Pilawe Diaka inEo Edik
Rijeje eo ej jokwe ilo Vermont, USA.
“Eļan̄n̄e kom̧ij jerbal n̄an armej ro ami kom̧ij jerbal wōt n̄an ami Anij” (Mosaia 2:17).
Sammy ekar kōpelļo̧k mejān im erļo̧ke diin. Ekar maron̄ etbwiin juon men enno̧.
Mmmm, Baba ej kōmat biļawe! Sammy ekar ļōmņak.
Baba ekar kōmat biļawe n̄an baam̧le eo an aolep Jādede. Sammy ekar kōņaan lale an bōk pilawe būrawūn ekan̄ūrn̄ūr jān uum̧ eo. Baba aolep iien ekar leļo̧k n̄an Sammy jilait eo jinointata.
Ak rainin ejjab Jādede, Sammy ekar ļōmņak. Etke Baba ej kōmat?
Sammy ekar jerkak jān peet eo im ekar etal n̄an m̧ōn kuk eo. Ekar kajjitōk ippān Baba ta eo ej kōm̧m̧ane.
“Kwoj ke kemeemej ta eo bisop eo ad ekar kajjitōk ippād n̄an kōm̧m̧ane?” Baba ekar ba.
Sammy ekar emajidjid. “Ekar kajjitōk ippād n̄an jipan̄ armej. Im ikar jipan̄ Sister Martin bōk pāāk ko an n̄an m̧weo ilōn̄, keememej?”
“Kar juon jerbal em̧m̧an,” Baba ekar ba. “Ikar jar kōn wāween aō maron̄ jipan̄. Ekar wōr juon aō ļōmņak n̄an kōmat pilawe n̄an ajeej.”
Sammy ekar reilo̧k n̄an lowaan uum̧ eo jān kūlaaj wintō eo. Ekar bōnbōn ļoob in pilawe.
“Juon … ruo … jilu … emān. Wōn eo kwonaaj leļo̧k pilawe n̄an e?”
“Ej juon men eo ij aikuj jipan̄ eo am̧ kake,” Baba ekar ba. “Ewōr juon ļoob n̄an Sister Martin. Im ruo ļoob n̄an baam̧le eo an Miller. Wōn eo jej aikuj leļo̧k n̄an e ļoob eo kein keman?”
Sammy ekar ļōmņak kake.
“Akko Mr. Lee?” Sammy ekar kajjitōk. Mr. Lee ej jokwe ilo apaatmen eo aer. Ejeja an kar diwōj nabōj. Ekkā wōt an alooje armej jān winto eo an.
“En̄ ne ej juon ļōmņak em̧m̧an,” Baba ekar ba.
Ālkin an biļawe eo kar dedeļo̧k an kōmat, Sammy ekar jipan̄ Baba bākiji pilawe ko. Innem ekar bōk diaka eo waan. Rej likūt ļoob ko ilowaan.
“Diaka in biļawe eo epojak n̄an bwūlbwūļ!” Sammy ekar ba.
Baba ekar jipan̄ Sammy bwūlli diaka eo. Buruōn Sammy ekar obrak kōn m̧ōņōņō im jouj, āinwōt pilawe ko rekar pojak in ajeji! ●