Hem I blong Yumi Yet
Hasban blong mi, mo mi i sapos blong sil, be tabu odinens ia i bin bigwan moa bitim mitufala.
Droing i kam long Joshua Dennis
Afta long seven yia blong stap hop mo wet blong gat pikinini, hasban blong mi mo mi i bin gat blesing blong gat wan gel. Alicie i bin laet blong laef blong mitufala, be hem i bin laef faef manis nomo bifo hem i ded from strong sik long lang.
Hemia i bin dei we i moa had long laef blong mi. Evri dei, bae mi kambak hom afta long wok, mo sidaon mo krae. Ol famli blong hasban blong mi, plante taem bae oli sidaon wetem mi, blong givim paoa long mi. Mi stap gohed blong prea from wan nara pikinini, be i no gat wan i kam. Mi lus insaed long harem nogud blong mi.
Famli blong hasban blong mi oli stat blong leftemap tingting blong hasban blong mi blong travel i go long Suva Fiji Tempol, blong mitufala i sil. Mitufala i neva go long tempol, mo mitufala i bin disaed se hemia i bes wei blong mitufala i faenem hop mo hiling.
!I no gat wan samting bae i mekem mi rere gud moa from samting ia we mi bin filim long dei ia! Mi bin save se hasban blong mi mo mi bae i sil tugeta blong taem we i no save finis. Save ia i fulumap mi wetem fasin blong talem tangkyu mo lav. Be mi no bin andastanem se tabu odinens ia, i moa bigwan i bitim mitufala tugeta.
Long tempol, mi bin lanem se Alicie bae i sil long mitufala. Mi bin krae from mi kam blong save tabu doktrin ia. !Gel blong mitufala bae i blong mitufala blong evri taem we i no save finis! Mi testifae se God i bin givim evri samting we mifala i nidim blong gat hapines insaed long tabu haos blong Hem.
Long ol yia afta long hemia, hasban blong mi mo mi i bin gat blesing blong gat wan boe, mo tri pikinini we mitufala i adoptem. Be yet, mitufala i no save fogetem Alicie. From ol odinens blong tempol, gel blong mitufala i wan pat blong famli blong mitufala, hemia blong oltaem.
Taem mi stap mitim wan we i lusum pikinini blong hem, mi filim harem nogud wetem olgeta. Be tu, mi save se soa ia i no en blong hem. Tru long fasin blong lusum Alicie, mo tu blong stap fesem ol nara tes, mi save se God i stap ia, wetem mi. Taem tingting i slak o mi stap komplen abaot ol samting, mi save se God i oltaem stap ia.
Mi save se bae mi luk Alicie bakegen, mo trutok ia i gohed blong fulumap hasban blong mi mo mi wetem ol bigfala glad.