Yu Save Faenem Fridom

?Yu o eniwan we yu lavem i fas long saekol blong stap mekem trabol, stap sakem sin, stap komitim hem bakegen, mo stap mekem trabol bakegen? Plante long ol gudfala yang adalt we mi bin wok wetem taem mi bin stap givim seves olsem wan bisop blong wan yang singgel adalt wod, oli bin fas long semfala saekol. Be plante oli bin faenem fridom tru long Atonmen blong Jisas Kraes. Ol mesej abaot adiksen long seksen blong manis ia, i givim sam niu tingting we bae i help blong faenem fridom—blong yuwan mo ol narawan.

Samting we i moa impoten we yumi mas tingbaot, i we, yumi evriwan i ol pikinini blong Papa long Heven we Hem i lavem. Elda Dieter F. Uchtdorf i bin tijim: “[God] i no wet blong lavem yu kasem taem we yu winim ol samting we yu no strong long olgeta, mo ol nogud fasin blong yu. Hem i lavem yu tedei mo Hem i andastanem fulwan evri hadwok blong yu. … Hem i save harem nogud blong yu from ol taem we yu bin foldaon. Mo Hem i stil lavem yu” (“Stap Laef Folem Gospel wetem Glad,” Jeneral Konfrens, Oktoba 2014, Churchofjesuschrist.org/general-conference/conferences?lang=bis, oli ademap italik).

Long nara han, Setan bae i traem blong winim tingting blong yu se yu no naf mo no gat raet long lav blong Papa long Heven, mo long paoa blong Sevya blong jenisim mo klinim yu. Setan bae i traem blong kipim yu long wan strong waelpul blong sem mo fasin blong no laekem yuwan nating, be yu no bilivim ol giaman blong hem.

Be, tanem yu i go long Papa long Heven. Yu no fraet blong toktok open long bisop o branj presiden blong yu, mo ol narawan we oli stap lavem yu. Taem yu stap ridim ol stori blong hop we oli kam long ol nara yang adalt we adiksen i spolem olgeta, tekem aksen folem ol tingting mo filing we yu kasem. Gat longfala tingting wetem yuwan bakegen, tingbaot tabu fasin blong yu, tekem wan dei long wan taem, mo bilivim hiling paoa blong Jisas Kraes. Hem mo plante risos bae oli helpem yumi blong win blong faenem fridom ia we yumi wantem. Yu no givap.

Fren blong yu,

Richard Ostler