan eo tok juon, kōm kar bar en̄jake juon im̧we ekajoor n̄an bar loļo̧k. Ikar jab kōņaan bar loļo̧k, ak kōmpānien eo aō im n̄a kom̧ro kar aikuj ron̄jake Jetōb eo. Kōn menin ikar oran̄ļo̧k utiej bōro eo aō, im bar rool likļo̧k. Ke kōm kar tōparļo̧k, ikar ilbōk. Kōrā eo ilo kalimjōke āinwōt juon armej eoktak. Paaktokin ekar oktak, im ekar kōņaan ron̄jake ta eo ren kar tin ba, Ilo iien loļo̧k eo am tok juon, ekar kajjitōk n̄āāt emaron̄ peptaij.
Emen wiik tokālik, ekar peptaij im erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata Ālkin aer kapen, ekar atbokwo̧j kōm im ba n̄an kōm bwe eļap an kam̧m̧oolol kōnke kōm kar bar jepļaak n̄an ippān. Ikar ekkatak bwe jej aikuj ron̄jake im kōm̧m̧an ekkar n̄an unoojdikdik ko aolep iien. Jemedwōj Ilan̄ ej kōpooj ajri ro Nejin n̄an bōk gospel eo, im E ej kōjerbal aolep kōj n̄an kappukōt er kōn Jetōb Kwojarjar.
Leaha M., KwaZulu-Natal, South Africa
N̄aat eo Imaron̄ Kobatok ilo Kabun̄ in?
Ke ekar ļalem jima aō iiō, jema ekar jako tōmak eo an im ekar kālet bwe en etal jān Kabun̄ in. Ekar lukkuun pen, eļaptata ke ekar jejjet ruwalitōk aō iiō. Ikar lukkuun m̧ōņōņō in peptaij, ak jema ekar ba jaab. Ekar kōņaan bwe in kōttar m̧ae irūtto bwe in lukkuun jeļā ke kar lukkuun kōņaan eo aō eo. Im kōn menin ikar alooje āinwōt an ro m̧ōtta kar peptaij.
Ij keememej aō lukkuun pok—eļan̄n̄e Kabun̄ in em̧ool, etke ikar bōjrak jān aō kar peptaij? Āinwōt juon jodikdik, ekar lukkuun pen aō kalimjōk an aolep jodikdik ro etal n̄an tampeļ kōnke ikar lukkuun kōņaan etal. Ekar lukkuun pen aō bōk koņaaō, ak ikar jeļā bwe enaaj bar itok wōt iien eo aō!
Ilo Māe 2019, āliktata ikar peptaij ke ej 16 aō iiō. Ikar kemeemej e elōn̄ en̄jake ko ikar en̄jaki kōn lan̄lōn̄ eo erreo an gospel eo im bōk juon naan in kam̧ool. Ekar juon en̄jake elukkuun jeņoļo̧k, im kōn aolep apan̄ ko ikar jelm̧aeiki n̄an tōpar raan eo, ikar jeļā kōn aolepān buruō bwe gospel in em̧ool im ekar baj m̧ool wōt.
Trinity C., Colorado, USA
Un eo n̄an Ruul koUn eo n̄an Kōjatdikdik eo Ad
Ikar lukkuun m̧ōņōņō in etal n̄an kweilo̧k ko reļļap an jodikdik ro, ak ikar lo bwe elukkun lōn̄ ruul ko—n̄an waanjon̄ak, ejjeļo̧k taļeboon im ejjelo̧k diwōj nabōjļo̧k make iaan. Ilo kalimjōke rūtto ro rekar mejmej karuoik kōm. Ak ekar juon iien eo em̧m̧an ippa, ekar lukkuun lōn̄ m̧ōtta, kar jerbal ilo jet būrajāāk in jipan̄ ko, im kar ekkatak kōn gospel eo.
Ilo juon iien kweilo̧k in kwaļo̧k kam̧ool ko ad ilo raan eo āliktata in kweilo̧k eo eļap an jodikdik, juon iaan ritōl ro rekar ekōnono kōn jon̄an an iakwe kōj, jodikdik ro ilo stake eo.
Eļan̄n̄e kwoj iakwe kōm, etke elukkuun lōn̄ ruul ko? Ikar ļōmņak. Ejja ilo iien eo wōt, āinwōt emaron̄ jeļā ta eo ilo kōļmenļo̧kjeņ eo aō ekar uwaake kajjitōk eo aō.
Ritōl ro rej letok ruul, ekar ba, ejjab n̄an kabōņōņōik kōj ak n̄an jokne eo ad. Iien eo ekar ba menin, kar un̄ūr eō kōn Jetōb. Ikar lukkuun meļeļe bwe Jemedwōj Ilan̄ ej letok kien ko n̄an kōj kōn ejja un eo wōt. Rejjab kabōņōņōik kōj; rej n̄an jipan̄ kōj jepļaaj n̄an Ippān ilo jokne (lale Katak im Bujen Ko 82:2–9).
Jetōb Kwojarjar ekar un̄ūr eō im ekar jipan̄ eō jeļā ta bwe menin em̧ool.
Serge P., Île-de-France, France