Oktak ak Ippān Doon
Rijeje eo ej jokwe ilo Georgia, USA.
“Ren kabun̄-jar ilo wāween eo, jikin eo, ak ta eo rej kāālete” (Laajrak in Tōmak Ko 1:11).
Ellie im baam̧le eo an rekar etal im loļo̧k ro nej jeier im jatier ro rej jokwe ettoļo̧k. Ellie ekar lukkuun kijoroor! Eto an jan̄in bar lo nej jein im jatin ilo juon tōre eaitok.
M̧okta jān tūrāāp eo, ro jinen im jemān Ellie rekar kōņaan kōnnaan kōn juon men.
“N̄e jej ippān doon ippān baam̧le, jej aolep iien kōm̧m̧an jar ko ilo iien m̧ōn̄ā ko. Im jet iien jej kōnono kōn kabun̄ in, ejim̧we ke?” Baba ekar kajjitōk.
“Ejim̧we!” Ellie ekar ba.
“Aaet, enaaj oktak jidik men ko ilo tūrāāp in,” M̧am̧a ekar ba. “Unlepa im kōrā eo pāleen ejako aer bar etal im jar. Im rejjab kōņaan n̄e armej rej kōnnaan n̄an er kake men in.”
Ellie ekar kajjememe. “Etke rejjab kōņaan”
“Jejjab jeļā unleplep in,” Baba ekar ba. “Ak rej iakwe kōj eļap jān jon̄an. Ij ļōmņak rejjab kōņaan akwāāl ippād ak kōmetak en̄jake ko ad. Kōn menin rekar kajjitōk bwe kōm en jab kōnono kōn men ko an kabun̄ in ippāer.”
Ellie ekar kajiboluuli bōran.
“Jemaron̄ riiti wōt eoon ko im jar n̄e jej pād ijeņ. Ak jenaaj kōm̧m̧ane ilo ittino,” M̧am̧a ekar ba.
“Ak ilo iien m̧ōn̄ā?” Leddik eo jein Ellie ekar kajjitōk.
“Jen kōttar wōt im lale,” M̧am̧a ekar ba. “Eļan̄n̄e rejjab kōņaan jar m̧okta jān m̧ōn̄ā, jemaron̄ kajjojo jar ilo buruōd.”
“EMMAN,” Ellie ekar ba. “Imaron̄ kōm̧m̧ane menin!”
Raan eo tok juon, baam̧le eo an Ellie ekar iuwe ilowaan wa eo. Rekar ettōr m̧ae lukwaļpen bon̄. Ke rekar tōpar ļo̧k m̧weo im̧ōn ro nej jeier im jatier, nej jinen Ellie im unlepan ekar jipan̄ er bōk pāāk ko aer jān wa eo. Innem aolep rekar etal im kiki.
Jibbon̄ eo tok juon, Ellie ekar jar m̧okta jān an etal n̄an m̧ōn kuk eo im kōmabun̄. Ekar ikūmkūm jidik in bwebwenato ippān baam̧le eo an. Ak eo nej jinen ekar jijet laļļo̧k iturin im ettōn̄ n̄an e.
“Jet iaer rekar etal n̄an m̧ōn salon eo an leddik eo nej jeier rainin. Wōn ekōņaan itok?” Ellie ekar kajjitōk.
“Jikin kōm̧m̧an bar?” Ellie ekar kajjitōk.
“Aaet! Kwe im sister eo am̧ komiro maron̄ kōm̧m̧ane bōramiro n̄e komiro kōņaan.”
Ellie ekar ettōn̄ dikdik im kajiboluuli bōran. Āinwōt elimo menin!
Ālkin kōmabun̄ eo, rekar iuwe ilo juon baj n̄an jikin kōm̧m̧an bar eo. Ellie ekar itok limoin in alooje an eo nej jein jerbal. Addin pein rekar lukkun irjet ilo an kuumi im birōkrōk. Ālkin an dedeļo̧k bōran aolep, rekar kōm̧m̧an juon kōtōnn̄e kōmatōltōl n̄an kūlaaj eo ilo jikin kōm̧m̧an bar eo im ettōn̄ kōn reitokier me eoktak.
Raan eo tok juon, ekwe lukkun ļap an wōt. Kōn menin aolep rekar kālet bwe ren pād wōt ilowaan m̧weo im ikkure game ko. Ellie im juon iaan leddik ro nej jatin rekar pād ilo juon tiim ņae ruo iaan ļaddik ro rerūtto. Rekar kakūtōtōik doon ilo aer iiaikwo̧j kōn kein ikkure ko an game eo ilo bo̧o̧t eo.
“Jewiin!” Ellie ekar ļamōj ke ej kam̧akūt juon kein ikkure im tōpar jem̧ļo̧kin bo̧o̧t eo. Aolep rekar high five i—bar ro nej jein rerūtto, ro me rekar kōtōnn̄e rellu ke reluuj.
Ālkin jejjo wōt raan ko, ekar juon iien n̄an etal n̄an m̧ōko. Ke Ellie ekar tallōn̄e ļokan wa eo waan baam̧le eo, ekar ron̄ an baam̧le eo an ba bar iakwe eok.
“Jenaaj o̧o̧n̄ kōn eok!”
“Rool tok ilo iien eo em̧ōkajtata!”
“Eļap am̧ iakwe eok!”.
Ellie ekar ettōn̄ im baebae ilo an m̧ootļo̧k wa eo. Ekar lukkuun limo wōt em limo. AAet eļan̄n̄e rej tōmak ilo men ko reoktak, remaron̄ kar erom̧ wōt baam̧le eo ekam̧ōņōņō. ●