Hem I Putputum Mi I Kambak Tugeta
Fren blong mi i bin harem se mi mi sik, mo i sendem wan pasol we hemwan i bin mekem, speseli blong mi.
Droing i kam long Joshua Dennis
Oltaem, mi mi ting se mi mi helti nomo. Mekem se mi sek taem mi bin wekap long wan moning, we mi filim se wan samting i skwisim jes blong mi strong, we bae i faerap. Oli sendem mi hariap i go long hospital, be sam aoa afta we oli testem mi, ol dokta oli no save faenem wanem i problem. Oli sendem mi i go hom, nomata se mi stap harem i soa tumas. Olsem ia nao, wan seven manis taem blong tekem apoenmen wetem ol dokta, stap smol taem long hospital, mo nogud soa, i stat. Mi neva harem olsem long laef blong mi.
I stat tu blong tingting blong mi i kam fasfas. Mi mas lego ol klas blong mi long skul, mo mi muv i gobak long haos blong papa mo mama blong mi. Mi no save aot wetem ol fren blong mi. Mi harem i soa tumas, mekem se mi no save mekem ol samting we mi bin laekem blong mekem. Mi filim se evri samting we mi kea long hem—ol samting we mi wantem wok from, ol rilesensip, ol talen blong mi—evriwan i go wanwan, mo naoia ol pisis blong tingting gud long miwan, mi nomo save putum i kambak tugeta. Mekem se mi stat blong askem miwan: ?Olsem wanem Papa long Heven i letem hemia i hapen long mi? ?Weswe? ?Hem i no lavem mi?
Afta long wan moa apoenmen long dokta we mi givap mo mi harem i soa, mi wantem nomo se mi benbenem mi olsem wan balong mo krae. Be taem mi kasem haos, mi luk wan defren kaen samting long fored blong doa: wan olfala bokis blong sus, we oli kavremap long skoj, we oli putum nem blong mi long hem.
Wan leta long bokis i soem se bokis ia i kam long wan long ol fren blong mi. Hem i bin harem se mi mi sik, mo i wantem mekem mi mi smael smol. Taem mi openem bokis blong sus ia, mi faenem se i fulap long ol smol pisis blong sopsop katen. Hem i wan pasol we wan i mekem, speseli blong mi.
Taem mi stap putum pasol ia i kam tugeta, mi stat blong krae. Pasol ia, i gat nem blong mi long hem, mo raon long hem i gat ol swit mesej blong lav mo blong leftemap tingting blong mi. Mi bin filim se ol smol pisis blong mi, we oli bin stap olbaot, naoia, oli kambak tugeta taem mi putum tugeta presen ia we i kam long fren blong mi.
Wan sot taem afta, mi stat blong tekem meresin we i daonem ol saen blong sik blong mi, mo i bin helpem ol dokta blong faenem wanem i rong. Mi bin gat wan sik we i no fulap man i kasem, mo wetem stret meresin, mi save gobak long wan nomol laef.
Iven we taem bodi blong mi i stap kam oraet, mi save se bae mi neva fogetem wanem we mi bin lanem. From swit presen blong fren blong mi, mi bin save se wan i lavem mi mo Papa long Heven i no bin fogetem mi. Afta ol manis blong stap filim brokbrok, tangkyu long kaen fasin blong wan fren, mo lav blong Papa blong mi long Heven, mi kam oraet fulwan.