Evri Dei Seves blong Marta
Mama mo gel ia blong hem, tufala i wok had blong laef folem gospel tugeta. Mo Marta i save laef folem gospel taem hem i stap givim seves long mama blong hem long wan wei we i no gat wan moa we i semmak.
Foto i kam long Leslie Nilsson.
Marta i wan gel we i gat 11 yia, we i blong Potugal, mo, olsem plante gel we oli gat sem yia olsem hem, hem i laekem blong spendem taem wetem ol fren blong hem, kakae ol kaekae, mo pleiplei wetem ol doli blong hem. Hem i laekem tu blong spendem taem wetem mama blong hem. Be blong stap laef wetem mama blong hem, i minim se Marta i laef long wan wei we i defren long ol nara pikinini.
Mama blong Marta, Sonya, i bon wetem wan sik we i mekem se i had blong hem i wokbaot. Hem i no paralaes fulwan, be hem i nidim wan woka blong muv raon. Hem i no save dresap hemwan, o swim hemwan, o go long bed hemwan. Hemia i mekem se i had tumas blong hem i laef hemwan. Marta i bin save givim seves long Sonya long ol las yia we oli pas, taem hem i helpem mama blong hem wetem ol samting we hem i no save mekem hemwan.
“Mi kipim ol spes oli klin blong mekem se mama i save muv raon isi moa,” Marta i talem. “Mi stap stop smol taem blong pleiplei blong mekem se mi gat taem blong jekem mama blong mi mo luk sapos hem i nidim help. Sapos mi stap pleiplei, mo hem i singaot, bae mi go hariap from se i gat wan samting we hem i nidim hariap.
Be Sonya i traem blong letem Marta i laef long wan nomol laef, olsem we hem i save mekem. Sapos Sonya i no nidim help, hem i mekemsua se Marta i gat taem blong pleiplei wetem ol fren blong hem.
Stap Laef Folem Fet blong Tufala
Marta i gat janis ia blong laef folem gospel evri dei taem hem i givim seves long mama blong hem. Hem i tekem plante responsabiliti long hemwan, mo ol nara pikinini oli no gat ol semmak samting ia. Eksampol: hem i wekap eli blong helpem mama blong hem blong i rere blong go wok bifo skul i stat. Sapos Marta i no help, Sonya bae i no save muv raon, o go long wok evri dei.
Marta mo Sonya, tufala i go long jos tugeta. Sonya i bin kasem baptaes taem hem i gat eit yia, mekem se Marta i bin groap insaed long Jos. Sonya i stap tijim Marta evri dei, abaot hamas gospel i impoten. Wan wei blong mekem hemia i blong gat plante pikja blong Jisas Kraes insaed long hom blong olgeta.
“Mi save se God i stap laef, mo Jisas Kraes i ril,” Sonya i talem. “Mo mi wantem evriwan we i kam long haos blong mi blong save se fet i impoten tumas long mi. Hem i impoten tu long mi blong tijim hemia long Marta blong mekem se hem i groap wetem save ia abaot Jisas Kraes.”
Marta i bin tekem wanem we mama blong hem i bin tijim hem mo i gohed blong lanem moa abaot gospel, hemwan. Wan wei we hem i laekem blong lanem samting, i tru long riding blong ol skripja we i helpem hem blong stanemap wan moa strong rilesensip wetem Papa long Heven mo Sevya. “Taem mi stap ridim ol skripja, mi filim se Kraes i stap long saed blong mi,” hem i talem.
Stap Faenem Kamfot
I nomata se i had blong gat plante responsabiliti olsem, blong stap go long jos evri wik i helpem Marta blong faenem kamfot ia we hem i nidim blong gohed blong helpem mama blong hem. “Taem oli stap talem prea long stat mo en blong sakramen miting, i gat pis i stap” hem i talem. “Taem mi stap ia, samtaem mi filim olsem se Papa long Heven i stap talem long mi se mi mi wan gudfala gel mo mi mas gohed blong stap wan gudfala gel blong helpem mama blong mi.”
Taem hem i filim wei ia, hem i tingbaot hamas hem i talem tangkyu from mama blong hem. Hem i filim se Papa long Heven i bin sendem ol enjel blong sapotem hem. “Mi ting se Hem i stap mekem mi mi kam strong moa blong mi stap wekap mo stap hapi mo praod long mama we mi mi gat,” Marta i talem.
Wan long ol lesen we Sonya mo Marta i bin lanem tugeta, i we, laef i no isi o i no stret evriwan—long eniwan. Sonya i talem: “I no gat wan long ol hadtaem blong mi we i mekem mi mi no hapi. Mi save se God i bin givim mi bodi mo blad mo bun ia we i olsem, from se mi mi spesel, mo God i bin talem long mi se mi mi save mekem. Mo mekem bes we mi save mekem. Mi save mekem moa, be tedei, mi filim oraet wetem miwan. Mi mi praod long wanem mi stap mekem, wanem we mi gat, mo wanem bae mi mekem tumoro.”
Marta i luksave tu se ol samting bae oli go oraet, iven we laef bae i had long sam taem, taem we hem i stap tekem kea long mama blong hem. Hem i luk se evriwan i gat ol defren jalenj. “I no gat wan laef we i stret evriwan,” hem i talem. Be iven wetem ol jalenj blong hemwan, Marta i stil faenem ol gud samting long evri situesen—rilesensip ia we hem i gat wetem mama blong hem i wan eksampol. “Mama blong mi i gat sam samting we hem i no save mekem from bodi blong hem, be long saed blong tingting mo filing, hem i waes tumas. Mitufala i ol gudfala fren.”
Stap Lukluk I Go Fored
?So i gat wanem i stap blong Marta mo Sonya long fiuja? Marta i talem se: “Mi wantem stap kolosap long mama blong mi, mo yes, mi wantem mared, gat pikinini, mo gat wan famli. Be long fiuja, sapos mi save mekem, mi wantem pem wan haos blong tugeta, blong famli blong mi, mo mama blong mi, from se mi no wantem stap longwe long hem, !iven long wan dei!”
Sonya i filim se i gat hop abaot fiuja, mo tu, bae hem i oltaem talem tangkyu from kampani mo lav blong Marta. “I gud tumas blong gat wan naes gel olsem. Hem i naes tumas blong gat Marta insaed long laef blong mi. Hem i wan presen we i kam long God. God i bin mekem Marta i rere blong stap ia wetem mi.”