Kam Folem Mi: Buk blong Momon
?Olsem wanem yumi stap tekpat long “gudfala wok” blong Lod?
(12–18 Oktoba)
Long medel blong plante samting we Sevya i bin tijim long Ol Man blong Nifae, Hem i bin tijim olgeta abaot kam tugeta blong Isrel, mo i bin givim oda long olgeta blong oli stadi long ol skripja, mo blong oli raetem histri blong olgetawan. ?Olsem wanem yumi save folem ol tijing ia tedei?
Joenem Wok
Jisas Kraes i bin talem profesi se bae i gat wan “gudfala wok” i hapen long ol las dei (luk long 3 Nifae 21:9). Wok ia, i blong karem Isrel i kam tugeta. Presiden Russel M. Nelson i bin singaotem hemia se, “samting we i moa impoten we i stap tekples long wol tedei,” mo hem i bin talem se “Sapos yu jusum, sapos yu wantem, yu save tekpat bigwan long hem.”1
-
?Olsem wanem yu mo famli blong yu i save lanem moa abaot wok ia mo tekpat long kam tugeta blong Isrel?
Stadi long Ol Profet
Sevya i bin givim oda long Ol Man blong Nifae blong oli mas “stadi long ol profet” (3 Nifae 23:5). Yumi gat janis blong harem profet we i stap laef mo ol nara lida blong Jos oli toktok long jeneral konfrens.
-
?Wanem nao yu save mekem blong tekem plante samting aot long jeneral konfrens?
-
?Olsem wanem nao, taem yumi “stadi long ol profet,” i stap helpem yumi blong tekem Isrel i kam tugeta?
Kipim Wan Histri
Jisas i bin givim oda long ol disaepol blong Hem we oli kamaot long Ol Man blong Nifae se oli mas kipim wan histri blong ol tijing mo ol profesi we Samuel, wan Man blong Leman i bin talem (luk long 3 Nifae 23:4, 6–13). Semmak, yumi save raetemdaon ol eksperiens blong laef blong yumi blong stap helpem yumi mo blong stap tijim ol narawan.
-
?I gat sam eksperiens long saed blong spirit we yu no bin raetemdaon?
-
?Olsem wanem yu stap raetemdaon ol samting we God i stap tijim yu?