Yut
Taem oli bin setem mi apat blong givim seves long Kalifonia San Bernardino Misin olsem wan fultaem misinari, famli blong mi i stap ia wetem mi. Pikja ia, i taem mi haggem wan long ol brata blong mi afta we oli setem mi apat. Hem i bin wan longfala wokbaot blong kasem ples ia, be mi mi talem tangkyu from ol jenis we mi bin luk long miwan, mo long famli blong mi.
Seken las yia blong hae skul blong mi, mi kasem wan bigfala aksiden blong trak. Bifo long hemia, mi no bin stap mekem ol samting we mi bin sapos blong mekem. Be afta long aksiden ia, lukluk blong mi i jenis wantaem. Long stret taem ia, mi save lusum laef blong mi nomo, mo mi no bin wantem se bae i finis olsem. Bisop blong mi i bin helpem mi kambak long stret rod: stap ridim Buk blong Momon evri dei, mo stap rere blong givim seves long wan misin.
Blong ron long resis, hem i spot blong mi, samting we mi laekem tumas. Afta long aksiden, mi nomo save ron, mo mi bin stap askem miwan se wanem nao mi bin lego. Be mi tanem mi i go long Lod, mo taem mi bin mekem hemia, mi bin gat wan gudfala taem long yia we i bin kam afta. I bin gat ol hadtaem, be wanem i bin jenis, i we, mi nomo stap mekem hemia blong miwan, mi bin stap mekem hemia blong Lod.
Blong stap luk nomo hamas blesing i save kamaot long gospel ia we i fulwan, i wanem i bin jenisim mi. From mi bin kasem evri hapines mo glad ia, mi bin wantem blong serem hemia raon long wol. Mi wantem tumas blong ol pipol oli gat glad ia we mi mi stap gat evri dei from gospel ia. Mo hemia nao from wanem mi mi stap givim seves long wan misin: blong help blong “mekem man i nomo save ded mo kasem laef we i no save finis” (Moses 1:39).
Garret W., 18, Not Karolina, YSA