Olsem Wanem Mi Faenem Hiling aot long Abius long saed blong Seks
Mi bin laef long wan rabis drim. Be afta, mi bin lanem se long taem blong ol taem blong mi we oli tudak moa, mi bin save dipen long Sevya blong mi.
Foto i kam long Getty Images, oli yusum ol pikja blong flasem pej nomo, oli yusum ol model
Rabis drim blong mi i stat taem mi gat seven yia mo mama blong mi i mared nambatu taem. Mifala i rili laekem niufala step papa blong mifala. Hem i wan man we i kaen, mo i stret long famli blong mifala. Mi rili filim se mi sef raon long hem. Evri samting i bin gud tumas kasem wan dei, taem evriwan i bin stap bisi, hem i abiusum mi long saed blong seks.
Mi no bin andastanem wanem nao hem i bin mekem long mi. Mi filim se mi fraet, konfius, mo mi sem tumas. Be mi fraet tumas blong talem long eniwan. Mi ting se bae i spolem gud niu hapines blong famli blong mi, mo bae i no gat wan bae i bilivim mi. Mekem se mi sarem maot blong mi.
Hem i mekem nogud mi long wan taem ia nomo, be memori blong abius ia i bin hevi long maen blong mi. Long en, mi tingting tumas se nogud wan bae i luk bigfala soa blong mi mo bae i save sikret blong mi, mekem se mi traem blong haedem trutok ia tru long fasin blong kam gud fren wetem step papa blong mi. Hem i bin kaen tumas long mi, mo mi stat blong laekem hem bakegen.
Be ol samting oli go mowas. Taem Mama i stat blong wok long naet, step papa blong mi i stat bakegen blong abiusum mi. Mi filim se paoa i finis. Mi wantem talem, be fulap man i laekem tumas step papa blong mi, mo mi ting se evriwan bae i tekem saed blong hem. Mekem se, long naet, taem mi bin stap miwan, mi prea strong long God se bae i helpem mi blong kipim sikret blong mi.
Stap Toktok
Wan dei, abius ia i stop. Mi no save se from wanem. I nomata se hem i nomo stap spolem mi, be oltaem mi filim se mi doti mo mi sem. Mi nomo laekem miwan. Samtaem, mi stap toktok mo talem se maet ded i moa gud bitim ril samting we i stap. Mi stil wantem blong toktok, be mi bin fraet long wanem nao bae trutok ia bae i mekem.
Nao, long wan Sandei, long Jos, taem mi bin gat 14 yia, mi bin lisin long wan lesen abaot wei blong mekem ol bigfala desisen. Tija blong mifala i leftemap tingting blong mi blong livim kakae mo prea, mo i promesem se God bae i mekem yumi kam strong moa blong save mekem raet samting. Afta long Jos, mi gohed blong tingting abaot wanem hem i bin talem. Mi askem miwan se, sapos mi askem, ?bae God i rili helpem mi blong toktok?
Long nekis dei mi bin livim kakae blong gat strong paoa long tingting blong talem long Mama abaot abius ia. Mi no save tingting stret long skul from se mi stap tingting nomo abaot wei we bae Mama i filim. Taem mi kasem hom, mi harem se mi sik tumas. Mi prea bakegen blong gat paoa, be mi no filim se mi rere blong talemaot long hem.
Long naet ia, mi go kolosap long Mama taem hem i bin stap kukum kaekae. Mi no bin save wanem blong talem, be taem mi lukluk long ae blong hem, mi faenem paoa long tingting blong jes stat toktok nomo. Taem mi stat, evri samting we mi bin haedem blong plante yia, i kamaot.
Mama mo mi i jes sidaon long sofa mo krae tugeta. Afta long hemia, mitufala i ringim branj presiden mo ringim polis. Step papa blong mi i mas ansa from samting ia we hem i bin mekem long mi, mo mi mi kasem proteksen we mi bin nidim—bae mi neva nidim blong luk hem bakegen.
Rod Ia blong Kam Oraet
Long tetaem ia, i bin had blong talem bakegen eksperiens blong mi long ol atoriti, mo gat ol fren oli askem mi se step papa blong mi i stap wea, be wetem sapot blong famli blong mi, mi nomo stap miwan. Tugeta, mifala i bin gat wan niu famli stamba toktok: “Mi save mekem evri samting long paoa blong Kraes ya we i stap mekem mi mi strong” (Filipae 4:13). Ol nara famli blong mifala oli givim lav mo sapot blong olgeta, mo wetem taem, mifala i stat blong kam oraet tugeta.
Mama mo mi i go long profesonol kaonseling, !we i bin help bigwan! Kaonsela blong mi, i stret wanem we mi bin nidim. Hem i bin helpem mi blong andastanem evri filing we mi bin stap filim mo i bin helpem mi blong stanap wetem ol nogud memori blong mi. Mi neva luksave hamas mi bin stap harem nogud insaed kasem taem we mi stat blong kam oraet bakegen.
Mi no bin ting se soa ia bae i jes go lus from se mi bin toktok, be tu, mi no bin luksave hamas taem (mo fasin blong wet longtaem) bae i tekem mi blong kam oraet. Blong plante taem, mi bin filim se mi nating. Mi mas lan bakegen blong lavem miwan.
Mi bin faenem plante pis taem mi bin tanem mi i go long Sevya mo Papa blong mi long Heven. Blong luksave se Tufala i bin save stret olsem wanem mi bin filim, i bin givim mi paoa mo hop. Mi bin dipen long Tufala long ol taem we oli bin moa tudak. Wetem taem, ol memori ia oli stat blong go lus, mo mi rili filim pis tru long lav blong Sevya.
Wan long ol pat we i givim moa samting long mi long taem we mi stap kam oraet, i blong luksave se mi gat wan gudfala fiuja i stap. Taem oli bin stap abiusum mi, mi no save tingting nomo se bae mi save gat wan nomol laef. Mi filim se mi brokbrok olwe nomo. Be tru long help mo hiling, mi bin faenem ol samting blong lukluk i go fored. Mi stat blong talemaot stori blong mi long ol nara gel we oli bin stap harem nogud, mo mi iven disaed blong go long wan misin. Taem mi bin serem testemoni blong mi wetem ol narawan, i bin mekem mi mi bin kam strong moa.
Oli no stap talem se huia mi folem wanem we step papa blong mi i bin mekem long mi. Hem i bin jenisim laef blong mi blong oltaem, be mi mi stap jusum blong yusum eksperiens blong mi blong helpem ol narawan. Sam dei i had yet, be tru long evri samting, Lod i bin mekem mi mi kam strong, mo mi save se bambae Hem i gohed blong helpem mi. Mi mi bin jenis, mi bin wan viktim we mi laef i stap.