“?Yufala I Gat Wan Blu Buk wetem Ol Gol Leta long Hem?”
Samtaem afta mi bin sakem buk ia i go, mi bin wantem tumas blong save wanem i stap insaed long hem.
Pikja i kam long Greg Newbold
Sam yia i pas, mi bin kasem wan blu buk we oli raet long ol gol leta long kova blong hem; i kam long ol misinari we oli stap givim seves long ami stesen we mi bin stap kasem trening long hem from wok blong mi long Nevi blong Yunaeted Stet.
Taem mi stat blong ridim buk ia, wan i talem long mi se i wan giamanwan, from oli kopi nomo long Baebol. Hemia i mekem se mi gat tu tingting se i wan tru buk, be mi holemtaet. Mi ridim smol, putum i go daon evriwan long sibag blong mi, mo afta mi fogetem buk ia.
Ova wan yia afta, mi disaed blong klinim sibag blong mi. Mi faenem buk, be mi nomo gat intres long hem, mekem se mi sakem buk ia. Be samtaem afta, mi kam blong mi rili wantem save wanem i stap long blu buk ia we oli raet long kova long gol leta. Naoia, mi biliv se filing ia i kam long Spirit, “we i lidim man blong mekem gud” (Doktrin mo Ol Kavenan 11:12).
Long 2005, wan niu fren blong mi i bin invaetem mi blong lisin long ol misinari. Long fas taem, mi bin gat ol kwestin mo ol tu tingting abaot wanem we oli bin tijim, be ol misinari oli gat tras long olgetawan mo oli bin givim ol ansa, we long mi, mi luk se i stret nomo.
Taem mi luksave se ol misinari ia oli semmak olsem olgeta ia we mi bin mitim sam yia i pas, mi hariap blong askem olgeta: “Ei, ?yufala i gat wan blu buk we oli raet long gol leta long kova blong hem?”
“!Yes, mifala i gat!” wan long tufala i ansa. “!Oli singaotem Buk blong Momon!”
Mi bin glad tumas blong gat Buk blong Momon bakegen. !Wanem we i tru, i we mi bin glad tumas mekem se mi bin ridim i bitim wan taem long tu wik taem nomo! Taem mi bin stap rid mo prea, mi bin kam blong save se hemia i toktok blong God.
Elda Rubén V. Alliaud blong Olgeta Seventi i bin talem wan samting long jeneral konfrens we i go wetem eksperiens blong mi wetem Buk blong Momon: “Eniwan we i komitim hem blong stadi long buk wetem tru tingting blong prea, bae i no lanem nomo abaot Kraes, be bae i lanem samting we i kam stret long Kraes—speseli taem hem i mekem wan desisen blong “traem paoa blong toktok blong God” [Alma 32:5] mo no sakemaot eli nomo from sam kwik jajmen we ol narawan oli talem abaot sam samting we oli neva bin ridim.”1
Taem mi bin ridim Buk blong Momon, prea, mo trastem Spirit, mi bin luk ol bigfala samting oli bin hapen long laef blong mi.