Rej Kōjedo̧o̧n Melejon̄ ko Aer
Raan eo, Kendra, Brent, im Tyson rekar waanjon̄ak ro kōn jerbal in karejar āinwōt an Kraist.
Kōmeļeļe ko jān Trent Gudmundsen
Jej aolep jelm̧ae iien ko rem̧m̧an im nana ilo mour in, ak 2013 ekar juon iiō elukkuun kar pen n̄an baam̧le eo am. Jekar jelm̧ae elōn̄ men ko jekar jab kōtmeni im wōnņeen kōm̧m̧ane m̧weo m̧ōm im wa eo waam. Ļeo pāleeō, Ryan, ekar luuji jerbal eo an, im ļaddik diktata eo nejim ekar ļotak kōn wōtam̧we ko im ekar joļo̧k jejjo wiik ilo jikin uum̧ ajri ilo icu. Ikar barāinwōt nan̄inmej kōn inepata eļap ālkin aō kar kemour. Jekjek kein, kobain kōn aō juon m̧am̧a n̄an emen ajri ro reddik, ekar kōm̧m̧an bwe kōm en apan̄ ikkijeen jeen im en̄jake ko.
Ryan ekar lo juon an jerbal kāāl, ak ekar jerbal ium̧win awa ko raitok im ekar keļak n̄an bar juon jikin ium̧win wiik ilo juon iien. Ļaddik eo nejim ļalem an iiō, Wesley, ekar jino an mijak kōn an kajoor jako jemān jān m̧weo. Ekkā an kajoor ruj in lukwōn bon̄ kōn an ettōņak.
Baam̧le ko jet am rekar rie eō ilo iien ko remaron̄, ak jekdo̧o̧n ikar en̄jake mōk im ajimakeke eiten aolep iien. Ikar jeļā bwe Jemedwōj Ilan̄ ej iakwe baam̧le eo aō im ejeļā kōn ta eo rej jelm̧aeiki, ak ikar en̄jake bwe kōm kar obrak kōn inepata.
Juon ālkin raelep, ke Ryan ekar bar keļak ikkijeen jerbal, ikar karool ajri ro n̄an m̧weo jān jikuul im ikar lukkuun kōņaan jar im kajjitōk jipan̄. Tokālik ilo joteen eo, Kendra eo ej jokwe iturin m̧weo ekar kōļlaļlaļ ilo kōjem eo am. Ekar jeļā bwe jekjek eo kōm pād ie im ekar kajjitōk ejet aō pād. Ekar ejjeļo̧k aō kōttōpar in ellotaan e, im ekar armej eo āliktata in kar kajjitōk ippān n̄an jipan̄. Ļeo ippān, Brent, eto an en̄taan kōn cancer ium̧win emen iiō ko rem̧ootļo̧k.
Ikar ba n̄an Kendra ke em̧m̧an aō mour, ak ekar bar kajjitōk ilo m̧ool. Kōn dānin kōmjallaļ, ikar kwaļo̧k buruō im ba kōn apan̄ ko aō. Ke ij ba n̄an e kōn an Wesley mijak im etōņak, ekar kajjitōk eļan̄n̄e inkar kōņaan bwe Brent en leļo̧k kōjeraam̧m̧an n̄an Wesley.
Ejjab to tokālik, Kendra, Brent, im ļaddik rūtto tata eo, Tyson, ekar itok n̄an kōjem eo kaņōk nuknuk in jar ko. Brent ekar m̧ōjņo. Ijeļā ebwe an kar mōk ilo an kar itok n̄an m̧weo. Ekar leļo̧k Wesley juon kōjeraam̧m̧an, im Tyson ekar letok n̄an eō juon kōjeraam̧m̧an.
Raan eo, Kendra, Brent, im Tyson rekar waanjon̄ak ro kōn jerbal in karejar āinwōt an Kraist. Rej kōjekdo̧o̧n melejon̄ ko aer make n̄an letok n̄an kōj iakwe im tūriam̧o̧ em̧ool. Ikar en̄jake kōjeraam̧m̧an bwe Jemedwōj Ilan̄ ekar uwaake jar ko aō ilo wāween in ejouj. Brent ekar mej ruo wiik tokālik.
Raan eo ilo m̧weo m̧ōm̧, Brent ekar jutak āinwōt juon rikam̧ool an Anij kōn an kōjerbal priesthood eo an ilo jim̧we (lale Mosaia 18:9). N̄an n̄a, ekwojarjar bwe jerbal in karejar eo an n̄an baam̧le eo am ekar juon iaan jerbal ko an āliktata ioon laļ in.