Stanap long Strong Ston Ia we I Revelesen
I Kam long Elda Lawrence E. Corbridge
Emeritus Memba blong Olgeta Seventi
I kam long wan divosen toktok, “Stand Forever,” we hem i bin givim long Brigham Yang Yunivesiti long 22 Jenuware 2019.
Taem yumi gat rus long strong ston ia we i revelesen, yumi save faenem ol ansa long ol kwestin we oli moa impoten.
Ol droing oli kam long Michal Dziekan
Olsem pat blong wan asaenmen we mi bin kasem olsem wan Jeneral Atoriti sam yia i pas, mi bin ridim plante samting we oli toktok agensem Jos Ia blong Jisas Kraes blong Ol Lata-dei Sent, Profet Josef Smit, Buk blong Momon, mo ol taem blong Restoresen. From se asaenmen ia i bin jenis, mi nomo gobak lukluk long ol kaen samting olsem.
Blong ridim ol kaen toktok olsem, oltaem i mekem mi mi filim nogud mo defren, mo wan dei, kaen tingting blong tudak ia i givim insperesen long mi blong raetem sam ansa long evri kaen toktok ia agensem Jos. Bae mi wantem serem sam long ol tingting we mi bin raetemdaon long dei ia, mo nomata wanem we mi bin raetem i blong miwan nomo, mi hop se bae i save helpem yu tu.
?Bae Yumi Stanap blong Oltaem?
Profet Daniel i bin talem long ol las dei se “God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis” (Daniel 2:44).
Kingdom blong God, hem i Jos Ia blong Jisas Kraes blong Ol Lata-dei Sent Bae hem i stanap blong oltaem. Kwestin hem i: ?Bambae yu mo mi i stanap o “[yumitu tu] i wantem gowe?” Jon 6:67). ?Mo sapos yumi gowe, bae yumi go wea?
Fasin blong Trikim Man I Wan Saen blong Taem blong Yumi
Taem we Lod i tokbaot ol saen blong taem we bambae Hem i kam, mo en blong wol, Hem i tokbaot plante samting, we insaed i gat ol wo mo ol toktok olbaot from wo, ol nesen oli girap agensem ol nara nesen, i gat hadtaem long kaekae, ol bigfala sik, ol graon we oli seksek, mo plante narafala saen, wetem hemia tu: “From se long ol taem ia, bambae i gat fulap giaman Kraes bae oli girap, mo ol giaman profet, mo bambae oli mekem ol bigbigfala samting blong soemaot paoa blong olgeta, mo bae oli mekem ol samting blong sapraes tu, hemia blong mekem se sapos i posibol, bambae oli trikim olgeta we God i jusumaot, we God i bin jusumaot olgeta folem kavenan (Josef Smit—Matiu 1:22; luk tu long Matiu 24:24).
Mi no sua se wanem nao mining blong evri samting taem hem i talem se “sapos i posibol, bambae oli trikim olgeta we God i jusumaot,” be mi ting se i minim se, evriwan bae i kasem jalenj ia long taem blong yumi.
I gat plante we oli stap trikim man, mo fasin ia blong stap trikim man, i bigbigwan. Long wan en, yumi mitim olgeta we oli go agensem Restoresen, Profet Josef Smit, mo Buk blong Momon. Afta, yumi luk olgeta we oli biliv long Restoresen be oli klemem se Jos i nomo wok gud mo i mestem rod. Sam narawan moa oli klemem se oli biliv long Restoresen be tingting blong olgeta i kam blaen wetem doktrin we i agensem ol fasin blong taem blong yumi we oli stap jenis. Sam we oli no gat atoriti oli putum klem se oli luk ol visen, ol drim, mo ol visit blong stretem sip, soem rod long yumi i go long wan moa hae rod, o oli rere Jos from en blong wol. Ol narawan moa, ol giaman spirit oli stap trikim gud olgeta.
Long nara en, yumi kam long fored blong wan ful yunives blong ol samting we oli kam pulumaot tingting blong yumi. Neva bifo i bin gat moa infomesen, rong infomesen, mo rong infomesen; moa samting blong pem, mo smol tul, mo gem; mo moa nara rod, nara ples blong go, mo samting blong luk mo mekem blong fulumap taem mo tekemaot tingting blong yumi long wanem i moa impoten. Plante long ol samting ia mo moa long hemia, oli stap serem naoia nomo truaot long wol tru long lektronik media. Hemia i wan taem blong fasin blong trikim man.
Save I Kam Impoten mo Nambawan
Trutok i mekem se yumi save luk klia, from se hem i “save long ol samting olsem we oli stap, mo olsem we oli bin stap, mo olsem we bambae oli kam blong stap” (Doktrin mo Ol Kavenan 93:24). Save i impoten mo nambawan blong stap longwe long fasin blong man i trikim yu, blong luksave klia bitwin trutok mo rong tok, mo blong luk klia moa, mo blong raetem wan plan o rod we bae i gotru long ol samting blong tedei we oli stap blokem rod.
Profet Josef Smit i bin talem: “I nid blong gat save blong save laef mo gat fasin olsem hemia blong God. … Save, hem i revelesen. Harem bigfala toktok ia: save i paoa blong God blong sevem ol man.”1
Ol pipol oli talem: “Yu mas tru long ol bilif blong yu.” I nomata se hemia i tru, yu no save kam gud moa bitim wanem we yu save finis. Plante long yumi i bin tekem aksen folem ol bilif blong yumi, speseli wanem yumi stap bilivim se hem i intres blong yumiwan. Problem hem i we, samtaem, yumi rong.
Sam pipol oli save biliv long God, mo we ponografi i rong, be yet, oli stap klik yet long intanet ponografi, oli biliv be oli rong, se bae oli hapi moa sapos oli mekem, o, se oli no save holemtaet olgeta, be oli mas klik nomo, o se oli no save spolem eni narawan. Oli jes rong evriwan.
Ol narawan oli biliv se i rong blong giaman, be yet, oli giaman wanwan taem, oli biliv se oli stap gud moa sapos oli no save trutok, be hemia i rong. Oli jes rong evriwan.
Maet wan i save biliv, mo iven i save se Jisas Hem i Kraes, mo yet, bae i tanem baksaed blong hem long Hem, i no wan taem nomo, be tri taem from ol rong bilif ia se bae hemia i folem tingting blong bigfala grup blong ol pipol mo mekem tingting blong olgeta i kwaet. Pita i no wan ivel man. Mi no sua tu se hem i no strong. Hem i jes rong nomo. (Luk long Matiu 26:34, 69–75.)
Taem yumi tekem nogud aksen, yumi ting se yumi nogud, be trutok we i stap, i we yumi jes rong nomo. Jalenj i no blong sarem hol ia bitwin aksen mo bilif blong yumi; be, jalenj i blong sarem hol ia bitwin ol bilif blong yumi mo trutok.
?Olsem wanem yumi sarem hol ia? ?Olsem wanem yumi stap longwe long fasin blong man i trikim yumi?
Ol Fas Kwestin mo Ol Nambatu Kwestin
I gat ol fasfala kwestin blong askem yuwan, mo i gat ol nambatu kwestin. Stat blong ansarem ol kwestin we oli kam faswan fastaem. Ol kwestin we oli kam faswan, oli olgeta we oli impoten moa. Ol fas kwestin blong askem, oli smol nomo. Bae mi tokbaot fo long olgeta:
-
?I gat wan God we i Papa blong yumi?
-
?Jisas Kraes i Pikinini blong God, Sevya ia blong wol?
-
?Josef Smit i bin wan profet o no?
-
?Jos Ia blong Jisas Kraes blong Ol Lata-dei Sent i kingdom blong God long wol ia, o no?
Long nara saed, ol kwestin we oli kam afta, i no gat en blong hem. Oli ol kwestin abaot histri blong Jos, fasin blong maredem plante woman, ol pipol we oli kamaot long Afrika mo prishud, ol woman mo prishud, translesen blong Buk blong Momon, Perel blong Bigfala Praes, DNA mo Buk blong Momon, sem seks mared, ol defren stori blong Fas Visen, mo ol narawan moa.
Sapos yu ansarem ol kwestin ia we oli kam faswan, nao ol nambatu kwestin ia, bae yu kasem ansa blong olgeta tu, mo bae yu luksave se oli no impoten tumas. Ansarem ol fasfala kwestin, mo bae yu save lukluk long ol samting we yu andastanem, ol samting we yu no andastanem, mo ol samting we yu agri wetem, mo ol samting we yu no agri wetem, mo bae yu no nid blong jiam long sip i go.
Hae Fasin blong Stap Lanem Samting
I gat ol defren wei blong stap lanem samting, wetem hemia blong saens, fasin blong stadi, blong skul, mo ol fasin blong heven. Ol fofala wei ia, i nidim evriwan blong save trutok. Evriwan i stat long sem fasin: wetem wan kwestin. Ol kwestin oli impoten, speseli ol kwestin we oli kam faswan.
Wei blong heven blong stap lanem samting, insaed i gat ol pat blong ol nara wei, be long en, hem i bitim evri nara samting from hem i yusum ol paoa blong heven. Long en, ol samting we oli blong God, Spirit blong God i talemaot, we fulap taem Hem i wan kwaet smol voes. Lod i talem: “God bae i givim save long yu, tru long Tabu Spirit blong hem, yes, tru long presen we i Tabu Spirit we man i no save tokbaot.” (Doktrin mo Ol Kavenan 121:26).
Aposol Pol i bin tijim se yumi no save save ol samting we oli blong God, be nomo tru long Spirit blong God (luk long 1 Korin 1; luk tu long Josef Smit Translesen, 1 Korin 2:11). Hem i talem: “Be man we Tabu Spirit ya i no stap long hem, hem i no save kasem ol paoa ya we Tabu Spirit i stap givim. Hem i no gat rod blong save ol samting ya, i stap luk olgeta olsem we oli krangke samting nomo.” Yumi luk hemia evri dei. Pol i gohed: “from we Tabu Spirit nomo i save mekem man i save ol paoa ya we hem i stap givim” (1 Korin 2:14).
Aot long evriwan long ol problem we yumi stap fesem long laef, wan we i hae moa i bitim evri narawan, be i hemia we oli no save andastanem gud. Problem blong evri man we i mowas i bitim evriwan, i no fasin blong stap pua, sik, fasin blong stap yuwan, abius, o wo—i nomata se ol problem o situesen ia oli prapa nogud. Be problem o situesen blong evri man we i mowas i bitim evriwan, i wan we i hapen long evriwan: hem i blong ded long saed blong spirit. Hem i blong yumi seperet long ples we God i stap long hem, mo long laef ia, ples we God i stap long hem, hem i Spirit blong Hem o paoa blong Hem.
Long nara han, situesen blong evri man we i beswan i bitim evriwan, i no mane, nem, paoa, gud helt, ol ona blong man, o sekiuriti. Situesen blong evri man we i beswan i bitim evriwan, hem i blong hem i endao wetem paoa blong heven. Hem i blong wan i bon bakegen, i gat presen mo kampani blong Tabu Spirit, we i ples blong kasem save, revelesen, paoa, klia maen, lav, glad, pis, hop, tras, fet mo kolosap evri nara gud samting.
Jisas i talem se: “Mo Spirit ya blong Givhan, we hem i Tabu Spirit, … bambae i save tijim yufala long olgeta samting” (Jon 14:26). Hem i paoa ia we bae yumi “save trutok long saed blong evri samting” (Moronae 10:5). “Hem i soem long [yumi] evri samting we bae [yumi] mas mekem.” (2 Nifae 32:5). Hem i spring blong “wota we givim tru laef” we i givim laef we i no save finis (Jon 7:38; luk tu long ves 37).
Pem praes we yu mas pem, tekem wanem hevi samting we yu mas tekem, mo mekem wanem sakrifaes we yu mas mekem blong kasem mo kipim, insaed long laef blong yu spirit mo paoa ia blong Tabu Spirit. Evri gud samting i dipen long fasin blong kasem mo kipim paoa blong Tabu Spirit insaed long laef blong yu.
“Wanem we I No Mekem Man I Kam Antap”
So, ?wanem ia filing blong harem nogud mo i defren, we mi bin filim samfala yia i pas taem mi bin stap ridim ol samting we oli tok agensem Jos? Sam bae oli talem se kaen filing ia risal blong wan saed bilif, we i kaen fasin blong stap pikimap mo jusum nomo ol samting we oli go wetem ol ting we yumi ting se i tru mo ol bilif blong yumi. Tingting ia se evri samting we wan i bin biliv long hem, mo oli bin tijim long hem, maet i rong, speseli taem i no gat wan moa gud samting blong i tekem ples blong hem, hemia i tru, i wan filing we i mekem man i harem nogud mo i filim defren.
Be kaen filing ia we mi bin gat taem mi bin lisin long dak kwaea blong ol voes we oli bin girap agensem Profet Josef Smit mo Restoresen blong Jos Ia blong Jisas Kraes, i defren. Kaen filing ia blong harem nogud mo defren, i no wan saed bilif; mo hem i no fraet ia blong yu gat rong tingting. Hem i we, Spirit blong God i no stap ia. Hem i olsem wanem man i stap taem we “hem i stap hemwan finis” (Doktrin mo Ol Kavenan 121:38). Hem i filing ia blong tudak mo “tingting i fasfas” (Doktrin mo Ol Kavenan 9:9; luk tu long ves 8).
Lod i talem:
“Mo wanem we i no mekem man i kam antap, i no kam long God, mo i tudak.
“Wanem we i kam long God, i laet; mo hem we i kasem laet, mo i gohed blong stap strong long God, i kasem moa laet; mo laet ia i gro i saen gud mo i saen moa gud bakegen kasem dei we i stret gud evriwan i kam” (Doktrin mo Ol Kavenan 50:23–24).
Revelesen we i kam long Spirit blong God i tekova long wan saed bilif, from se hem i no stanap nomo long pruf. Mi bin spendem wan ful laef blong lukaotem blong lisin gud long toktok blong Lod mo stap folem Spirit blong God. Spirit we i kam wetem ol dak voes ia we oli agensem Profet Josef Smit, Buk blong Momon, mo Restoresen, i no spirit blong laet, waes, mo trutok. Mi no save plante samting, be mi mi save voes blong Lod, mo voes blong Hem i no stap long dak kwaea ia.
Wanem i narasaed mo i defren evriwan long filing ia blong harem nogud mo i defren, mo nogud taem ia blong tingting i fasfas we i kavremap bigfala doti wota blong tu tingting, hem i spirit blong laet, waes tingting, pis mo trutok we oli stap long ol taem blong Restoresen mo doktrin ia blong Restoresen, speseli ol skripja we Lod i talemaot long wol tru long Profet Josef Smit. Jes ridim olgeta mo askem yuwan mo askem God sapos oli ol toktok blong giaman, blong trikim man, mo giaman tingting, o, sapos oli trutok.
Yu No Save Lanem Trutok tru long Fasin blong Karemaot Samting Wan afta Wan
Sam oli fraet se Jos ia i no tru, oli spendem taem mo tingting blong olgeta blong stap swim tru long doti wota blong ol nambatu kwestin, o ol kwestin we oli kam afta. Oli mekem mistek ia blong traem lanem trutok tru long rod ia blong karemaot wan samting, wan afta wan, mo traem blong karemaot evri tu tingting. Oltaem, hemia i no wan gud aedia. Bae i neva wok.
I gat ol klem mo ol opinion we namba i no save kaontem, we oli kam agensem trutok. Evri taem we yu traem folemap wan ansa blong wan samting we i agensem Jos, mo lukluk i go, i gat wan narawan i stap, i stap wet long yu. Mi mi no talem se yumi sapos blong berem hed blong yumi insaed long sanbij, be mi mi stap talem se yu save spendem wan ful laef blong traehad blong folemap ansa blong evri klem agensem Jos, mo bae yu neva kam blong save ol trutok we oli impoten moa.
Ol ansa long ol fasfala kwestin, oli no kam taem yu ansarem ol kwestin we oli kam afta, o ol nambatu kwestin. I gat ansa blong ol nambatu kwestin, be yu no save pruvum wan samting we i tru taem yu jalenjem evri toktok blong agens. Yu no save pruvum se Jos i tru taem yu jalenjem evri klem we yu mekem agensem Jos. Hem i wan teknik we i rong. Long en, i mas gat pruf se i talem se i tru, mo wetem ol samting we oli blong God, pruf we i talem se ol samting ia oli tru, long en, oli kam tru long revelesen, tru long spirit mo paoa blong Tabu Spirit.
Jisas i askem long ol disaepol blong Hem:
“?Be yufala, yufala i stap tokbaot mi, se mi hu?”
“Nao Saemon Pita i talem se, ‘Yu yu Mesaea* ya. Yu yu Pikinini blong God ya we i laef, i stap we i stap.’
“Nao Jisas i talem long hem se, ‘Saemon, pikinini blong Jon, yu yu save harem gud, from we i no man we i soemaot samting ya long yu. Papa blong mi long heven, hem nomo i soemaot long yu.’
“Mo mi mi talem long yu, se yu Pita, we i min se ston. Mo bambae mi mi stanemap jos blong mi long ston ya, mo paoa blong ded bambae i no naf blong winim jos ya” (Matiu 16:15–18; luk tu long ol ves 13–14).
Jos Ia blong Jisas Kraes i stanap strong antap long strong ston ia we i revelesen, mo ol get blong hel bae oli no save win agensem. Yu mo mi, yumitu Jos ia nao. Yu mas gat rus insaed long strong ston ia we i revelesen, mo i nomata se yumi no save faenem ol ansa long evri kwestin, yumi mas save ol ansa blong ol kwestin we oli kam faswan, ol fas kwestin. Sapos yumi mekem, ol get blong hel bae oli no win agensem yumi, mo bambae yumi stanap blong oltaem i go.
Stanap long Strong Ston Ia we I Revelesen
I gat wan God we i stap long heven, we i Papa blong yumi We I No Save Finis Jisas Kraes i Pikinini blong God, Ridima ia blong wol. Josef Smit i wan profet blong God we i bin putum fandesen i stap blong Restoresen blong kingdom blong God. Jos Ia blong Jisas Kraes blong Ol Lata-dei Sent i kingdom blong God long wol ia. Mi save hemia tru long eksperiens blong mi—evriwan long hemia. Mi save hemia tru long pruf we mi gat, mo pruf ia i bitim evri samting. Mi save hemia tru long stadi. Mo, moa sua long evri samting, mi save hemia tru long spirit mo paoa blong Tabu Spirit.
Mo wetem hemia, mi save se evri samting we mi nidim blong save blong stanap blong oltaem. Bae yumi stanap antap long strong ston we i revelesen, speseli long saed blong ol fas kwestin. Sapos yumi mekem olsem, bambae yumi stanap blong oltaem, mo bae yumi neva gowe.