Baiļat eo Eperan an Ritariņae ro
Ejjeļo̧k en ekar uwaake rūkaki in kaminene eo an ritariņae, ak bwūlōn̄ eo, juon likao ekar kajutak pein.
Kōmeļeļe jān David Malan
Elōn̄ iiō ko rem̧ootļo̧k, ikar kobaļo̧k ilo United States Air Force n̄an jerbal n̄an laļ eo aō. Ejjab to ikar lo n̄a make ilo jikin kaminene an ritariņae eo ilo Texas, USA Wiik ko rem̧ootļo̧k ke ij jelm̧ae elōn̄ men ko ak juon wōt en̄jake ikar en̄jake ilo jikin kaminene an ritariņae ro.
Juon raan ikar pād ilo juon iien kweilo̧k eļap an elōn̄ļo̧k jān 20 baiļat ro, aolep ro kamineneik er rej āinwōt n̄a. Kweilo̧k eo ekar jino ippān juon iaan rūkaki in kaminene an ritariņae—eo ekkā an lam̧ōj im kanijnij—būron̄, “Elōn̄ jabdewōt ejjab errā kōn wāween aō kamineneik kom̧?”
Em̧ool, ejjeļo̧k en ekar uwaake rūkaki in kaminene eo an ritariņae, ak bwūlōn̄ eo, juon likao ekar kajutak pein.
“Baiļat en, jutak!” rūkaki eo ekar lam̧ōj. “Ta eo kwojjab errā kake?”
Kōm kar aolep ron̄jake ilo an likao in lam̧ōj im ba, “Ijjab errā ippam ilo am̧ kajje kōn aō Rilo̧mo̧o̧r. Ekametak jetōb e aō. Ij kajjitōk bwe kwon bōjrak.”
Aolep ro ilo ruum eo rekar lukkun ikōn̄. Rūkaki eo ekar kalimjōk e innem ba n̄an e ta kabūn eo an!” Baiļat eo eperan an ritariņae ekar ba, “N̄a juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Rūkaki eo ekar kam̧m̧oolol e baiļat eo kōn an peran n̄an kōnono, im kweilo̧k eo ekar wōnm̧aanļo̧k wōt. Menin ekar lukkuun un̄ūr eō. Ekkā aō kar ļōmņak bwe en kar wōr ippa kain peran ro in an bailat in.
Ālkin kaminene eo an ritariņae ro rekāāl im kaminene ikkijeen ājmour, kar jitōn̄ eō bwe in jokwe ilo jikin ritariņae ilo Colorado, USA. Juon raan, ikar bōk juon leta jān brother eo aō erūtto ekar jokwe ilo jikin ritariņae ilo Phillipines. Ekar kobaļo̧k ilo air force eo emaron̄ juon iiō m̧okta jān n̄a. Ekar ba n̄an eō bwe em̧ōj an erom̧ juon membōr in Kabun̄ in, im ekar kōņaan bwe in ioone mijenede ro. Ikajju ba n̄an e kōn en̄jake eo aō ilo kar iien kaminene eo an ritariņae ro kōn juon baiļat eperan. Kōrā eo pāleeō im n̄a kom̧ro kar ioon mijenede ro, im ejjab to kōm kar peptaij.
Jejjo allōn̄ tokālik, mijenede ro rekar lotok ļaddik eo jatū. E im kōrā eo pāleen rekar bar peptaij. Brother ro aō im n̄a kiiō ewōr am baam̧le im jibum ajri. Kōmij aolep iakwe Irooj im Kabun̄ eo An.
Ijjab jeļā etan baiļat eo eperan. Ikar jab bar loe, ak eban jem̧ļo̧k aō kam̧m̧oolol kōn peran eo an n̄an jutak kōn ta eo ej tōmak kake.