Faneva, Misinari Ia
Faneva i lukluk i go aotsaed long windo i go long bisi rod aotsaed long haos blong hem. Hem i save luk ol pipol oli stap pulum ol kat blong vejetebol, raes, klos, mo ol nara samting blong salem. Hem i save harem ol trak oli bibip, mo ol dog oli singaot. Afta, hem i harem wan nara saon.
“!Mama, wan i stap noknok long doa!” Faneva i singaot. Mama i openem doa. Tufala yang man i werem ol sut mo ol nektae oli stanap long doa. Faneva i neva luk eniwan i dresap olsem long ples blong olgeta long Madagaska bifo.
“Mifala ol misinari blong Jos Ia blong Jisas Kraes blong Ol Lata-dei Sent,” wan i talem. “Mifala i stap tijim ol pipol abaot Jisas. ?Mifala i save serem wan mesej wetem yufala?”
Faneva i glad tumas taem Mama i invaetem tufala i kam insaed. Ful famli i kam tugeta blong harem abaot Jisas Kraes mo olsem wanem Jos blong Hem i stap long wol ia bakegen.
Afta long dei ia, ol misinari oli bin visitim famli blong Faneva plante moa taem. Oli bin tekem wan buk, we oli bin singaotem Ol Stori long Buk blong Momon. !Faneva i laekem tumas blong ridim buk ia wetem famli blong hem!
Wan dei, bae mi kam wan misinari mo bae mi serem Buk blong Momon wetem ol narawan, Faneva i talem long hemwan.
Wan nara taem, taem we ol misinari oli kam, oli bin tijim famli blong Faneva olsem wanem blong prea. Faneva i bin lanem se hem i save toktok long Papa long Heven eni taem, eni ples.
Wan dei, bae mi kam wan misinari mo bae mi tijim ol pipol olsem wanem blong prea, Faneva i tingting.
Wan dei, ol misinari oli bin gat wan impoten kwestin.
“?Bae yu folem eksampol blong Jisas Kraes mo kasem baptaes?” wan long tufala i askem.
Faneva i filim hapi insaed long hat blong hem. “!Yes!”, Faneva i talem.
“!Yes!” brata mo Mama blong hem i talem.
Papa i talem se hem i no rere yet blong kasem baptaes. Be hem i bin agri blong nara haf blong famli i baptaes. !Mo oli bin baptaes! Faneva i bin kasem baptaes; wan long tufala misinari we i bin tijim hem abaot Jisas i mekem baptaes.
Wan dei, bae mi kam wan misinari mo bae mi helpem ol pipol blong kasem baptaes, Faneva i tingting.
Wan long ol bes pat blong stap wan memba blong Jos, i blong stap go long Praemeri. Faneva i bin lavem ol aktiviti mo blong stap mitim ol niu fren. Be fevret samting blong hem aot long evriwan, i blong singsing ol singsing blong Praemeri. Wan Sandei, long Praemeri, oli bin stap singsing ol singsing abaot fasin blong serem gospel.
“Mi wantem stap olsem wan misinari naoia,” Faneva i singsing. “Mi no wantem wet kasem taem i groap.”
Mi save stat blong mekem misinari wok naoia, Faneva i luksave. !Mi no nid blong wet kasem wan dei!
Stat long tetaem ia i go, Faneva i lukaotem sam wei we hem i save serem gospel. Hem i bin traem blong stap wan gud eksampol. Hem i bin invaetem ol pipol oli kam long jos. Hem i bin helpem ol neba blong hem. Afta sam yia, hem i bin olfala inaf blong helpem ol misinari blong tijim ol pipol insaed long taon blong hem. Afta sam moa yia, hemwan i bin go long wan misin—i mitim ol niu pipol, mo i bin serem gospel, semmak olsem ol misinari oli bin serem wetem hem. ●