N̄e Ij En̄jake Riab kōn Kabun̄ in

Jān Travis Ewell

Etke ikar etal jān Kabun̄ in. Im etke ikar rooltok.

Jejjo iiō ko rem̧ootļo̧k, ikar ļoor juon bwebwenato ilo social media ikōtaan ruo iaan kōmpānien ro aō m̧oktaļo̧k ilo mijen eo. Rekar jet em̧m̧aan ro me ikar iakwe im kautiej er.

Rekar kōnono kōn kajjitōk ko me ekar wōr ippāer kōn Kabun̄ in im katak ko ie. Ejjab to ekar lukkuun alikkar bwe rekar jim̧or etal jān Kabun̄ in. Ekar kailibōk eō im kabōņōņōik eō. Ijjan̄in kar ron̄ kōn jet iaan men ko me rej kōnono kaki. Ikar en̄jake ke ikar aikuj jeļā eļan̄n̄e men kein rem̧ool. Kōn menin ikar jino lale arto artak ko an ro me ekar wōr aer abōņōņō kōn Kabun̄ in.

Jet iaan men ko ikar riit ilowaan ruo iiō tokālik ekar tōl eō n̄an elōn̄ kajjitōk ko kōn Kabun̄ in. Jet ro me rekar jelm̧ae menin rej buromōj. Rej liājļōļ kōn jako in tōmak eo aer. Ikar jino illu. Ikar en̄jake bwe Kabun̄ in ekar m̧oņ eō. Ikar jab lukkuun jeļā ta eo ekar m̧ool ak wōn eo in kar lōke.

Ikar jelm̧ae iien ko reppen n̄an etal im jar. Ikar kajjitōk bwe ren kōtļo̧k eō jān kūr eo aō. Jem̧jerā eo aō ippān eo pāleeō, Cheri, im baam̧le eo aō ekar m̧ōjņoļo̧k. Ikar wōnm̧aanļo̧k wōt im etal im jar, ak ekar wōt n̄an kamejmājen armej im n̄an kajjieon̄ in dāpij baam̧le eo ippān doon. Mour ekar poktak. Ikar jab maron̄ en̄jake Jetōb im ikar kajjitōk men̄e ak jab ikar jab lukkuun en̄jake Jetōb Kwojarjar.

Ke ajri ro nejū erūtto tata, Kayson, ekar etal n̄an mijen eo an, ikar ejaake juon mejatoto eo enana ipeļaakin iien ko me rej aikuj kar lukkun kam̧ōņōņō. Ālkin ruo iiō, elōn̄ iaan baam̧le eo aō rekar jeļā ta eo ij jelm̧aiki. Ke aolep rekar etal n̄an tampeļ ippān Kayson ej kab kein kajuon n̄an e, ikar jab pād ijeņ.

Kōn aolep iminene ko, ikar en̄jake aō ajimakeke.

Rie jān Aolep ro Ipeļaakū

Juon raan brother ro aō rekar ippān doon im kōnnaan kōn n̄a kōn ta eo ikar jelm̧aeiki. Ijjab lukkuun kemeemej ta eo rekar ba, ak ikar jeļā bwe rekar kōm̧m̧an kōn iakwe eo aer n̄an n̄a. Ke kōm kar kōnono, ikar jino kile bwe ikar o̧o̧n̄ kake er. Ekar juon kein kōketak n̄an oktak. Eaikuj kar n̄an eo ij kapit Kayson n̄an juon elder. Eaikuj kar n̄a eo n̄an tōl e n̄an tampeļ. Eaikuj kar n̄a eo inkar leļo̧k juon kōjeraam̧m̧an an baba m̧okta jān an kar em̧m̧akūt. M̧akūtkūt kein relukkuun aorōk ilo mour eo an rekar ļap meļeļeier n̄an n̄a bwe in pād ijeņ, ejjab bar juon. Ij kemeemej aō kajjitōkin eō make, “Ta eo in kōm̧m̧ane?

Ejjab to ālkin, juon m̧ōtta eo em̧m̧an ekar en̄jake im̧we n̄an kwaļo̧k kajju n̄an juon membōr in stake būreejtōnji eo. Kain em̧m̧aan rōt in ekar lukkuun ron̄jake bwebwenato eo aō im ilo kalimjōke ejeļā ta eo ikar jelm̧aeiki m̧okta jān aō ba. Jekar kōnono ium̧win awa ko. Bwebwenato eo aō, kajjitōk eo aō, im unleplep in aō kar lukkuun kwaļo̧k rekar āinwōt ta ko me ro jet rekar jeere ippān. Ikar jino kile bwe ekar bwe ekar lōn̄ uwaak ko rem̧m̧an n̄an elōn̄ iaan abōņōņō ko aō im bwe elōn̄ iaan kajjitōk ko aō, ilo m̧ool, elōn̄ armej ro rekar kōm̧m̧an bwe en wōr aō kajjitōk rōt me ej n̄an kakkure tōmak.

Kajjitōk im abōņōņō ko aō rekar ke kajju jako ilo iien eo em̧ōkajtata? Jaab, ekar jab. Ak buruō ekar pelļo̧k n̄an kile juon m̧ool eo em̧m̧an: kajjitōk ko rem̧m̧an, ak jet kajjitōk ko raorōk ļo̧k jān ko jet.¹ Luuji baam̧le eo aō im jutak im̧aan mejān Anij ekar ke ļapļo̧k an aorōk jān jejjo kajjitōk ko rekar jab uwaak? N̄e ij mije m̧oktata kajjitōk ko me relukkuun aorōk im likūt Anij m̧oktata ilo buruō, ikar jino lo uwaak ko rej kallikartok n̄an eō bwe ikar bar ro̧o̧ltok ilo iaļ eo ejim̧we.

Stake būreejtōn eo aō im bisop eo aō rekar jipan̄ eō. Rekar lukkuun jipan̄ n̄a im Cheri ilo iien ko reppen. Rekar jab ebbweer. Er im baam̧le eo aō jim̧or ilo rōn̄ōļ eo rekar lukkuun aorōk ilo aer jipan̄ eō. Ijeļā bwe Jemedwōj Ilan̄ ejeļā im ej iakwe kōj. Ej likūt armej ilo mour ko ad n̄e jej aikuji er. Jej aikuj lukkuun m̧ōņōņō in bōk jipan̄ ko aer.

Ta eo n̄an Kōm̧m̧ane Eļan̄n̄e Kwe Eo

Ijeļā bwe elōn̄ ro jet ilo laļ in ro me remaron̄ jelm̧ae ejja kain kein wōt. Emaron̄ bar kwe ak bar juon eo kwojeļā kake.

Ijeļā bwe Rilo̧mo̧o̧r ekar ejaake Kabun̄ eo An kōn mālim n̄an leļo̧k kain̄i ko im bujen ko jej aikuji n̄an jepļaak n̄an E. Setan ejjab bōjrak an jerbal n̄an kakkure Kabun̄ eo an Irooj ilo an kōjerbal jabdewōt wāween ko rekkar. Bōk lōn̄tak kajjitōk im ejaaki menin ebweer ko epidodo. Po ilo kein aujiid eo an emaron̄ waļo̧k n̄an jabdewōt armej. Pedped wōt ioon meļeļe im uwaak ko me ro jet rej leļo̧k emaron̄ lukkuun pidodo jān am̧ kōm̧m̧ane jerbal in kappukot m̧ool eo ippād make “jān katak im barāinwōt jān tōmak barāinwōt jān tōmak” (Katak im Bujen Ko 88:118; eoon eo eaorok kar kobaiktok). Ak āliktata, en̄ ne ta eo Anij ej aikuji.

Eļan̄n̄e kwoj abōņōņō kōn kajjitōk ko ak pere ko kōn Kabun̄ in ak tōmak eo am̧, kwoban loe m̧ool ilo am̧ riiti website ko an armej ak ron̄jake kein ron̄jak ko jān ro me rejjab errā ippān Kabun̄ in ak em̧ōj aer etal jān Kabun̄ in. Ak eban lukkuun bun̄ buruōm̧ kōn uwaak ko rekalimomo, im komaron̄ jab kōņaan ļōmņak ko n̄an kōttar juon uwaak m̧ae juon iien tokālik.

Ikar ekkatak bwe jejjab maron̄ pedped wōt ilo jeļā im naan in kam̧ool an ro jet aolep iien, ak ijjeļo̧kin jej aikuj oktakļo̧k n̄an Anij eo ej unin meram im m̧ool otemjej (lale Katak im Bujen Ko 93:26). Jej aikuj ekkatak menin ilo ļōmņak ko ad make, ak jej aikuj kajjitōk ippān Anij eļan̄n̄e jej ļōmņak ejim̧we (lale Katak im Bujen Ko 9:8). Jej aikuj ekkatak kōn kōj make, āinwōt kar Josep Smith (lale Josep Smith—Bwebwenato 1:20) im kijenmej ilo ad kappukot (lale Alma 32:41). Ak ekkatak kōn tōmak meļeļein jej aikuj kam̧ool kōn m̧ool eo ilo ad mour kake (lale Jon 7:17; 1 Tessalonika 5:21).

Ke ikar ekkatak men ko me rekar jum̧ae Kabun̄ in, ikar en̄jake aō pād ilo tab in marok (lale 1 Nipai 8:23–24; 12:17). Ke ikar dāpdep wōt ilo naan ko an Anij im bōk bun̄tōn ne ļo̧k n̄an Ippān, kar men eo de ne ekar aikuji n̄an jilkintok jetōb eo An n̄an un̄ūr buruō.

Kōjatdikdik ekar ke Bwe?

Jejjo wiik tokālik ālkin an Kayson kar etal n̄an mijen eo an, stake būreejtōn eo aō ekar lotok eō. Ikar ba n̄an e kōn ta eo ekar waļo̧k ilowaan wiik ko ālkin an brother ro aō kar kōnono ippa. Ikar ba ikōņaan bōk juon mālim ekāāl n̄an deļon̄e tampeļ. Ekar kajjitōk eļan̄n̄e imaron̄ uwaaki kajjitōk ko ilo jejjet n̄an maron̄ bōk juon mālim n̄an deļon̄e tampeļ. Ikar kwaļo̧k m̧ool, “Būreejtōn, Ij ļōmņak iban maron̄ ba ijeļā bwe Kabun̄ in ej m̧ool wōt, ak ij kōjatdikdik kōn aolepān buruō bwe em̧ool. Ak inaaj wōnm̧aanļo̧k wōt im mour ekkar n̄an ta eo ij kōjatdikdik kake. Em̧ool ke menin?”

Ekar bōjrak jidik innem ba, “Travis, men in enaaj bwe aolep iien.”

Elōn̄ jet men ko ij kōttar wōt bwe in meļeļe kaki, ak jet men ko em̧ōj aer lukkuun alikkar n̄a eō. Ijeļā bwe Jemedwōj Ilan̄ ej iakwe eō. Ijeļā bwe jemaron̄ kōņaan jeļā im abōņōņō ium̧win jidik iien. Ak ijeļā bwe kōn Kraist, Pinmuur eo An, im kōjatdikdik eo ej bōktok, emaron̄ kōjepļaak kōj n̄an iaļ eo me ej karool kōj n̄an Ippān.

Rijeje eo ej jokwe ilo Utah, USA.

Ļōmņak ko n̄an Jipan̄ Juon eo Kwoj Iakwe

Āinwōt n̄a, elōn̄ armej ro elōn̄ aer kajjitōk ak pere rej en̄jake āinwōt n̄e rejjab uwaan Kabun̄ in. Ak jej maron̄ kajejtokjeer ak ro jet. Rilo̧mo̧o̧r ekar kakien armej ro An n̄an “wōnm̧aanļo̧k wōt im jipan̄” er kōnke jejamin jeļā n̄aat renaaj bar jepļaak n̄an E im bōk kōmour (lale 3 Nipai 18:22–32).

En̄rein rej ļalem wāween ko jemaron̄ wōnm̧aanļo̧k wōt im jerbal in karejar n̄an ro rekar jelm̧ae pere bwe ren en̄jake aer ruwainene, men̄e ak jab rej kālet n̄an bar rooltok.

Wōnm̧aanļo̧k wōt im iakwe. Ilo aolepān iien ko ikar pere, ikar āinwōt n̄e ij ajimakeke. Em̧ool, Jemedwōj Ilan̄ ekar jab ebweer jān n̄a, im barāinwōt baam̧le eo aō ak ritōl ro an Kabun̄ in. En̄jake iakwe eo An kōn er ekar jipan̄ eō jeļā bwe imaron̄ kar bar rooltok im jar.
Wōnm̧aanļo̧k wōt im kwaļo̧k iakwe. Iakwe ro jet ejjab aikuj pedped ioon tōmak ko aer, aer jon̄an aer bōk koņaer ilo kabun̄ in, ak barāniwōt wāween aer en̄jake kōn kōj. Jisōs ej kajjitōk ippād n̄an kwaļo̧k iakwe n̄an elōn̄ļo̧k ijjeļo̧k ro me em̧ōj kadede aer pād ilo doulul in baam̧le in ad (lale Matu 5:46–47).
Wōnm̧aanļo̧k wōt im kōjatdikdik. Jej jitlo̧k, jej jar, jej alooj im kijenmej ilo kōttar, im jen jab pere kōjatdikdik eo ad. “Anij ekar ejaake karōk n̄an lo̧mo̧o̧ren kajjojo ajri ro Nejin” (Henry B. Eyring, “To My Grandchildren,” Liaona, Nob. 2013, 71).
Kautiej anemkwoj in kālet ko aer. En wōr kōjatdikdik ak kautiej jokālet ko aer. Jejjab aikuj ukot er ak akwāāl kōn katak ko ippāer. Āinwōt nejin eo ejerwaan, elōn̄ iaad rej aikuj jet m̧akūtkūt ilo mour ko aer me enaaj kapidodoikļo̧k buruōer m̧okta.
Kōm̧m̧an n̄an er ilo kautiej, ejjab āinwōt n̄e renana. Kōjekdo̧o̧n naan ko me rej ņa ruōn armej, lo arin armej, ak kajejtokjeer. Armej ro rem̧m̧an remaron̄ oktak tōmak ko aer jān er, ak jej kappukot n̄an leļo̧k n̄an er ejja kautiej in wōt me jej kōjatdikdik renaaj letok n̄an kōj.

Kajjitōk ko Rejjan̄in Uwaak ņae Katak ko Ralikkar

“Imaron̄ mour kōn jet iaan m̧ōjņo ko an armej, aeet ilubwiljin rikanaan ro an Anij—menin kar aikuj kōtmene ilo mour an armej ilo mour in. Imaron̄ mour kōn jeļā ko an rimālōtlōt ņae Bok in Mormon; tarpok kein naaj ņa mejļaer. Im imaron̄ mour kōn jet iaan iien ko reaorōk ilo kalimjōki me kar kōtmeni, rej dik wōt n̄e keidi n̄an m̧ool eo. Ak ijjab maron̄ mour ilo an ejjeļo̧k m̧ool in katak ko im kain̄i ko me em̧ōj kōjepļaakitok jān Josep Smith, ijjab maron̄ mour ilo an ejjeļo̧k priesthood an Anij n̄an kōjeraam̧m̧an baam̧le eo aō, im ijjab maron̄ mour ilo an ejjeļo̧k jeļā bwe kōrā eo pāleeō im ajri ro em̧ōj aer liāp ippa n̄an indeeo. En̄ ne ej jokālet eo jej jelm̧aeiki—jejjo kajjitōk ko rejjan̄in uwaak ilo juon wōt jait ņae katak ko ralikkar im kajoor an Anij ilo jait eo juon.

Elder Tad R. Callister ekar jerbal ilo Būreejtōnji eo an Jiljilimjuonn̄oul ke ekar kwaļo̧k ekōnono in, “What Is the Blueprint of Christ’s Church?” (Church Educational System devotional for young adults, Jan. 12, 2014), broadcasts.ChurchofJesusChrist.org.