“Wōn ar Dūbōj Ļaddik eo Nejū?”
Ij pijaikļo̧k aō būron̄e armej ro ekar dūbwōj ļaddik eo nejū, ak ikar jelm̧ae do̧o̧n ippān rikattōr eo.
Kōmeļeļe ko jān Ellerie Arnold
Ikar etal jān leddik eo nejū ilo m̧ōn juon m̧ōtta ke ikar bōk juon ko̧o̧l jān ļeo pāleeō, Jonathan. Ekar ba tok ke ļaddik eo nejim me 11 an iiō, Aiden, juon wa ekar dūbwōje ke e im Jonathan rekar etetal ilo waan iaļ eo n̄an jipadōk turājet eo juon.
Rikattōr eo ekar rool likļo̧k im̧aan mejān Jonatan im ekar jab loe Aiden ilo bajikōļ eo waan. Rikattōr eo ekar dūbwōj bajikōļ eo an Aiden. Ekar kelōn̄ļo̧k n̄an mejatoto, ekar dāpdep wōt ilo bajikōļ eo, im bōran ekar lel bōran ilo tōrerein wa eo ke ej wanlaļtak. Innem ekar jok ilo iaļ eo kōn bajikōļ eo an ioon ej pād ioon. Kam̧m̧oolol, bwe ekar kaņōk kein kōjparok bōran. Rikattōr eo im armej ro jet rekar bōjrak im jipan̄ ke Jonathan ekar kūr waan aujpitōļ.
Ļōmņak im en̄jake eo aō rekar wiwijet. Ikar kaiim n̄an ijo jorrāān eo ekar waļo̧k ie, kōjatdikdik bwe in kar tōpar waan aujpitōļ bwe in maron̄ pād ippān Aiden.
Ļōmņak ko n̄an luki rikattōr eo rekar jiktok ilo kōļmenļo̧kjeņ eo aō. “Ta an rikattōr eo ļōmņak?” Ikar ļōmņak. “Rōkadōk ke? Rekar ke m̧ad kōn taļboon ko aer?” Ikar ļo̧kjeņaō im lukkuun inepata. Ejjeļo̧k aō jeļā kōn jon̄an metak eo an Aiden.
Ke ikar tōparļo̧k ilo ijo, waan aujpitōļ em̧ōj an m̧ootļo̧k. Jejjo wōt waan būlijmān im juon wa ej pād ilo turin iaļ eo me jorrāān eo ekar bōk jikin ie. Juon kōrā elukkuun inepata ej jutak turin wa eo.
Ikar kepaake im kajjitōk, “Kwar ke lo wōn eo ekar dūbōje ļaddik eo nejū?”
Ekar kadikdik ilo an ba, “N̄a eo.”
Ikar pijaikļo̧k aō būron̄e armej in ejjab kōkm̧anm̧an eo ekar dūbōj ļaddik eo nejū, ak ikar jelm̧aeiki rikattōr eo, illu ekar jako. Ikar jan̄ im atbo̧kwōje. Ekar joļo̧k an bōd, im ikar ba n̄an e bwe aolep men renaaj EM̧M̧AN. Ij kab jeļā tokālik bwe er ko naan ko Aiden ekar ba n̄an e m̧okta jān an kar būlijmān ro itaakļo̧k. Ilo jem̧ļo̧kin, Aiden ekar em̧m̧an an mour kōn jejjo wōt kurar im maao̧.
Eļap aō kam̧m̧oolol bwe ilo iien eo eaorōk, Jemedwōj Ilan̄ ekar kōjeraam̧m̧an eō kōn kajoor n̄an jeorļo̧k bōd ijjelo̧kin aō illu, aeet jekdo̧o̧n n̄e ikar jab kajjitōk. Ijeļā bwe E ejeļā kōn kōj im aolep iien ej letok n̄an kōj jipan̄ eo An.