Peso blong Taeting
Hem we i raet i stap long Jiwawa, Meksiko.
Sofia i bin wekap eli. Tedei i spesel tumas. !Bambae hem i salem laman jus long garaj sel blong anti mo angkel blong hem! Mama i mekem wan bigfala jag laman jus blong hem.
Sofia i mekem wan bana. Hem i raetem: “!Laman Jus!” long ol orenj mo yelo leta. Hem i skojem long wan smol tebol. Mo afta hem i sidaon blong wet.
I no longtaem, wan man i kam pas. Hem i askem: “?Mi save gat wan kap?” Hem i putum sam pesos long glas botel blong Sofia.
“!Yes!” Sofia i talem. Hem i kasem wan kap laman jus blong man ia.
Smol smol, ol pipol oli kam blong luk garaj sel. Mo smol smol, oli pem naes laman jus blong hem. Moning i pas, i wan hapi dei. I no longtaem laman jus i finis.
Sofia i seksekem glas botel blong hem. Ol pesos ia oli ring gud. !Hem i gat fulap!
“!Gudfala wok!” Papa i talem.
Sofia i neva gat fulap mane olsem bifo. “!Bae mi go pem wan yoyo!”
Papa i smael. “Yu yu save se Mama mo mi i mekem wanem taem mitufala i stap winim mane?”
Sofia i seksekem hed blong hem.
“Mitufala i stap pem taeting,” Papa i talem. “Papa long Heven i givim yumi evri samting. Hem i askem se yumi givim wan smol pat i gobak long Hem. Yumi stap pem taeting from se yumi lavem Hem.”
Sofia i smael. Hem i bin wantem soem tu long Papa long Heven se hem i lavem hem tu.
Papa i bin helpem Sofia blong kaontem ol pesos blong hem. Taem hem i kaontem selen i kasem ten, hem i putum wan pesos i go long wan envlop. Papa i bin helpem hem blong raetem ol namba long wan smol waet pepa. Afta, tufala i putum pepa insaed long envlop wetem ol pesos. Nao, tufala i sarem envlop. Sofia bae i givim envlop long bisop tumoro long jos.
“?Olsem wanem nao yu filim?” Papa i askem Sofia.
“!Mi hapi! Mo mi gat inaf mane yet blong pem wan yoyo.” Hem i bin filim se Papa long Heven i hapi wetem joes blong hem. ●